ޖަރުމަނުގެ ވިޔަފާރިތަކަށް އަމާޒުކޮށްގެން ޗައިނާއިން ނުފޫޒު ފޯރުވަމުންދާ މިންވަރު އިތުރުވަމުންދާތީ، އެ ޤައުމުގެ ވިޔަފާރިވެރިންނާއި ސިޔާސީ ފަންތިން ކަންބޮޑުވުން ފާޅުކުރަން ފަށައިފިއެވެ. ބައިނަލްއަޤުވާމީ މައިދާނުގައި އިޤްތިޞާދީ ގޮތުން ދުނިޔޭގެ ބާރުތަކުގެ މެދުގައި ވާދަވެރިކަން ބޮޑުވެފައިވާ މި ދަނޑިވަޅުގައި، ޗައިނާގެ ފަރާތުން ޖަރުމަނުގެ ކުންފުނިތަކަށް ކުރިމަތިވަމުންދާ ގޮންޖެހުންތަކަކީ ޔޫރަޕްގެ އިޤްތިޞާދަށް ކުރިމަތިވެފައިވާ ބޮޑު ގޮންޖެހުމެއްގެ ގޮތުގައި ޖަރުމަނުން ސިފަކުރެއެވެ.
ފާއިތުވެދިޔަ އަހަރުތަކުގައި ޗައިނާއަކީ ޖަރުމަނުގެ އެންމެ ބޮޑު އެއް ވިޔަފާރި ބައިވެރިޔާ އެވެ. ނަމަވެސް، ދެ ޤައުމުގެ އިޤްތިޞާދީ ގުޅުމުގެ ތެރެއިން ސިޔާސީ ނުފޫޒު ފޯރުވުމުގެ މައްސަލަތާ ހެދި ނުތަނަވަސްކަން އިތުރުވެފައިވާކަން ފާހަގަކުރެވެއެވެ. ޖަރުމަނުގެ މަޝްހޫރު ބޮޑެތި ކުންފުނިތަކުން ޗައިނާގެ މާކެޓަށް ބަރޯސާވެފައިވާ މިންވަރު ބޮޑުވެފައި ވެއެވެ. އެކަމުގެ ސަބަބުން، ބެއިޖިންގެ ފަރާތުން އެ ކުންފުނިތަކަށް އެކި ކަހަލަ ޕްރެޝަރުތައް ކުރިމަތިވަމުންދާ ކަމަށް ރިޕޯޓުތައް ބުނެއެވެ. މިފަދަ ޕްރެޝަރުތަކުގެ ސަބަބުން ޖަރުމަނުގެ ވިޔަފާރިތަކަށް މިނިވަންކަމާއެކު ވިޔަފާރީގެ ނިންމުންތައް ނިންމުމަށް ހުރަސްތަކެއް ކުރިމަތިވަމުންދާ ކަމަށް ވެސް ފާހަގަ ކޮށްފައި ވެއެވެ.
މި މައްސަލައާ ގުޅިގެން ޖަރުމަނުގެ ސަރުކާރާއި ވިޔަފާރިވެރިން ވަނީ މި މައްސަލަ ހައްލު ކުރާނެ ގޮތާމެދު މަޝްވަރާތައް ފަށާފައެވެ. ޚާއްސަކޮށް، ޤައުމީ ސަލާމަތަށް ނުރައްކާވެދާނެ ފަދަ ޙާލަތްތަކުގައި ޗައިނާއާ އެކު އޮންނަ ވިޔަފާރީގެ ގުޅުންތައް ކުޑަކުރުމަށާއި، އާ ސްޓްރެޓެޖީއެއްގެ ދަށުން އެހެނިހެން މާކެޓުތަކަށް އަމާޒުކުރުމަށް ޖަރުމަނުގެ ސިޔާސީ ލީޑަރުން ދަނީ ބާރުއަޅަމުން ނެވެ. ޖަރުމަނުގެ އިޤްތިޞާދީ މިނިވަންކަން ދެމެހެއްޓުމަށްޓަކައި އެއް ޤައުމަކަށް މާ ބޮޑަށް ބަރޯސާވެފައި އޮތް އޮތުން ނިމުމަކަށް ގެނައުމަކީ މިހާރު ކޮންމެހެން ކުރަންޖެހިފައިވާ ކަމެއް ކަމަށް މި މަޗްވަރާތަކުގައި ފާހަގަ ކުރަމުން ދެއެވެ.
ޔޫރަޕިއަން ޔޫނިއަން (އީޔޫ) ގެ ފަރާތުންވެސް އަންނަނީ ޗައިނާގެ އަމަލުތައް ގާތުން ބަލަމުންނެވެ. ޔޫރަޕްގެ ޤައުމުތަކުގެ ވިޔަފާރިތަކަށް ބޭރުގެ ޤައުމުތަކުން ނުފޫޒު ފޯރުވުން ހުއްޓުވުމަށްޓަކައި އާ ޤާނޫނީ އޮނިގަނޑުތަކެއް އެކުލަވާލަމުންދާ ކަމަށް އީޔޫގެ ޑިޕްލޮމެޓުން މަޢުލޫމާތުދެއެވެ.
