މިއަހަރުގެ ޒުލްހިއްޖާ މަހުގެ ފުރަތަމަ ހުކުރު ނަމާދުގައި ބައިވެރިވުމަށްޓަކައި ދުނިޔޭގެ އެކި ކަންކޮޅުތަކުން އައިސްތިބި މިލިއަނުން މުސްލިމުން މަސްޖިދުލް ހަރާމަށް ޖަމާވެއްޖެއެވެ. މިއީ ހައްޖުގެ މާތް އަޅުކަމަށް ތައްޔާރުވަމުންދާ ދަނޑިވަޅެއްގައި، ވަރަށް ގިނަ އަދަދެއްގެ ހައްޖާޖީންނާއި ޒިޔާރަތްތެރިން ބައިވެރިވި ބޮޑު ޖަމާއަތެކެވެ.
މިއަދުގެ ހުކުރު ހުތުބާ ދެއްވަމުން ކައުބަތުﷲ ޝަރީފުގެ އިމާމް ޝައިޚް މާހިރު އަލްމުއައިގިލީ ވަނީ ޒުލްހިއްޖާ މަހުގެ ފުރަތަމަ ދިހަ ދުވަހުގެ މާތްކަމާއި ރޫހާނީ ފަޟީލަތުގެ މައްޗަށް އަލިއަޅުއްވާލައްވާފައެވެ. އިމާމް ވިދާޅުވި ގޮތުގައި މި ބަރަކާތްތެރި ދުވަސްތަކުގައި ކުރެވޭ ހެޔޮ އަމަލުތަކަކީ މާތްﷲގެ ހަޟްރަތުގައި އެންމެ ލޯބިވެތިވެގެންވާ އަމަލުތަކެވެ.
ހައްޖުގެ އަޅުކަމަށް ތައްޔާރުވަމުންދާ ހައްޖާޖީންނަށް އިރުޝާދު ދެއްވަމުން ޝައިޚް މާހިރު ވިދާޅުވީ، ހައްޖުގެ މަނާސިކުތަކުގެ ހުރުމަތް ހިފެހެއްޓުމަށާއި ސަރުކާރުން ކަނޑައަޅާފައިވާ ގަވާއިދުތަކަށް ފުރިހަމައަށް ބޯލެނބުމަށް އިލްތިމާސްކުރައްވާފައެވެ. ވަކިން ހާއްސަކޮށް، ހުއްދަ ނުހޯދާ ހައްޖުގެ އަޅުކަން އަދާކުރުމަކީ އެހެން މީހުންނަށް އޭގެ ސަބަބުން ގެއްލުންތަކެއް ލިބިދާނެ ކަމެއްކަން އިމާމް ފާހަގަކުރެއްވިއެވެ.
އިމާމް އިތުރަށް އިންޒާރު ދެއްވި ގޮތުގައި، ރަސްމީ ހުއްދައާ ނުލައި ހައްޖުވުމަށް މަސައްކަތް ކުރުމަކީ ހައްޖުގެ އިންތިޒާމުތައް ރޭވުންތެރިކަމާއެކު ކުރިއަށް ގެންދިއުމަށް އެޅޭ ހުރަހެކެވެ. އަދި އެއީ ހައްޖާޖީންގެ ސަލާމަތާއި ރައްކާތެރިކަމަށްޓަކައި އަޅާފައިވާ ފިޔަވަޅުތަކަށް ބުރޫއަރާނެ ކަމެއް ކަމަށްވެސް ހުތުބާގައި ބަޔާންކުރެއްވިއެވެ.
