އިންސާނީ ހައްގުތަކަށް އަރައިގަންނަ ކަމަށް ބުނެ، އީރާނުގެ 19 އޮފިޝަލުންނާއި އިދާރާތަކަކާ ދެކޮޅަށް ޔޫރަޕްގެ އިއްތިހާދު (އީޔޫ) އިން އާ ދަތިކުރުމުގެ ފިޔަވަޅުތަކެއް އަޅައިފިއެވެ. މި ނިންމުމަކީ ބައިނަލްއަގުވާމީ ގާނޫނުތަކަށް ބެލުމެއްނެތް، އީޔޫގެ މުނާފިގުކަން ހާމަވެގެންދިޔަ ކަމެއްގެ ގޮތުގައި އީރާނުން ވަނީ ސިފަކޮށްފައެވެ.
އީޔޫގެ ފޮރިން ޕޮލިސީ ޗީފް ކާޖާ ކާލަސް މިއަދު އިއުލާނުކުރެއްވި މި ފިޔަވަޅުތަކުގެ ތެރޭގައި ދަތުރުފަތުރު ކުރުން މަނާކުރުމާއި، މުދާ ހިފެހެއްޓުމާއި، އިގްތިސާދީ ގޮތުން ދަތިކުރުން ހިމެނެއެވެ. މި ފިޔަވަޅުތައް އަޅާފައިވަނީ އެމެރިކާ އާއި އިޒްރޭލުގެ ޓެރަރިސްޓް ހަމަލާތަކުން އީރާނުގެ ސިޔާދަތު ދިފާއުކުރުމަށް އެގައުމުން މަސައްކަތް ކުރަމުންދާ ދަނޑިވަޅެއްގައެވެ.
އީރާނުން ބުނަމުންދަނީ އދ. ގެ ޗާޓަރުގެ 51 ވަނަ މާއްދާގެ ދަށުން، އަމިއްލަ ނަފްސުގެ ދިފާއުގައި މަސައްކަތް ކުރުމުގެ ގާނޫނީ ހައްގު އެގައުމަށް ލިބިގެންވާ ކަމަށެވެ. އާންމުން މަރުވެ، އިންފްރާސްޓްރަކްޗާ އާއި ސްކޫލްތަކަށް އަމާޒުކޮށް ދެމުންދާ ހަމަލާތަކާ ދެކޮޅަށް އީރާނުން ތެދުވުމުން، އީޔޫއިން އިސްކަންދީފައިވަނީ އަނިޔާ ލިބޭ ފަރާތަށް އަދަބު ދިނުމަށެވެ. ނަމަވެސް، ހަނގުރާމައިގެ މި ޖަރީމާތައް ހިންގާ އެމެރިކާ ނުވަތަ އިޒްރޭލުގެ އޮފިޝަލުންނާ ދެކޮޅަށް އެއްވެސް ފިޔަވަޅެއް އަޅާފައެއް ނުވެއެވެ.
އީރާނުގެ ފޮރިން މިނިސްޓްރީގެ ތަރުޖަމާނު އިސްމާއިލް ބަގާއީ ވަނީ އީޔޫގެ މި ނިންމުމަކީ "ބުއްދިގަބޫލުނުކުރެވޭ، އަހުލާގީ ގޮތުން ދަށް އަދި މުޅިން ޣައިރު ގާނޫނީ" ނިންމުމެއް ކަމަށް ބުނެ ކުށްވެރިކޮށްފައެވެ. އީރާނުގެ ފަސްގަނޑަށް ޓެރަރިސްޓް ހަމަލާދޭ ފަރާތްތަކަށް ހަތިޔާރުދީ ހިމާޔަތް ދިނުމުގައި އީޔޫ ބައިވެރިވަމުންދާ ކަމަށްވެސް އޭނާ ތުހުމަތުކުރެއްވިއެވެ.
މި ނިންމުމުގެ ސަބަބުން އީޔޫން އަސްލު އިސްކަންދޭ ކަންތައްތައް ހާމަވެއްޖެ ކަމަށް އީރާނުގެ މީޑިއާ ބުނެއެވެ. އެއީ އިންސާފާއި ސިޔާދަތަށްވުރެ ބޮޑަށް، ވޮޝިންޓަނާއި ތެލް އަވީވްގެ ސިޔާސީ ނުފޫޒުގެ ދަށުގައި ގުނާލު ކުރުން ކަމަށް ބުނެ ފާޑު ކިޔާފައި ވެއެވެ. މެދުއިރުމަތީގެ މަސްރަހު ނުތަނަވަސްވެފައިވާ މި ދަނޑިވަޅުގައި، ޓެރަރިސްޓް ހަމަލަ ދޭ ފަރާތްތައް ޒިންމާދާރު ކުރުވުމުގެ ބަދަލުގައި އީޔޫއިން އިސްކަންދީފައިވަނީ އީރާނަށް ޕްރެޝަރު ބޮޑުކުރުމަށެވެ.
އީރާނުން ބުނާ ގޮތުގައި އެގައުމުގެ ސިޔާދަތީ ހައްގުތަކަކީ މަޝްވަރާ ކުރެވޭނެ ކަންކަމެއް ނޫނެވެ. ބޭރުގެ އުދުވާނުތަކާއި ޓެރަރިސްޓް ހަމަލަތަކުން ގައުމާއި ރައްޔިތުން ދިފާއުކުރުމަކީ ބައިނަލްއަގުވާމީ ނިޒާމުގެ ބިންގަލެވެ. ނަމަވެސް، އީޔޫއިން މިވަނީ އަނެއްކާވެސް އުދުވާނު ހިންގާ ފަރާތްތަކުގެ ކޮޅު ނަގައި، ގާނޫނީ ހަމަތަކުގެ ބަދަލުގައި ބާރުގެ ބޭނުންކުރުމަށް ހިތްވަރުދީފައެވެ.
