ރާއްޖޭގައި ދިރިއުޅޭ ބައެއް ބިދޭސީން އާންމު އިޖުތިމާއީ މިންގަނޑުތަކާ ޚިލާފަށް ނިވާކަން ކުޑަ ހެދުން އަޅައިގެން އުޅޭ މައްސަލަ ފާހަގަކުރެވިފައިވާ ކަމަށާއި، އެފަދަ ފަރާތްތަކާމެދު ގާނޫނީ ފިޔަވަޅު އަޅާނެ ކަމުގެ އިންޒާރު ދިވެހި ފުލުހުންގެ ޚިދުމަތުން ދީފިއެވެ. ފުލުހުން މިފަދަ ނިންމުމެއް ނިންމައި ބަޔާނެއް ނެރެފައިވަނީ، މީހުން ދިރިއުޅޭ ރަށްރަށުގެ އާންމު ސަރަހައްދުތަކުގައި ނިވާކަން ކުޑަ ފޭރާމުގައި ބިދޭސީންނާއި ފަތުރުވެރިން އުޅޭ މައްސަލައާ ދެކޮޅަށް ރައްޔިތުންގެ މަޖިލީހަށް އީ-ޕެޓިޝަނެއްވެސް ހުށަހަޅާފައިވަނިކޮށެވެ.
ފުލުހުން އާންމުކުރި ބަޔާނުގައި ފާހަގަކޮށްފައިވާ ގޮތުގައި، އިޖުތިމާއީ މިންގަނޑުތަކާ ނުގުޅޭ ގޮތަށް ބިދޭސީން ހެދުން އެޅުމުގެ ސަބަބުން މުޖުތަމައުގެ އަމާންކަމާއި ސުލްހަ މަސަލަސްކަމަށް ނޭދެވޭ އަސަރުތަކެއް ކުރެއެވެ. އަދި އެފަދަ ހާލަތެއް މެދުވެރިވުމުގެ ކުރިން އެކަންކަން ހުއްޓުވުމަށްޓަކައި، މުއައްސަސާއަށް މަތިކޮށްފައިވާ ގާނޫނީ ޒިންމާގެ ދަށުން އަޅަންޖެހޭ އެންމެހައި ފިޔަވަޅުތައް އަޅަމުންދާނެ ކަމަށް ފުލުހުން ބުނެފައިވެއެވެ.
ދިވެހި ބަހުން ނެރުނު މި ބަޔާނުގައި، ރާއްޖޭގައި މަސައްކަތްކުރާ އަދި ދިރިއުޅޭ ބިދޭސީންގެ ކަންކަން ބަލަހައްޓާ މުއައްސަސާތަކަށާއި، އެމީހުންގެ ބެލުމުގެ ދަށުގައި ބިދޭސީން ބައިތިއްބާ ފަރާތްތަކަށްވެސް ވަނީ ޚާއްސަ އިލްތިމާސެއް ކޮށްފައެވެ. އެގޮތުން، ބިދޭސީންގެ އަމަލުތައް އިޖުތިމާއީ މިންގަނޑުތަކަށް ފައްތައި، ރާއްޖޭގެ ގާނޫނުތަކާއި އާދަކާދަތަކަށް ހުރުމަތްތެރިކޮށް ހިތުމަށް އެފަރާތްތަކަށް އިރުޝާދު ދިނުމަށް ފުލުހުން ވަނީ އެދިފައެވެ.
މި މައްސަލައިގައި ރައްޔިތުންގެ މަޖިލީހަށް ހުށަހެޅި ޕެޓިޝަނުގައި ބުނެފައިވަނީ މީހުން ދިރިއުޅޭ ރަށްރަށުގެ އާންމު ތަންތަނުގައި ބިކިނީ ފަދަ ނިވާކަން ކުޑަ ހެދުމުގައި ބިދޭސީންނާއި ފަތުރުވެރިން އުޅުމަކީ އިސްލާމީ އަޚުލާގަށާއި ދިވެހިންގެ އާދަކާދައަށް އޮތް ގޮންޖެހުމެއް ކަމަށެވެ. އެހެންކަމުން، މިފަދަ ކަންކަން ހުއްޓުވުމަށް ގާނޫނީ އިންތިޒާމެއް ހަމަޖެއްސުމަކީ ކޮންމެހެން ބޭނުންތެރި ކަމެއް ކަމަށް އެ ޕެޓިޝަނުގައި ފާހަގަކޮށްފައިވެއެވެ.
