ފުލުހުންގެ ޚަބަރުތައް

މަސްތުވާތަކެއްޗާ ދެކޮޅަށް ހިންގި އޮޕަރޭޝަނެއްގައި ގެއްލުނު ފުލުހަކު މަރުވެފައި އޮއްވައި ފެނިއްޖެ

މަސްތުވާތަކެއްޗާ ދެކޮޅަށް ބުދަ ދުވަހުގެ ފަތިހު ފުލުހުން ހިންގި ހާއްސަ އޮޕަރޭޝަނެއްގެ ތެރެއިން ގެއްލުނު ފުލުހަކު މަރުވެފައި އޮއްވައި ކަނޑުގެ އަޑިން ފެނިއްޖެއެވެ.

މި ހާދިސާގައި ނިޔާވީ ހއ. އުލިގަމު، 33 އަހަރުގެ އަހުމަދު އާސިފެވެ. އޭނާ ގެއްލުނު ކަމަށް ރިޕޯޓުކުރީ ފުލުހުންގެ ލޯންޗެއްގައި ހަރަކާތްތެރިވަމުން ދަނިކޮށެވެ. އޭނާ ހޯދުމަށް ފުލުހުން ވަގުތުން މަސައްކަތް ފެށިއެވެ. ފުލުހުން އޭނާ ހޯދީ ކަނޑުގެ ފަޅުތެރެއިންނެވެ.

އާސިފް ވަގުތުން އއ. މަތިވެރީ ސިއްހީ މަރުކަޒަށް ގެންދިޔައެވެ. ނަމަވެސް އެ މަރުކަޒަށް ގެންދިޔައިރު ވެސް އޭނާ ވަނީ ނިޔާވެފައެވެ.

ފުލުހުން ބުނާ ގޮތުގައި، އާސިފްގެ އާއިލާއަށާއި އޭނާގެ އެކުވެރި ފުލުހުންނަށް ބޭނުންވާ އެހީތެރިކަން ފުލުހުން ފޯރުކޮށްދެމުން އެބަދެއެވެ. އަދި އޭނާ ހޯދުމުގެ މަސައްކަތުގައި އެހީތެރިވި އާންމު ރައްޔިތުންނަށް ފުލުހުން ޝުކުރު އަދާކުރިއެވެ. މި މަރުގެ ހާދިސާ ހިނގި ގޮތް ފުލުހުން މިހާރު ތަހުގީގު ކުރަމުން އެބަގެންދެއެވެ.

އަމިއްލަ ދަރިޔަކަށް ޖިންސީ ގޯނާކުރި ކަމުގެ ތުހުމަތުގައި ފުލުހަކު ހައްޔަރުކޮށްފި

އަމިއްލަ ދަރިޔަކަށް ޖިންސީ ގޯނާކުރި ކަމުގެ ތުހުމަތުގައި ފުލުހަކު ހައްޔަރުކޮށްފައިވާ ކަމަށް ފުލުހުން ބުދަ ދުވަހު ކަށަވަރުކޮށްދީފިއެވެ.

މި މައްސަލައިގައި ހައްޔަރުކުރީ 49 އަހަރުގެ ދިވެހި ފިރިހެނެކެވެ. އޭނާ ހައްޔަރުކުރީ ކޯޓު އަމުރެއްގެ ދަށުން އާދީއްތަ ދުވަހުއެވެ. މި މައްސަލަ ރިޕޯޓުކުރި ދުވަހުން ފެށިގެން އޭނާ ވަނީ މުސާރަ ނުލިބޭ ގޮތަށް ވަޒީފާއިން ވަކިކޮށްފައެވެ.

ކޯޓަށް ހާޒިރުކުރުމުން އޭނާ 30 ދުވަހަށް ބަންދުކުރުމަށް ފަނޑިޔާރު އަމުރުކުރިއެވެ. ފުލުހުން އެ ފުލުހުންގެ ނަމެއް އަދި މަގާމެއް ވެސް ހާމައެއް ނުކުރެއެވެ.

މަކަރާއި ހީލަތުން ހޯދި ފައިސާގެ ތެރެއިން 3،242،609 ރުފިޔާ ހޯދައިފި

މި އަހަރުގެ މިހާތަނަށް މަކަރާއި ހީލަތުން އާންމުން އަތުން ފޭރިގަތް 9،212،916 ރުފިޔާގެ ތެރެއިން 3،242،609 ރުފިޔާ ފުލުހުންގެ އެންޓި-ސްކޭމް ސެންޓަރުން ހޯދައިފިއެވެ.

ޖެނުއަރީ މަހުން ފެށިގެން މިހާތަނަށް 954 މައްސަލަ ފުލުހުންނަށް ހުށަހެޅިއެވެ. އޭގެ ތެރެއިން އެންމެ ގިނައީ އޮންލައިންކޮށް ވިޔަފާރިކުރުމުގެ ނަމުގައި ހިންގި އޮޅުވާލުންތަކެވެ. އެފަދަ 535 މައްސަލައެއް ފުލުހުން ބެލިއެވެ. މީގެ އިތުރުން 157 މައްސަލައަކީ މަކަރާއި ހީލަތުން ފައިސާ ހޯދުމުގެ މައްސަލަތަކެވެ. އަދި 144 މައްސަލައަކީ ފައިސާ މާރުކުރުމުގެ ނަމުގައި ހިންގި އޮޅުވާލުންތަކެވެ. އޭގެ އިތުރުން 57 މައްސަލައެއް ހިމެނެއެވެ.

މަކަރު ހަދާ ފަރާތްތަކުން މައިގަނޑު ގޮތެއްގައި ބޭނުންކުރަނީ ފޯނު ކޯލުތަކާއި އޮންލައިން ޕްލެޓްފޯމްތަކެވެ. އަދި އޮޅުވާލައިގެން މެސެޖު ފޮނުވުމާއި ސޯޝަލް މީޑިއާ މާކެޓްޕްލޭސްތައް ވެސް އެ ފަރާތްތަކުން ގިނައިން ބޭނުންކުރެއެވެ.

މިފަދަ ކަންކަން ހިނގުމުން ވީހާ ވެސް އަވަހަކަށް ރިޕޯޓުކުރުމަށް އެ ސެންޓަރުން އިލްތިމާސްކުރެއެވެ. ފައިސާ ފޮނުވުމުގެ ކުރިން އެއީ ކާކުކަން ކަށަވަރުކުރުމަށާއި، ބީރައްޓެހި ފަރާތްތަކަށް އަމިއްލަ މައުލޫމާތު ނުދިނުމަށް ފުލުހުން އެދެއެވެ. އަދި ސޯޝަލް މީޑިއާ އެކައުންޓުތަކުގެ ސަލާމަތަށް ޓޫ-ފެކްޓާ އޮތެންޓިކޭޝަން ހެދުމަށް ވެސް ފުލުހުން އިލްތިމާސްކުރިއެވެ.