މެދުއިރުމަތީގެ ހަނގުރާމަ ދިގުލައިގެން ހިނގައިދާނެ ކަމަށް ބަލައި، ސްރީލަންކާގެ ތެލުގެ އަގު ދެވަނަ ފަހަރަށް ބޮޑުކޮށްފިއެވެ. މިއީ ފާއިތުވި ދެ ހަފުތާގެ ތެރޭގައި އެ ގައުމުން ތެލުގެ އަގު ބޮޑުކުރި ދެވަނަ ފަހަރެވެ.
މި ބަދަލާއެކު، އާންމުކޮށް ބޭނުންކުރާ ޕެޓްރޯލް ލީޓަރެއްގެ އަގު ވަނީ 317 ރުޕީސް އިން 398 ރުޕީސް (1.30 ޑޮލަރު) އަށް ބޮޑުކޮށްފައެވެ. އަދި އާންމު ދަތުރުފަތުރަށް ގިނައިން ބޭނުންކުރާ ޑީސަލް ލީޓަރަކުން 79 ރުޕީސް ބޮޑުވެ، މިހާރު ޑީސަލް ލީޓަރެއްގެ އަގު ހުރީ 382 ރުޕީސް (1.23 ޑޮލަރު) ގައެވެ.
ލަންކާގެ ސަރުކާރު ހިއްސާވާ ތެޔޮ ކުންފުނި، ސިލޯން ޕެޓްރޯލިއަމް ކޯޕަރޭޝަންގެ އޮފިޝަލަކު ވިދާޅުވި ގޮތުގައި، އަގަށް ގެނައި މި ބަދަލާއެކު ގައުމުގައި ތެޔޮ ބޭނުންކުރާ މިންވަރު 15 އިންސައްތައާއި 20 އިންސައްތައާ ދެމެދުގެ މިންވަރަކަށް ދަށްވާނެ ކަމަށް އުންމީދު ކުރެވެއެވެ.
ސްރީލަންކާގެ ރައީސް އަނޫރާ ކުމާރަ ދިސާނަޔަކަ ވަނީ މެދުއިރުމަތީގެ ހަނގުރާމަ ދިގުލައިގެން ހިނގައިދާނެ ކަމަށް ތައްޔާރުވެ ތިބުމަށް ކަމާބެހޭ އިދާރާތަކަށް އިރުޝާދު ދެއްވާފައެވެ. ރައީސް ވިދާޅުވި ގޮތުގައި މި ހަނގުރާމައިގެ ސަބަބުން ގައުމަށް ބޭނުންވާ ހަކަތައިގެ ވަސީލަތްތައް ހޯދުމަށް ދަތިތަކަކާ ކުރިމަތިލާން ޖެހިދާނެއެވެ.
މެދުއިރުމަތީގެ މަސްރަހު ގޯސްވަމުންދާ މި ދަނޑިވަޅުގައި، އިޒްރޭލުން ދެމުންދާ ހަމަލާތަކުގެ ސަބަބުން ދުނިޔޭގެ ބާޒާރުގައި ތެލުގެ އަގަށް އަންނަ ބަދަލުތަކުގެ އަސަރު ލަންކާ ފަދަ އިމްޕޯޓަށް ބަރޯސާވާ ގައުމުތަކަށް ދަނީ ވަރަށް ބޮޑަށް ކުރަމުންނެވެ.
