ފަލަސްޠީނު، ޗައިނާ ނުވަތަ އިޓަލީގެ ސަގާފީ ކުލަތަކާއި ކުރެހުންތައް ހިމެނޭ މުޞްޙަފަކުން ކީރިތި ޤުރުއާން ކިޔަވާއިރު، އެއީ ތިމާގެ އަމިއްލަ ސަގާފަތުގެ ބައެއްގެ ގޮތުގައި އިޙްސާސްކުރެވޭނެއެވެ. މިއީ މެލޭޝިޔާގެ "ރެސްޓޯ" އިންސްޓިޓިއުޓުން ވޭތުވެދިޔަ 40ވުރެ ގިނަ އަހަރު ދުނިޔެއަށް ދައްކައިދިން ފަލްސަފާއެވެ.
މި ބޮޑު މުއައްސަސާގެ ބާނީ، ޑޮކްޓަރު ޢަބްދުއްލަޠީފް މީރާސާ ވިދާޅުވިގޮތުގައި، މި މަސައްކަތުގެ ފެށުމަކީ މެލޭޝިޔާގެ އަމިއްލަ ސަގާފަތް ދައްކުވައިދޭ މުޞްޙަފެއް އުފެއްދުމެވެ. ނަމަވެސް މިއަދު އެ މުއައްސަސާގެ އަމާޒަކީ ދުނިޔޭގެ 50 ބަހަކުންނާއި އެކި ޤައުމުތަކުގެ ސަގާފަތާ ގުޅޭގޮތަށް، ޑިޖިޓަލް ޓެކްނޮލޮޖީގެ އެހީގައި ޤުރުއާން ފެތުރުމެވެ.
ޑޮކްޓަރު މީރާސާ އޭނާގެ ޒުވާން އުމުރުގައި، ޕިނޭންގް ސްޓޭޓްގެ މިނިސްޓަރަކަށް ހުންނެވި ދުވަސްވަރު، މިހާރުގެ ބޮޑުވަޒީރު އަންވަރު އިބްރާހީމްއާއެކު މި މަޝްރޫޢު ފެއްޓެވިއެވެ. މެލޭޝިޔާގެ މާހިރު ޚައްޠާޠުންގެ އަތުން ލިޔެ، 1997 އަހަރު "މުޞްޙަފު މެލޭޝިޔާ" ގެ ނަމުގައި ފުރަތަމަ ޤުރުއާން ނެރުނެވެ.
މި ފުރަތަމަ މުޞްޙަފު ލިޔެ ނިންމުމަށް އެކަނިވެސް 5 އަހަރު ނެގިއެވެ. މެލޭޝިޔާގެ އެކި ދާރުލްއާސާރުތަކަށާއި ރިސާރޗް ސެންޓަރުތަކަށް ޒިޔާރަތްކޮށް، ކުލަތަކާއި ކުރެހުންތައް ޤުރުއާނުގެ އާޔަތްތަކުގެ މާނައާ ގުޅުވުމަށް ދިރާސާކުރިއެވެ. މި ފުރިހަމަ ނިޒާމު އެކުލަވައިލުމަށް މިއަދު އެ މުއައްސަސާއަށް 10 އަހަރުގެ ދިރާސާ ބޭނުންވިއެވެ. މީގެ ސަބަބުން މި މަސައްކަތުގެ އިންޓެލެކްޗުއަލް ޕްރޮޕަޓީ މިލްކުވެރިކަން އެ މުއައްސަސާއަށް މިވަނީ ލިބިފައެވެ.
މި ބޮޑު ކާމިޔާބީގެ ފަހަތުގައި ބޮޑެތި ގޮންޖެހުންތަކެއް ހުއްޓެވެ. ފެށުނުއިރު މާލީ ދަތިކަމުގެ ސަބަބުން މުވައްޒަފުންނަށް ދެވުނީ މުސާރައިގެ ދެބައިކުޅައެއްބައެވެ. ނަމަވެސް، މުވައްޒަފުންގެ ހިތްތަކުގައި ޤުރުއާނަށް އޮތް ލޯތްބެއްގެ ބޮޑުކަމުން މަސައްކަތް ހުއްޓައެއް ނުލައެވެ.
ދުނިޔޭގެ އެކި ކޮޅުތަކުގައި ތިބި މާހިރު ޚައްޠާޠުން މަރުވުމުން، އެމީހުންގެ އާއިލާއިން އެ ފަންނު ކުރިއަށް ނުގެންދާ މައްސަލައަށް ހައްލެއް ހޯދުމަށް މީރާސާ ޚާއްޞަ ފިޔަވަޅެއް އެޅުއްވިއެވެ. އޭނާ ކަލިގްރަފީއާއި ޒީނަތްތެރިކުރުމުގެ ފަންނު ދަސްކޮށްދޭ ޚާއްޞަ ކޮލެޖެއް ޤާއިމުކުރިއެވެ. މީގެ ސަބަބުން މި ފަންނު މެލޭޝިޔާގައި ދެމެހެއްޓެނިވި ގޮތެއްގައި ކުރިއަށްދާނެ މަގު ތަނަވަސްވިއެވެ.
މިއަދު ރެސްޓޯ ފައުންޑޭޝަނަކީ އެކަނި އެކަކަށް ބަރޯސާވާ ތަނެއް ނޫނެވެ. އެއީ ފެކްޓްރީއެއް ފަދައިން ހިންގާ ފުރިހަމަ ސިސްޓަމެކެވެ. 10 އަހަރުގެ ދިރާސާތަކުގެ އެހީގައި، ދުނިޔޭގެ ކޮންމެ ޤައުމެއްގެ ސަގާފަތަށް ފެތޭ މުޞްޙަފެއް ތައްޔާރުކުރަން ބޮޑުވަޒީރު އެދިވަޑައިގަތަސް، އެންމެ ދެ ހަފުތާގެ ތެރޭގައި އެ މަސައްކަތް މުޅިން ނިންމައިލުމުގެ ޤާބިލުކަން މިއަދު މި މުއައްސަސާއަށް ވަނީ ލިބިފައެވެ.
