ފޮޓޯ: ޓެސްލާ
ފޮޓޯ: ޓެސްލާ

ހުންގާނާއި ފައިން ފިއްތާ ބުރަކި ނުހުންނަ ޓެސްލާގެ ކާރުތައް ޖަރުމަނުވިލާތުގައި އުފައްދަނީ

އެމެރިކާގެ ވަކި ޚާއްސަ ކަސްޓަމަރުންތަކަކަށް ޑްރައިވަރަކާ ނުލައި އަމިއްލައަށް ދުވާ "ސައިބަރކެބް" ކާރަށް އޯޑަރު ދިނުމުގެ ފުރުޞަތު ހުޅުވާލިތާ މަދު ދުވަސްކޮޅެއްގެ ތެރޭގައި، އެމެރިކާއިން ބޭރުގައި އެ އުޅަނދު އުފައްދާ މައި މަރުކަޒަކީ ޖަރުމަނުވިލާތުގައި ހުންނަ އެ ކުންފުނީގެ ކާރުޚާނާ ކަމަށް ޓެސްލާއިން އިޢުލާނުކޮށްފިއެވެ. ޖަރުމަނުވިލާތުގެ ވެރިރަށް ބަރލިންގެ ބޭރުގައި އޮންނަ ގްރޫންހައިޑް ސަރަޙައްދުގައި ހުންނަ ޓެސްލާގެ ކާރުޚާނާގައި އަހަރަކު އެއް މިލިއަން ސައިބަރކެބް އުފެއްދުމަށް އެ ކުންފުނިން ވަނީ އަމާޒު ހިފާފައެވެ.

ތިން ބިލިއަން ޔޫރޯ (ގާތްގަނޑަކަށް 3.3 ބިލިއަން ޑޮލަރު) ގެ ބޮޑު އިންވެސްޓްމަންޓަކާއެކު ކުރިއަށްގެންދާ މި މަޝްރޫޢުގެ ދަށުން، އެ ކާރުޚާނާގައި އައު ޕްރޮޑަކްޝަން ލައިންތަކެއް ޤާއިމުކުރާނެއެވެ. މި އައު ބައިގެ ޢަމަލީ މަސައްކަތް 2027 ވަނަ އަހަރުގެ ފުރަތަމަ ހަމަސްދުވަހުގެ ތެރޭގައި ފަށައި، 2029 ވަނަ އަހަރުގެ ތެރޭގައި ކާރު އުފައްދަން ފަށާނެ ކަމަށް ޓެސްލާއިން ހާމަކުރެއެވެ. މިއީ އާދައިގެ ކާރުތަކުގައި ޑްރައިވަރުންނަށް އެހީތެރިވެދޭ ޓެކްނޮލޮޖީ ތަރައްޤީކުރުމުގެ ބަދަލުގައި، މުޅިން އަލަށް އިންސާނަކާ ނުލައި ދުވާނެ އުޅަނދުތައް އުފެއްދުމަށް ޓެސްލާއިން ގެންގުޅޭ ސްޓްރެޓެޖީއަށް އައި ބޮޑު ބަދަލެއް ހާމަކޮށްދޭ ނިންމުމެކެވެ.

ފޮޓޯ: ޓެސްލާ

އެންމެ ފުރަތަމަ 2024 ވަނަ އަހަރުގެ އޮކްޓޫބަރު މަހު އެމެރިކާގެ ކެލިފޯނިއާގައި ދައްކާލި ސައިބަރކެބް އަކީ ޓެސްލާގެ އެހެން ކާރުތަކާ މުޅިން ތަފާތު ފަރުމާއަކަށް ތައްޔާރުކޮށްފައިވާ އުޅަނދެކެވެ. މި ކާރުގެ އެތެރޭގައި ހުންނާނީ އެންމެ ދެ ގޮނޑިއާއި، ދަތުރުގެ މަޢުލޫމާތު ބެލުމަށާއި ކާރުގެ އެކި ކަންކަން ކޮންޓްރޯލް ކުރުމަށް ހުންނަ ބޮޑު ސްކްރީނެއް އެކަންޏެވެ. އާދައިގެ ކާރުތަކުގައި ހުންނަ ހުންގާނާއި، އެކްސެލެރޭޓަރު އަދި ބުރަކި ފިއްތާ ޕެޑަލްތައް މި ކާރުގައި މުޅިން އުނިކޮށްފައިވެއެވެ.

މީގެ އިތުރުން، ވައިގެ ދައުރު ކުރުމަށް ފަސޭހަވާނެހެން މައްޗަށް ހުޅުވޭ ދޮރުތަކާއެކު ފަރުމާކޮށްފައިވާ މި ކާރަކީ، އިންސާނެއްގެ އެހީއަކާ ނުލައި ވަޔަރލެސްކޮށް އަމިއްލައަށް ޗާޖުކުރެވޭ ގޮތަށް ތައްޔާރުކޮށްފައިވާ އުޅަނދެކެވެ. ކާރު ދުއްވުމުގައި މަގުމަތީގެ ޓްރެފިކް ނިޝާންތަކާއި، އެހެން އުޅަނދުތަކާއި ހިނގާބިނގާވެ އުޅޭ މީހުން ދެނެގަންނަނީ ކާރުގައި ހަރުކޮށްފައިވާ ކެމެރާތަކާއި އާޓިފިޝަލް އިންޓެލިޖެންސް ސޮފްޓްވެއަރގެ އެހީގައެވެ.

