އިޓަލީގެ ސްކޫލްތަކުގައި މޫނުބުރުގާއާއި ހިޖާބު އެޅުން މަނާކުރުމާއެކު، އިޓަލީ ބަސް ނޭނގޭ ބޭރު ގައުމުތަކުގެ ދަރިވަރުންގެ އަދަދު ވަކި މިންވަރެއްގައި ހިފެހެއްޓުމަށް އެ ގައުމުގެ ކެބިނެޓުން ޚާއްސަ ގަރާރެއް ފާސްކޮށްފިއެވެ.
އިޓަލީގެ ބޮޑުވަޒީރު ޖޯޖިއާ މެލޯނީގެ ކެބިނެޓުން ބުރާސްފަތި ދުވަހު ފާސްކުރި މި ގަރާރުގެ ދަށުން، އިޓަލީ ބަހަށް އަހުލުވެރިކަން ކުޑަ ދަރިވަރުންގެ އަދަދު ކްލާހެއްގެ 30 އިންސައްތައަށް ވުރެ އިތުރެއް ނުކުރެވޭނެއެވެ. މީގެއިތުރުން، އިޓަލީ ބަސް އުނގަންނައިދިނުމަށް އިތުރު ވަސީލަތްތައް ގާއިމުކުރުމާއި، ކްލާސްރޫމްތަކުގައި މޫނުބުރުގާއާއި ހިޖާބު ބޭނުންކުރުން ވަނީ މަނާކޮށްފައެވެ.
މީސް މީޑިއާގައި ކުރެއްވި މެސެޖެއްގައި ބޮޑުވަޒީރު މެލޯނީ ވިދާޅުވީ، މިއީ ކުދިން މުޖުތަމައަށް އަހުލުވެރިކުރުވުމަށާއި ތައުލީމީ ފެންވަރު މަތިކުރުމަށް އެޅި މުހިންމު ފިޔަވަޅެއް ކަމަށެވެ. އަދި ޓީވީ އިންޓަވިއުއެއްގައި މެލޯނީ ވިދާޅުވީ، ސްކޫލްތަކުގައި މޫނުބުރުގާ މަނާކުރުމަކީ ރައްކާތެރިކަމާ ގުޅިފައިވާ ކަމެއް ކަމަށާއި، އަންހެނަކު ނުވަތަ ކުޑަކުއްޖަކު މޫނު ނިވާކުރަން މަޖުބޫރުކުރުމަކީ އެ ކުދިންގެ އަސާސީ ހައްގުތަކުން މަހުރޫމްކުރުން ކަމަށެވެ.
އާ ގަވާއިދުގެ ދަށުން، ސްކޫލްގެ މާހައުލަށް އަހުލުވެރިވުމުގައި ދަރިވަރަކަށް ބޮޑެތި ގޮންޖެހުންތަކެއް ކުރިމަތިވާނަމަ، އިޖުތިމާއީ ޚިދުމަތްތަކުން އެކަމުގެ ތެރެއަށް ވަންނާނެއެވެ. އަދި އެފަދަ ދަރިވަރުންގެ ބެލެނިވެރިން ހިލޭ ހިންގާ އިޓަލީ ބަހުގެ ކޯސްތަކުގައި ބައިވެރިވުން ވަނީ މަޖުބޫރުކޮށްފައެވެ. މި ކޯސްތަކުގައި ބައިވެރިނުވާ ބެލެނިވެރިން 1،000 ޔޫރޯ އިން ޖޫރިމަނާކުރެވޭނެއެވެ.
އިޓަލީގެ އެޑިއުކޭޝަން މިނިސްޓަރު ޖުސެއްޕޭ ވަލްދިތާރާ ވިދާޅުވި ގޮތުގައި، އިޓަލީގައި 34،000 އަށް ވުރެ ގިނަ ކްލާސްރޫމްގައި ބޭރު ދަރިވަރުންގެ ނިސްބަތް 30 އިންސައްތައަށް ވުރެ މަތީގައި އެބައުޅެއެވެ. ނަމަވެސް، އާ ގަވާއިދުގެ އަސަރު ބޮޑަށް ކުރާނީ އަލަށް އިޓަލީއަށް އެތެރެވާ ކުދިންނަށް ކަމަށާއި، އިޓަލީއަށް އުފަންވެފައިވާ ނުވަތަ ޕްރީ-ސްކޫލް ނިންމާފައިވާ ދަރިވަރުންނަށް މީގެ އަސަރު ނުކުރާނެ ކަމަށް އޭނާ ވިދާޅުވިއެވެ.
މި ނިންމުމާ ގުޅިގެން އިދިކޮޅު ފަރާތްތަކުންނާއި ޖަމިއްޔާތަކުން ދަނީ ކަންބޮޑުވުން ފާޅުކުރަމުންނެވެ. އިދިކޮޅު ލީޑަރު އެލީ ޝްލެއިން ވަނީ މިއީ ކުޑަކުދިންނާ ދެކޮޅަށް ސަރުކާރުން ހިންގާ ސިޔާސީ އަމަލެއް ކަމަށް ސިފަކުރައްވާފައެވެ. އަދި 'ސޭވް ދަ ޗިލްޑްރަން' ޖަމިއްޔާއިން އިންޒާރު ދީފައިވަނީ، ދަރިވަރުންގެ ނަސްލަށް ނުވަތަ ބަހުގެ ފެންވަރަށް ބަލައި ސްކޫލްތައް ބަދަލުކުރަން މަޖުބޫރުކުރުމަކީ ތައުލީމީ ނިޒާމުގެ ތެރޭގައި ތަފާތުކުރުންތައް އުފެދިގެންދާނެ ކަމެއް ކަމަށެވެ.
އަންނަ އަހަރު އިޓަލީގައި ބޭއްވުމަށް ހަމަޖެހިފައިވާ އާންމު އިންތިޚާބު ކައިރިވަމުންދާއިރު، ބޭރު ގައުމުތަކުން އެތެރެވާ މީހުން މުޖުތަމައަށް އަހުލުވެރިކުރުމުގެ މައްސަލައަކީ އިޓަލީގެ ސިޔާސީ މައިދާނުގައި އެންމެ ބޮޑަށް ބަހުސްކުރެވެމުންދާ އެއް މައްސަލައެވެ.
