ދުނިޔޭގެ ފަތުރުވެރިކަމުގެ ދުވަހާ ގުޅުވައިގެން ބޭއްވި ޝަރަފުވެރި "ވޯލްޑް ޓްރެވަލް އެވޯޑްސް އޭޝިއާ، އޯޝޭނިއާ އެންޑް އިންޑިއަން އޯޝަން ގާލާ ސެރެމަނީ 2026″ ގައި ދިވެހިރާއްޖެއިން އިންޑިއާ ކަނޑުގެ ސަރަހައްދީ ފެންވަރުގައި އެންމެ ޝަރަފުވެރި ފަސް އެވޯޑު ކާމިޔާބުކޮށްފިއެވެ. ކްރޮސްރޯޑްސް މޯލްޑިވްސްގައި ބޭއްވި މި ރަސްމިއްޔާތުގައި ރާއްޖެއިން ވަނީ ފަތުރުވެރިކަމުގެ ސިނާއަތުގައި ދުނިޔޭގެ އެންމެ ކުރިއަރާފައިވާ ޖަޒީރާ މަންޒިލްގެ ގޮތުގައި އޮތް މަގާމު އިތުރަށް ވަރުގަދަކޮށްފައެވެ.
މި ފަހަރުގެ ހަފުލާގައި ރާއްޖެއަށް ލިބުނު ފާހަގަކޮށްލެވޭ އެވޯޑުތަކުގެ ތެރޭގައި:
- އިންޑިއަން އޯޝަންސް ލީޑިންގ ޑެސްޓިނޭޝަން 2026،
- އިންޑިއަން އޯޝަންސް ލީޑިންގ ޑައިވް ޑެސްޓިނޭޝަން 2026،
- އިންޑިއަން އޯޝަންސް ލީޑިންގ ގްރީން ޑެސްޓިނޭޝަން 2026،
- އިންޑިއަން އޯޝަންސް ލީޑިންގ ހަނީމޫން ޑެސްޓިނޭޝަން 2026
- އިންޑިއަން އޯޝަންސް ލީޑިންގ ޓޫރިސްޓް ބޯޑު 2026 ލިބިފައި ވެއެވެ.
ދުނިޔޭގެ 40 އަށްވުރެ ގިނަ ގައުމުގެ ފަތުރުވެރިކަމުގެ ދާއިރާގެ އިސްވެރިންނާއި، ޓޫރިސްޓް ބޯޑުތައް، ހޮޓާތަކާއި ރިސޯޓްތައް، އެއާލައިންތައް އަދި ބައިނަލްއަގުވާމީ މީޑިއާ ބައިވެރިވި މި ގާލާ ރަސްމިއްޔާތަކީ ދިވެހިރާއްޖޭގެ ފަތުރުވެރިކަން ދުނިޔޭގެ މައިދާނުގައި އިޝްތިހާރު ކުރުމަށް ލިބުނު ވަރަށް ޚާއްސަ ފުރުސަތެކެވެ.
މުޅި ސިނާއަތުގެ ސަރަހައްދީ މުހިންމު ފަރާތްތައް އެއްތަނަކަށް އެއްވި މި ހަފުލާގައި ރާއްޖޭގެ 15 އަށްވުރެ ގިނަ ފަތުރުވެރިކަމުގެ ބްރޭންޑްތަކުން ވަނީ އެކި ދާއިރާތަކުން އެވޯޑުތައް ހާސިލުކޮށްފައެވެ.
ރަސްމިއްޔާތުގައި ވާހަކަފުޅު ދައްކަވަމުން މިނިސްޓަރ އޮފް ޓޫރިޒަމް އެންޑް ސިވިލް އޭވިއޭޝަން ވަނީ ރާއްޖެ އިޝްތިހާރު ކުރުމުގައި ވިޒިޓް މޯލްޑިވްސްއިން ކުރަމުންދާ މަސައްކަތްތަކަށް ތައުރީފް ކުރައްވާފައެވެ. އަދި ދެމެހެއްޓެނިވި ފަތުރުވެރިކަމުގެ މުހިންމުކަމުގެ މައްޗަށް އަލިއަޅުއްވާލައްވަމުން، 1972 ވަނަ އަހަރު އެންމެ ދެ ރިސޯޓާއެކު ފެށުނު ރާއްޖޭގެ ފަތުރުވެރިކަން މިއަދު މިވަނީ ދުނިޔޭގެ އެންމެ ކާމިޔާބު އެއް ވާހަކައަށް ވެފައި ކަމަށް މިނިސްޓަރ ވިދާޅުވިއެވެ.
މި ކާމިޔާބީއާ ގުޅިގެން ވިޒިޓް މޯލްޑިވްސްގެ ސީއީއޯ އަދި މެނޭޖިންގ ޑައިރެކްޓަރ ވިދާޅުވީ، މިއީ ދިވެހި ފަތުރުވެރިކަމުގެ ވަރުގަދަކަމާއި މުއްސަނދިކަން ރަމްޒުކޮށްދޭ ކަމެއް ކަމަށެވެ. އަދި މިއީ ދުނިޔޭގެ ފަތުރުވެރިންނަށް ރާއްޖެއިން ފޯރުކޮށްދޭ ފެންވަރު ރަނގަޅު ހިދުމަތްތަކާއި ތަފާތު ތަޖުރިބާތަކުގެ ނަތީޖާ ކަމަށްވެސް އޭނާ ފާހަގަކުރެއްވިއެވެ.
މި ހަފުލާގައި ވޯލްޑް ޓްރެވަލް އެވޯޑްސްގެ ފައުންޑަރ އަދި ޕްރެޒިޑެންޓް ގްރެހަމް ކުކްއާއި، މިނިސްޓަރ އޮފް ޓޫރިޒަމް އެންޑް ސިވިލް އޭވިއޭޝަން އަދި ފަތުރުވެރިކަމުގެ ދާއިރާގެ އިސްވެރިން ބައިވެރިވެވަޑައިގެންނެވިއެވެ.
2020 އިން ފެށިގެން 2025 އަށް ޖެހިޖެހިގެން 6 އަހަރު ދުނިޔޭގެ އެންމެ ކުރިއަރާފައިވާ މަންޒިލްގެ މަގާމު ހޯދާފައިވާ ރާއްޖެއިން ވަނީ 1993 ގައި ތައާރަފުކުރި މި ޝަރަފުވެރި އެވޯޑްސްގައި ދުނިޔޭގެ ފެންވަރުގައިވެސް ކުރިން އެތައް ކާމިޔާބީއެއް ހޯދާފައެވެ.