ފުރަތަމަ ޓެކްސީގެ ޚިދުމަތަށް ޚާއްސަކޮށްގެން ތަޢާރަފުކުރި ނަމަވެސް، މި ނޮވެމްބަރު މަހުގެ 13 ވަނަ ދުވަހު ޓެސްލާއިން ވަނީ އެމެރިކާގެ ބައެއް ކަސްޓަމަރުންނަށް އަމިއްލަ ބޭނުމަށް ސައިބަރކެބް ގަތުމުގެ ފުރުޞަތު ހުޅުވާލާފައެވެ.

ޓެކްސްއާ ނުލައި 29,990 ޑޮލަރަށް ވިއްކާ މި ކާރު ބޭނުންކުރުމަށްޓަކައި، އަމިއްލައަށް ދުއްވާ ނިޒާމު ހިންގުމަށް މަހަކު 299 ޑޮލަރުގެ ސަބްސްކްރިޕްޝަން ފީއެއް ދައްކަންޖެހެއެވެ. އަދި ކާރު ބޭނުންކުރެވޭނީ ޓެސްލާގެ އޮޓޮނޮމަސް ޚިދުމަތް ރަސްމީކޮށް ލިބެން ހުންނަ ވަކި ސަރަޙައްދުތަކެއްގައި އެކަންޏެވެ. އަތުން ދުއްވާނެ އެއްވެސް ވަސީލަތެއް ނެތުމުން، ހުއްދަ އޮންނަ ސަރަޙައްދުން ބޭރަށް ކާރު ދިޔަނަމަވެސް ވެރިފަރާތަށް ކާރު ދުއްވުމުގެ ފުރުޞަތެއް ނޯންނާނެއެވެ.

2026 ވަނަ އަހަރު އެމެރިކާގެ ޓެކްސަސްގައި ހުންނަ ގިގަފެކްޓްރީގައި ސައިބަރކެބް އުފައްދަން ފެށުމަށްފަހު، ޖަރުމަނުވިލާތަށް މި މަސައްކަތް ފުޅާކުރުމަކީ ޔޫރަޕުގެ ބާޒާރަށް ނުކުތުމަށް ޓެސްލާއިން އެޅި ބޮޑު ފިޔަވަޅެކެވެ.

2022 ވަނަ އަހަރުގެ މާރިޗު މަހު ހުޅުވި ގްރޫންހައިޑް ކާރުޚާނާގައި މިހާރު އުފައްދަނީ "މޮޑެލް ވައި" ކާރު އެކަންޏެވެ. އައު މަޝްރޫޢުގެ އަމާޒަށް ވާސިލުވެވިއްޖެ ނަމަ، އަހަރަކު އުފައްދާ ކާރުގެ އަދަދަށް ބަލާއިރު، ވޮލްފްސްބާގްގައި ހުންނަ ވޮލްކްސްވެގަންގެ މައި ކާރުޚާނާއަށްވުރެ ގްރޫންހައިޑް ކާރުޚާނާ އުފެއްދުން ކުރިއަރައިގެންދާނެއެވެ.

މި ނިންމުމާއެކު، އެމެރިކާގެ ވޭމޯ އަދި ޗައިނާގެ ޕޯނީއޭއައި އާއި ބައިޑޫ ފަދަ ވާދަވެރި ކުންފުނިތަކާއެކު ޓެސްލާއިން ކުރާ ވާދަވެރިކަން ވަނީ އިތުރަށް ހޫނުވެފައެވެ. އެހެން ކުންފުނިތަކުން ކެމެރާގެ އިތުރުން ރާޑަރާއި ލައިޑާ ސެންސަރުތައް ބޭނުންކުރި ނަމަވެސް، ޓެސްލާއިން ބަރޯސާވަނީ ހަމައެކަނި ކެމެރާތަކަށެވެ.

މިއީ މޫސުން ގޯސް ވަގުތުތަކުގައްޔާއި އަދިރި މާޙައުލުތަކުގައި ކާރުގެ ރައްކާތެރިކަމާ މެދު ސުވާލު އުފެދޭ ކަމެކެވެ. މީގެ އިތުރުން، ޔޫރަޕިއަން ޔޫނިއަންގެ ޢާންމު މަގުތަކުގައި ޑްރައިވަރަކާ ނުލައި މި ކާރު ދުއްވުމުގެ ޤާނޫނީ ހުއްދަ އަދި ލިބިފައި ނުވާއިރު، ހުންގާނާއި ލޯގަނޑު ފަދަ ތަކެތި ނެތުމުން ރައްކާތެރިކަމުގެ މިންގަނޑުތަކަށް ފެތޭތޯ ބެލުމަށް އެމެރިކާގެ ކަމާބެހޭ އިދާރާތަކުން ވަނީ މިދިޔަ ސެޕްޓެމްބަރު މަހު ތަޙުޤީޤެއްވެސް ފަށާފައެވެ.

ޖަރުމަނުވިލާތުގައި އަހަރަކު އެއް މިލިއަން ކާރު އުފެއްދުމަށް ޓެސްލާއިން ތައްޔާރުވަމުން ދިޔަނަމަވެސް، މި އުޅަނދު ޢާންމު މަގުތަކަށް ނެރެވޭނީ ޤާނޫނީ ހުއްދަތަކާއި ރައްކާތެރިކަމުގެ ޔަޤީންކަން ކަށަވަރުކުރެވިގެންނެވެ.

ހިއްސާ ކުރައްވާ!