"އެ ދުވަހު ނިންމާނީ ތިޔަބޭފުޅުންގެ ދަރިންނާއި ރަށާއި ސިޓީ އާއި ގައުމަށްޓަކައި ކުރިއަށް ދާން، ކުރިއަރަން ރަނގަޅު ގޮތް ބޭނުންވާ ބައެއްތޯ ނުވަތަ އޮތް ގޮތަށް ސިޓީގެ ތަރައްގީ ބާއްވަން ބޭނުންވާނެ ބައެއްތޯ،" ފަލާހު
ކުރިއަށް އޮތް ލޯކަލް ކައުންސިލްތަކުގެ އިންތިހާބު 80 ޕަސެންޓަށް ވުރެ މަތީގެ އަޣުލަބިއްޔަތަކުން ޕީއެންސީން ކާމިޔާބު ކުރާނެ ކަމަށް އެ ޕާޓީގެ ޕާލަމެންޓްރީ ގުރޫޕުގެ ލީޑަރު އިބްރާހިމް ފަލާހު ރޭ ވިދާޅުވެއްޖެ އެވެ. ފަލާހު މިހެން ވިދާޅުވީ އަންނަ އޭޕްރީލް މަހުގެ ހަތަރުވަނަ ދުވަހު ބާއްވާ ކައުންސިލް އިންތިހާބުގައި ހދ. ކުޅުދުއްފުށި ސިޓީން ވާދަކުރާ ޕީއެންސީގެ ކެންޑިޑޭޓުންގެ ކެމްޕެއިން އިފުތިތާހު ކުރުމަށް ބޭއްވި ޖަލްސާގަ އެވެ.
"ހިންގަވާ ތިޔަބޭފުޅުން ޕީއެންސީގެ މި ޓީމު ކައުންސިލަށް ނަގާފައި ޓެސްޓު ކޮށްލަން. އަޅުގަނޑު ސަތޭކަ ޕަސެންޓު ޔަގީންކަން ދެން ﷲ ގެ ރަހުމަތްފުޅާއެކު ތިޔަބޭފުޅުންނަށް މި ޓީމު ވެގެން ދާނީ މިއަދުގެ ސަރުކާރާ ގުޅިގެން މި ސިޓީގައި ކުރަން މި ހުރި ހުރިހާ މަސައްކަތެއް ނިންމައިދޭނެ ކައުންސިލަކަށް،" ފަލާހު
ލޯކަލް އިންތިހާބުގައި ޕީއެންސީގެ ކެމްޕެއިން މެނޭޖަރުގެ ޒިންމާ ވެސް ނަންގަވާ ފަލާހު ވިދާޅުވީ، ރައީސް ޑރ. މުހައްމަދު މުއިއްޒަކީ ރައްޔިތުންނަށް ވެވަޑައިގަންނަވާ ވައުދުތައް ފުއްދަވާ ވެރިއެއް ކަމަށެވެ. އެހެންކަމުން، ރަށްރަށުގައި ފަށާފައިވާ ތަރައްގީގެ މަޝްރޫއުތައް ހަލުވިކަމާ އެކު ނިންމުމަށްޓަކައި ސަރުކާރަށް އެއްބާރުލުންދޭނެ ކައުންސިލްތަކެއްގެ އެހީތެރިކަން އިންތިހާ އަށް ބޭނުންވާ ކަމަށް އޭނާ ފާހަގަކުރެއްވި އެވެ.
ރައީސުލްޖުމްހޫރިއްޔާ މުއިއްޒުގެ ވެރިކަމުގެ ޒައާމަތް ވެފައި ވަނީ ރާއްޖޭގެ ތާރީޚުގައި ދުވަހަކުވެސް ނުދެކޭ ވަރުގެ "ތަރައްޤީގެ ޒައާމަތަކަށް": ފަލާޙު
ކުޅުދުއްފުށީގެ ސިޔާސީ މަސްރަހަށް އަލިއަޅުވާލައްވަމުން ފަލާހު ވިދާޅުވީ، 2008 ވަނަ އަހަރު އާ ގާނޫނުއަސާސީ އަށް އަމަލުކުރަން ފެށި ފަހުން އެ ސިޓީގެ ކައުންސިލްގެ އަޣުލަބިއްޔަތު އެމްޑީޕީ ނޫން ބަޔަކަށް ލިބިފައި ނުވާ ކަމަށެވެ. ނަމަވެސް، މިއީ އެ ވިސްނުން ބަދަލުކޮށް ޕީއެންސީގެ ޓީމަށް ފުރުސަތު ދޭންވީ ވަގުތު ކަމަށާއި، މި ޓީމު ވެގެން ދާނީ ސަރުކާރާ ގުޅިގެން ސިޓީގެ ތަރައްގީގެ މަސައްކަތްތައް ނިންމައިދޭނެ ބަޔަކަށް ކަމުގެ ޔަގީންކަން އޭނާ ދެއްވި އެވެ.
ފަލާހު އިތުރަށް ވިދާޅުވީ، ރައީސް މުއިއްޒު ދާދިފަހުން އިއްވެވި ރިޔާސީ ބަޔާނުން ރާއްޖޭގެ ތަރައްގީގެ ޕްލޭން ވަރަށް ސާފުކޮށް އެނގިގެން ގޮސްފައިވާ ކަމަށެވެ.
"ކޮންމެ ކަމެއް ކޮންމެ މަޝްރޫއެއް ކޮންމެ ދާއިރާއެއް ވަރަށް ތަފުސީލްކޮށް ކޮންމެ ރައްޔިތަކަށް އެނގޭނެ ގޮތަށް ބަޔާން ކޮށްދެއްވީ،" ރައީސްގެ ޒައާމަތަކީ ތަރައްގީގެ ޒައާމަތެއްގެ ގޮތުގައި ސިފަކުރައްވަމުން އޭނާ ވިދާޅުވި އެވެ.
މި ފަހަރުގެ އިންތިހާބުގައި ބައެއް ދާއިރާތަކަށް ވާދަކުރާނެ ކެންޑިޑޭޓުން އިދިކޮޅު އެމްޑީޕީގައި ނެތުމުގެ ސަބަބުން ޕީއެންސީއަށް މިހާރުވެސް ބައެއް ގޮނޑިތައް ކަށަވަރުވެފައިވާކަން ފަލާހު ފާހަގަކުރެއްވި އެވެ. އޭނާ ވިދާޅުވީ ޕީއެންސީއަކީ ވަރުގަދަ ލީޑަރަކު ހުންނެވި، ސިޔާސީ ހަރަކާތްތަކަށް އިސްކަންދޭ ޕާޓީއެއް ކަމަށާއި، އެހެންކަމުން މުޅި ރާއްޖޭގެ ހުރިހާ ކަންކޮޅުތަކަކުން ޕީއެންސީއަށް ކައުންސިލްތަކުގެ އަޣުލަބިއްޔަތު ދޭންޖެހޭ ކަމަށެވެ.
"ﷲ އިރާދަކުރެއްވިއްޔާމު މި އިންތިޚާބު މާތް ﷲ ގެ ތަނަވަސް ރަހުމަތުން ޕީއެންސީން ކާމިޔާބު ކުރާނީ 80 ޕަސެންޓުން މަތިން،" ފަލާހު
