ޓޫރިޒަމް ވިޔަފާރިތަކުން ޓެކްސް ނަގާ އުސޫލަށް ގެނެވުނު ބަދަލުތަކާއެކު، ރާއްޖޭގެ ޓޫރިޒަމް ޕްރޮޑަކްޓުތައް ވިއްކާ ބޭރުގެ ވިޔަފާރިތަކުންވެސް ޓީޖީއެސްޓީ ދައްކަންޖެހޭ ގޮތަށް ހަމަޖެއްސުމުން، އެ ބަދަލުތަކުން ރަޝިޔާގެ ޓުއާ އޮޕަރޭޓަރުންނާއި ޓްރެވަލް އެޖެންސީތައް އިސްތިސްނާކޮށްދިނުމަށް ރަޝިޔާ ޓްރެވަލް ޔޫނިއަން (އާރުއެސްޓީ) އިން ދިވެހި ސަރުކާރުގައި އެދިއްޖެއެވެ.
ރާއްޖެއަށް އެންމެ ގިނައިން ފަތުރުވެރިން އަންނަ އެއް ގައުމު ކަމަށްވާ ރަޝިޔާގެ ހޮޓެލް ޗެއިންތައް ހިމެނޭހެން ފަތުރުވެރިކަމުގެ ސިނާއަތުގެ 3،000 އަށްވުރެ ގިނަ ވިޔަފާރި ތަމްސީލުކުރާ އާރުއެސްޓީން މިކަމަށް އެދިފައިވަނީ ޓޫރިޒަމް މިނިސްޓަރު މުހައްމަދު އަމީންއަށް އެޑްރެސްކޮށް ފޮނުއްވި ސިޓީއެއްގައެވެ.
އާރުއެސްޓީގެ ސިޓީގައި ފާހަގަކޮށްފައިވާ ގޮތުގައި، އެ ޖަމިއްޔާގެ އެންމެ ބޮޑު ކަންބޮޑުވުމަކީ ރާއްޖޭގެ ޕްރޮޑަކްޓުތައް ބޭރުގެ މާކެޓުތަކުގައި ވިއްކާއިރު ނަގާ އިތުރު އަގުން ރާއްޖެއަށް ޓެކްސް ދައްކަންޖެހުމެވެ. އެ ޖަމިއްޔާއިން ގަބޫލުކުރާ ގޮތުގައި މީގެ މާނައަކީ ރަޝިޔާގެ އެތެރޭގައި ހިންގާ ވިޔަފާރި މުއާމަލާތްތަކުން ރާއްޖޭގެ ޓެކްސް އިދާރާއަށް ފައިސާ ދައްކަންޖެހުމެވެ. އަދި މިއީ ގާނޫނީ ގޮތުންނާއި އަމަލީ ގޮތުންވެސް ތަންފީޒުކުރެވޭނެ އުސޫލެއް ނޫން ކަމަށް އެ ޖަމިއްޔާއިން ބުނެފައިވެއެވެ.
އާރުއެސްޓީން ބުނީ ރާއްޖޭގެ ޕްރޮޑަކްޓުތައް ގަންނަނީ ރާއްޖޭގައި ނަގާ އެންމެހައި ޓެކްސްތަކާއި ފީތައް ހިމަނައިގެން ކަމަށެވެ. މީގެއިތުރުން، އެ ތަކެތި ރަޝިޔާގައި ރީޑިސްޓްރިބިއުޓްކޮށް ވިއްކާއިރު ލިބޭ ފައިދާއަކީ އެ ކުންފުނިތަކުގެ އަމިއްލަ ވިޔަފާރި ހަރަކާތްތައް ކަމަށާއި، އެ މުއާމަލާތްތައް ބަލަހައްޓަނީ ރަޝިޔާގެ ޓެކުހާއި އެކައުންޓިން ގާނޫނުތަކުގެ ދަށުން ކަމަށް ސިޓީގައި ބަޔާންކޮށްފައިވެއެވެ. އެގޮތުން "ޔުނިފައިޑް އިންފޮމޭޝަން ސިސްޓަމް އޮފް އިލެކްޓްރޯނިކް ވައުޗާސް" މެދުވެރިކޮށް، ވިއްކުނު ޕްރޮޑަކްޓުތަކުގެ ޖުމްލަ އަގުގެ ރިޕޯޓުތައް ރަޝިޔާގެ ކަމާބެހޭ އިދާރާތަކަށް ހުށަހަޅަންޖެހޭ ކަންވެސް އެ ފަރާތުން ފާހަގަކުރެއެވެ.
