އިނގިރޭސިވިލާތް އަލުން އޫރޫޕިއަން ޔޫނިއަން (އީޔޫ) އާ ގުޅުމުގެ ފުރުޞަތު އޮތް ކަމަށް ދެކެވޭ ވާހަކަތަކަށް ސްޕޭންގެ ބޮޑުވަޒީރު ޕެޑްރޯ ސާންޗޭޒް އާއި ފްރާންސްގެ ރައީސް އިމެނުއެލް މެކްރޮން މަރުޙަބާ ވިދާޅުވެއްޖެއެވެ.
އިނގިރޭސި ބޮޑު ވަޒީރު އޭންޑީ ބަރންހަމް ދެއްވި އިންޓަވިއުއެއްގައި، އިނގިރޭސިވިލާތް އަލުން އީޔޫއާ ގުޅުމުގެ ފުރުސަތު އޮތް ކަމަށް ވިދާޅުވުމާ ގުޅިގެން، ރައީސް މެކްރޮން ވަނީ އެއީ "އުފާވެރި ޚަބަރެއް" އަދި "ރަނގަޅު ނިންމުމެއް" ކަމަށް ސިފަކުރައްވާފައެވެ. އަދި ސްޕޭންގެ ބޮޑުވަޒީރު ސާންޗޭޒް ވިދާޅުވީ އިނގިރޭސިވިލާތަށް އީޔޫއިން މަރުޙަބާ ކިޔާނީ އުފަލާއެކު ކަމަށެވެ.
މެކްރޮން ސްޕޭނަށް ކުރެއްވި ރަސްމީ ދަތުރުފުޅަށްފަހު، ދެ ޤައުމުގެ ވެރިން ވަނީ އަންނަ އަހަރު ބާއްވާ އިންތިޚާބުތަކުގައި ކަނާތުފިޔައިގެ ހައްދުފަހަނައެޅި ފަރާތްތަކުން ކުރިއެރުން ހޯދާފާނެ ކަމުގެ ބިރު އޮތް ދަނޑިވަޅެއްގައި، އޫރޫޕާގެ އިޤްތިޞާދީ އަދި ސިޔާސީ ނިޒާމު ހިމާޔަތްކުރުމަށް އެކުގައި މަސައްކަތްކުރަން އެއްބަސްވެފައެވެ.
އޮކްޓޯބަރު މަހު ބާއްވާ އީޔޫގެ ބަޖެޓު މަޝްވަރާތަކުގެ ކުރިން، ކުދި އަދި މެދުފަންތީގެ ޤައުމުތަކާއި ދަނޑުވެރިންނަށް ދޭ މާލީ އެހީ ކުޑަނުކުރުމަށާއި، ބަޖެޓުގެ މައްސަލައިގައި ބްރަސަލްސްއިން ލުއިގޮތްތަކެއް ހޯދައިދިނުމަށް ދެ ބޭފުޅުން ވަނީ ގޮވާލައްވާފައެވެ. ޖަރުމަނާއި ނެދަރލޭންޑްސް ފަދަ ޤައުމުތަކުން ބަޖެޓު ކުޑަކުރަން ބާރުއަޅަމުންދާތީ، އޭގެ އަސަރު ދަނޑުވެރިންނަށް ކޮށްފާނެތީ ދެ ޤައުމުންވެސް ވަނީ ކަންބޮޑުވުން ފާޅުކޮށްފައެވެ.
އޭގެ އިތުރުން، ޗައިނާގެ ވިޔަފާރި ވާދަވެރިކަމުން ޔޫރަޕްގެ އުފެއްދުންތެރިކަން، ޚާއްސަކޮށް ކާރު އުފައްދާ ސިނާއަތްތައް ހިމާޔަތްކުރުމަށްޓަކައި، ޗައިނާގެ އިންވެސްޓަރުން އޫރޫޕާގައި އިންވެސްޓްކުރާއިރު ޓެކްނޮލޮޖީ ހިއްސާކުރުމުގެ ޝަރުޠުތައް ކަނޑައެޅުމުގެ މުހިންމުކަން ދެ ލީޑަރުންވެސް ފާހަގަކުރެއްވިއެވެ.
"ޔޫރަޕްގެ ޤައުމުތައް އެކުވެރިވެގެން ނުތިބެއްޖެނަމަ، ނޭދެވޭ ވާދަވެރިކަމުގެ ކުރިމަތީގައި ކާމިޔާބު ހޯދުމުގެ އެއްވެސް ފުރުޞަތެއް ނޯންނާނެ،" ރައީސް މެކްރޮން ވިދާޅުވިއެވެ.
