ނޭޕާލްގެ ފުޓްބޯޅައިގެ ކަންކަމުގެ ތެރެއަށް ސަރުކާރުން ނުވަތަ ބޭރުގެ ތިންވަނަ ފަރާތަކުން ނުފޫޒު ފޯރުވާފައިވާތީ، ދުނިޔޭގެ ފުޓްބޯޅައިގެ މައި އިދާރާ 'ފީފާ' އިން ނޭޕާލްގެ ފުޓްބޯޅަ އެސޯސިއޭޝަން އެންފާ ސަސްޕެންޑްކޮށްފިއެވެ. މި ފިޔަވަޅާއެކު، ނޭޕާލްގެ އެއްވެސް ޓީމަކަށް ބައިނަލްއަޤްވާމީ އެއްވެސް މުބާރާތެއްގައި މިހާރު ބައިވެރިއެއް ނުވެވޭނެއެވެ.
ފީފާއިން ނެރުނު ބަޔާނެއްގައި ބުނެފައިވަނީ، މި ފިޔަވަޅު އެޅީ ނޭޕާލްގެ ނޭޝަނަލް ސްޕޯޓްސް ކައުންސިލުން ފުޓްބޯޅަ އެސޯސިއޭޝަންގެ ކަންކަމުގެ ތެރެއަށް "ނޭދެވޭ ނުފޫޒު ފޯރުވާތީ" ކަމަށެވެ. ފީފާގެ ޤަވައިދު ބުނާ ގޮތުން، ކޮންމެ ޤައުމެއްގެ ފުޓްބޯޅަ އެސޯސިއޭޝަނެއް ވެސް ހިނގަންވާނީ އެ ޤައުމެއްގެ ސަރުކާރުގެ ނުފޫޒެއް ނެތި، މިނިވަންކަމާއެކުގައެވެ.
މި މައްސަލަ ހޫނުވެފައިވަނީ ނޭޕާލްގެ ފުޓްބޯޅަ އެސޯސިއޭޝަންގެ އިންތިޚާބުތަކާއި، އެސޯސިއޭޝަންގެ ޤާނޫނުތަކަށް ބަދަލު ގެނައުމާ ގުޅޭގޮތުން ނޭޝަނަލް ސްޕޯޓްސް ކައުންސިލާ ދެމެދު އުފެދުނު ޚިޔާލުތަފާތުވުންތަކުގެ ސަބަބުންނެވެ. މި އަހަރުގެ މާރޗް މަހު އެ ކައުންސިލުން އެންފާ ތިން މަސް ދުވަހަށް ސަސްޕެންޑް ކޮށްފައިވެސް ވެއެވެ.
އަންފާގެ ތަރުޖަމާނު ސުރޭޝް ޝާހު ވިދާޅުވީ، މިއީ ނޭޕާލްގެ ފުޓްބޯޅައަށް ލިބުނު ވަރަށް ބޮޑު ހިތާމައެއް ކަމަށާއި، މި މައްސަލަ ހައްލުކޮށް ސަސްޕެންޝަން އުވާލުމަށް މަސައްކަތް ކުރަމުންދާ ކަމަށެވެ.
ފީފާއިން ބުނާ ގޮތުގައި، ސްޕޯޓްސް ކައުންސިލުން މާރިޗު މަހު ނިންމި ނިންމުންތައް ބާތިލުކޮށް، އެންފާގެ އިންތިޚާބީ މަރުހަލާ ފުރިހަމަ ކުރުމުގެ ފުރުސަތު ދީފިނަމަ ސަސްޕެންޝަން އުވާލާނެއެވެ. ސްޕޯޓްސް ކައުންސިލުން ބުނީ މިކަމަކީ ސަރުކާރުން އެދޭ ގޮތެއް ނޫން ކަމަށާއި، މި މައްސަލައަށް ހައްލެއް ހޯދުމަށް މަސައްކަތް ކުރަމުންދާ ކަމަށެވެ.
