ވިލާތުގެ އިއްތިހާދުގެ ދިރާސާއާއި އީޖާދީ މަސައްކަތްތަކަށް ޚާއްސަ 93.5 ބިލިއަން ޔޫރޯގެ މާލީ ޕްރޮގްރާމް "ހޮރައިޒަން ޔޫރަޕް" ގައި އިންޑިއާ ބައިވެރިވުމާ ގުޅޭގޮތުން ކުރި މަޝްވަރާތައް ނިންމާލައިފިއެވެ.
އީޔޫ ކޮމިޝަނުން އިއުލާނުކުރި ގޮތުގައި، ދެފަރާތުން ސޮއިކޮށް ތަޞްދީޤުކުރުމަށްފަހު، މި އެއްބަސްވުމަށް އަމަލުކުރަން ފަށާނީ 2027 ވަނަ އަހަރުގެ ޖެނުއަރީ މަހުގެ ތެރޭގައެވެ. މިއީ އީޔޫ އާއި އިންޑިއާގެ ދެމެދުގައި އޮތް ސްޓްރެޓެޖީ އަދި ސައިންސްގެ ގުޅުން އިތުރަށް ވަރުގަދަވެގެންދާނެ ފިޔަވަޅެކެވެ.
މި އެއްބަސްވުމުގެ ދަށުން އިންޑިއާގެ ސައިންސްވެރިންނާއި، ދިރާސާކުރާ އިދާރާތަކާއި، އަދި ވިޔަފާރިތަކަށް ހޮރައިޒަން ޔޫރަޕްގެ "ޕިލާ 2″ ގެ ދަށުން ސީދާ މާލީ އެހީ ލިބި، ސައިންސްގެ ބޮޑެތި މަޝްރޫޢުތައް ހިންގުމުގެ ފުރުޞަތު ލިބޭނެއެވެ. މި ޕްރޮގްރާމަކީ ސިއްޙަތާއި، ޑިޖިޓަލް ޓެކްނޮލޮޖީ، ޖައްވީ ދިރާސާތައް، މޫސުމީ ބަދަލުތައް، ހަކަތަ އަދި ބައޯއިކޮނޮމީ ފަދަ މުހިންމު ދާއިރާތަކުން ދުނިޔެއަށް ކުރިމަތިވެފައިވާ ގޮންޖެހުންތަކަށް ހައްލު ހޯދުމަށް މާލީ އެހީތެރިކަން ފޯރުކޮށްދޭ ވަސީލަތެކެވެ.
އީޔޫގެ ކޮމިޝަނަރ ފޯ ސްޓާޓްއަޕްސް، ރިސާރޗް އެންޑް އިނޮވޭޝަން ކަޓެރީނާ ޒަހާރިއޭވާ ވަނީ މި ނިންމުމަށް މަރުޙަބާ ވިދާޅުވެ، މިއީ ދެފަރާތުގެ އިޤްތިޞާދަށާއި ސައިންސްގެ ގުޅުމުގެ ކުރިއެރުމަށް ލިބުނު ބޮޑު ކާމިޔާބީއެއްގެ ގޮތުގައި ސިފަކުރައްވާފައެވެ. ޒަހާރިއޭވާ ވިދާޅުވީ، މި އެއްބަސްވުމުގެ ސަބަބުން ވިލާތާއި އިންޑިއާގެ ވިޔަފާރިތަކަށް އާ ފުރުޞަތުތައް ހުޅުވި، މުސްތަޤުބަލުގެ ޓެކްނޮލޮޖީތައް ތަރައްޤީކުރުމުގައި ދެފަރާތް ބައިވެރިންގެ ގޮތުގައި މަސައްކަތްކުރުމަށް މަގުފަހިވެގެންދާނެ ކަމަށެވެ.
މި މަޝްވަރާތައް ފަށާފައިވަނީ 2026 ވަނަ އަހަރުގެ ފެބްރުއަރީ 6 ގައެވެ. މިއީ 2026 ވަނަ އަހަރުގެ ޖެނުއަރީ 27 ގައި ބޭއްވުނު އީޔޫ-އިންޑިއާ ސަމިޓް ގައި ކަނޑައެޅި 2030 ގެ ކޮމްޕްރިހެންސިވް ސްޓްރެޓެޖީ އެޖެންޑާގެ ދަށުން އެޅި ފިޔަވަޅެކެވެ. މީގެ އިތުރުން، އާޓިފިޝަލް އިންޓެލިޖެންސް، ސެމީކޮންޑަކްޓަރ، އަދި 6ޖީ ޓެކްނޮލޮޖީ ފަދަ ދާއިރާތަކުން ދެފަރާތުގެ ގުޅުން އަންނަނީ އިތުރަށް ފުޅާވަމުންނެވެ.
2021 އިން 2027 އަށް ކުރިއަށް ގެންދާ ހޮރައިޒަން ޔޫރަޕް ޕްރޮގްރާމްގައި އިނގިރޭސިވިލާތާއި، ކެނެޑާ، ޖަޕާން، ސައުތު ކޮރެއާ އަދި ސުވިޒަރލޭންޑް އާއެކު އީޔޫ ނޫން 23 ޤައުމަކުން މިހާރުވެސް ބައިވެރިވެއެވެ.
