ސްރީލަންކާއަށް ކުރައްވަމުން ގެންދަވާ ފުރަމާނަ ދަތުރުފުޅުގެ ތެރެއިން، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒާއި އެމަނިކުފާނުގެ އަނބިކަނބަލުން ސާޖިދާ މުޙައްމަދު، ކޮލަމްބޯގައި ހުންނަ ދިވެހި ހައިކޮމިޝަނަށާއި މޯލްޑިވްސް ކަލްޗަރަލް ސެންޓަރަށް މިއަދު ޒިޔާރަތްކުރައްވައިފިއެވެ. މި ޒިޔާރަތުގައި ރާއްޖޭގެ އިދާރީ ޚިދުމަތްތައް ލަންކާގައި ތިބި ދިވެހިންނަށް ފަސޭހަކަމާއެކު ލިބޭނެ އިންތިޒާމުތައް ވަނީ އިފްތިތާޙްކޮށްދެއްވާފައެވެ.
ދިވެހި ހައިކޮމިޝަނުގައި ބޭއްވި ރަސްމިއްޔާތެއްގައި ރައީސުލްޖުމްހޫރިއްޔާ ވަނީ ނޭޝަނަލް އައިޑެންޓިޓީ ކާޑު އަދި އިލެކްޓްރޯނިކް ޕާސްޕޯޓް ދޫކުރުމުގެ ޚިދުމަތް އިފްތިތާޙްކޮށްދެއްވާފައެވެ. މިއީ ލަންކާގައި ދިރިއުޅޭ ދިވެހިން، ޚާއްޞަކޮށް ކިޔަވާ ކުދިންނާއި އާއިލާތަކުން ލިޔެކިޔުންތައް އައުކުރުމަށް މާލެއަށް ކުރަންޖެހޭ ދަތުރުތައް މަދުކޮށް، އިދާރީ ތަކުލީފުތަކަށް ލުޔެއް ހޯދައިދިނުމަށް އެޅުނު މުހިންމު ފިޔަވަޅެއް ކަމަށް އޮފިޝަލުން ފާހަގަކުރެއްވިއެވެ.
މީގެ އިތުރުން، ރައީސުލްޖުމްހޫރިއްޔާ ވަނީ ރާއްޖޭގެ ސަގާފީ މަރުކަޒަށް ޒިޔާރަތްކުރައްވައި، އެތަނުން ދިވެހިންނަށް ފޯރުކޮށްދޭ ޚިދުމަތްތައް ބައްލަވާލައްވާފައެވެ. އެ ސެންޓަރުގެ މުވައްޒަފުން ވަނީ ތަޢުލީމީ އެހީތެރިކަމާއި، ސަގާފީ ޕްރޮގްރާމްތަކުގެ އިތުރުން ޞިއްޙީ، ޤާނޫނީ އަދި ކޮންސިއުލަރ ކަންކަމުގައި ދިވެހި އާއިލާތަކަށް ފޯރުކޮށްދޭ އެހީތެރިކަމާ ގުޅޭ މަޢުލޫމާތު ރައީސަށް އަރުވާފައެވެ.
މިއަދު ރައީސުލްޖުމްހޫރިއްޔާގެ ދެކަނބަލުން ވަނީ ކޮލަމްބޯ ނޭޝަނަލް މިއުޒިއަމަށް ޒިޔާރަތްކުރައްވައި، ސްރީލަންކާގެ ސަގާފީ ތަރިކައާ ގުޅޭ މަޢުލޫމާތު އޮޅުންފިލުއްވާފައެވެ.
ރައީސްގެ ފުރަމަނާ ދަތުރުފުޅަކީ ރާއްޖެއާއި ސްރީލަންކާއާ ދެމެދު ސިޔާސީ ގުޅުން ޤާއިމުކުރިތާ 60 އަހަރު ފުރުން ފާހަގަކުރުމުގެ ގޮތުން ކުރިއަށްދާ ހަރަކާތްތަކުގެ ބައެކެވެ. މި ދަތުރުފުޅުގެ ތެރެއިން ދެ ޤައުމުގެ ދެމެދުގައި އިޤްތިޞާދީ އަދި ސަގާފީ ދާއިރާއިން ގުޅުން ބަދަހިކުރުމަށް ހަތް އެއްބަސްވުމެއްގައި ވަނީ ސޮއިކޮށްފައެވެ.