"މިފަދަ ޓެކްސެއް ފުރިހަމައަށް ތަންފީޒުކުރުމަށްޓަކައި، ރަޝިޔާގެ ތެރޭގައި ހިންގާ މުއާމަލާތްތަކާ ގުޅިގެން ރަޝިޔާގެ ކުންފުނިތަކުން ހަދާފައިވާ އެއްބަސްވުންތަކާއި، ހަރަދުތަކާއި، ފައިސާ ދެއްކި ލިޔެކިޔުންތަކާއި، އަދި މާލީ ލިޔެކިޔުންތައް ރާއްޖޭގެ ޓެކްސް އިދާރާތަކުން ހޯދައި، އެ ތަކެތި ސައްހަކަން ކަށަވަރުކުރަންޖެހޭނެ. ރަޝިޔާގެ އެތެރޭގެ ވިޔަފާރީގެ ހަރަކާތްތަކުގެ މައްޗަށް މިފަދަ ބޭރުގެ ޓެކްސް ކޮންޓްރޯލެއް ފޯރުވޭނެ އަމަލީ އެއްވެސް ނިޒާމެއް ނެތް،" އާރުއެސްޓީގެ ސިޓީގައި ބުނެފައިވެއެވެ.
މި ކަންކަމަށް ރިއާޔަތްކޮށް، "ޑެސްޓިނޭޝަން ޕްރިންސިޕަލް" އުސޫލުން ޓެކްސް ނެގުމުން ރަޝިޔާގެ ވިޔަފާރިތައް އިސްތިސްނާކޮށްދިނުމަށާއި، އާ އުސޫލުތަކަށް އަމަލުކުރަން ފެށުމުގެ ކުރިން އެކުލަވާލާފައިވާ އެއްބަސްވުންތަކަށް މި ބަދަލު ނުހިންގުމަށް އާރުއެސްޓީން ވަނީ އެދިފައެވެ. އަދި ރަޝިޔާ މަސްރަހަކީ ރާއްޖޭގެ ފަތުރުވެރިކަމަށް މުހިންމު މައިދާނެއްކަން ފާހަގަކޮށް، އާ އުސޫލުތައް ހިންގުމުގެ ކުރިން ދިވެހި ސަރުކާރުން އެކަށީގެންވާ ހައްލެއް ހޯދައިދިނުމަށް ވަނީ ގޮވާލާފައެވެ.
ރަޝިޔާގެ އިތުރުން ހުޅަނގު ޔޫރަޕުގެ ގައުމުތަކުގެ ޓްރެވަލް ޔޫނިއަންތަކުންނާއި ނިއުދިއްލީ އަދި އިންޑިއާގެ ޓްރެވަލް އެސޯސިއޭޝަންތަކުންވެސް ވަނީ ކަންބޮޑުވުން ފާޅުކޮށްފައެވެ. އަދި މި ބަދަލާ ދެކޮޅުެހެދުމުގެ ގޮތުން އިޓަލީގެ ބައެއް އޭޖެންސީތަކުން މިހާރު ވަނީ ރާއްޖޭގެ ޓޫރިޒަމް ޕެކޭޖްތައް ވިއްކުން ވަގުތީގޮތުން ހުއްޓާލާފައެވެ.
