ޔަހޫދީންގެ ގައުމުގެ އާންމު އިންތިޚާބުގެ ކެމްޕޭން ފޯރިއާއެކު ކުރިއަށްދަނިކޮށް، އިއްޔެ ދުބާއީން ތެލް އަވީވަށް ދަތުރުކުރި ފްލައި ޑުބާއީ ބޯޓުގެ ކޮކްޕިޓް ތެރޭގައި ހިންގި ހަމަނުޖެހުމުގެ ހާދިސާ، އިސްރާއީލުގެ ސިޔާސީ މަސްރަޙާއި ސެކިއުރިޓީ އިދާރާތަކުން ބޮޑު ސިޔާސީ ކާޑަކަށް ހަދައިފިއެވެ.
ޔަހޫދީންގެ ބޮޑުވަޒީރު ނަތަންޔާހޫ އަދި ދިފާއީ އިދާރާތަކުން މި ހާދިސާއަކީ "ޓެރަރިސްޓް ހަމަލާއެއް" ކަމަށް ސިފަކޮށް، ބޯޓު ސަލާމަތްކުރި އިންޑިއާގެ ކެޕްޓަން ހީރޯއެއްގެ ގޮތުގައި ސިފަކުރަމުން ދާއިރު، ކޮކްޕިޓް ތެރޭގައި އަސްލު ހިންގި ކަންތައްތަކާ މެދު އަދިވެސް ވަނީ އެތައް ސުވާލުތަކެއް އުފެދިފައެވެ.
އިސްރާއީލުގެ އޮފިޝަލުން ހާމަކުރި ގޮތުގައި، ދުބާއީން ފުރައިގެން ތެލް އަވީވަށް ދަތުރުކުރި ބޯޓުގެ ކޮކްޕިޓް ތެރޭގައި އޮމާންގެ ރައްޔިތެއް ކަމަށްވާ ކޯ-ޕައިލެޓް، އިންޑިއާގެ ކެޕްޓަނަށް ހަމަލާދީ ބޯޓު ވައްޓާލަން މަސައްކަތްކުރިއެވެ. ނަމަވެސް، ފްލައިޑުބާއީން ނެރުނު ބަޔާނުގައި ބުނެފައިވަނީ ކޮކްޕިޓް ތެރޭގައި "ހަމަނުޖެހުމެއް" ހިންގިކަން ކަށަވަރުވި ނަމަވެސް، އެކަން ހިންގަން މެދުވެރިވި ސަބަބާއި އަސްލު މަގުސަދަކީ ކޮބައިކަން އަދި ސާފުނުވާ ކަމަށާއި، އަވަސް އަރުވާލައިގެން ގޮތް ނުނިންމުމަށް އިލްތިމާސްކޮށްފައެވެ.
ސެކިއުރިޓީ އެއްބަސްވުމާ ހިލާފުވިކަމުގެ ތުހުމަތު
އިސްރާއީލުގެ ދާޚިލީ ސެކިއުރިޓީ އޭޖެންސީ (ޝިން ބެތު / ޝަބާކް) އާއި ފްލައިޑުބާއީއާ ދެމެދު ވެވިފައިވާ ޚާއްޞަ ސިއްރު ސެކިއުރިޓީ އެއްބަސްވުމެއްގެ ދަށުން، އިސްރާއީލަށް ދަތުރުކުރާ އެއާލައިންގެ ސައިޒާއި ކްރޫ މެންބަރުންނަކީ އިސްރާއީލާއެކު ސިޔާސީ ގުޅުން އޮންނަ ގައުމުތަކުގެ މީހުންނަށް ވާންޖެހެއެވެ.
އިސްރާއީލުގެ ކަމާބެހޭ ފަރާތްތަކުން ތުހުމަތުކުރާ ގޮތުގައި، އިސްރާއީލާއެކު ރަސްމީ ޑިޕްލޮމެޓިކް ގުޅުމެއް ނެތް އޮމާންގެ ރައްޔިތަކު ކޯ-ޕައިލެޓެއްގެ ގޮތުގައި އިސްރާއީލަށް ކުރާ ދަތުރެއްގައި ބޭނުންކުރުމަކީ ސެކިއުރިޓީ އެއްބަސްވުމާ ޚިލާފު އަމަލެކެވެ. މިއީ އެ ކޯ-ޕައިލެޓް އިސްރާއީލަށް ދަތުރުކުރި ފުރަތަމަ ފަހަރުކަންވެސް ވަނީ އެނގިފައެވެ.
ސިޔާސީ މައިދާނާއި ބައިނަލްއަގުވާމީ ރިއެކްޝަން
އިސްރާއީލުގެ އިންތިޚާބު ކައިރިވެފައިވަނިކޮށް ހިންގި މި ހާދިސާގެ ފުރިހަމަ ތަޙުޤީޤެއް ބޯޓު އިމަރޖެންސީކޮށް ޖެއްސި ސައޫދީ އަރަބިއްޔާގައި ހިނގަމުންދާއިރު، ބޮޑުވަޒީރު ނަތަންޔާހޫ ވަނީ މިއީ ގައުމީ ސެކިއުރިޓީއަށް އޮތް ބޮޑު ނުރައްކަލެއްގެ ގޮތުގައި ސިފަކޮށް ކެމްޕޭން ތެރޭގައި އެކަން ބޭނުންކުރަން ފަށާފައެވެ.
އެމެރިކާގެ ރައީސް ޑޮނަލްޑް ޓްރަންޕްވެސް ވަނީ އިންޑިއާގެ ކެޕްޓަން ދެއްކި ހިއްވަރަށް ތައުރީފުކުރައްވާފައެވެ. ޔަހޫދީންގެ މީޑިއާއިން އިންޑިއާގެ ކެޕްޓަނަކީ 174 ފުރާނަ ސަލާމަތްކުރި "ހީރޯ" އެއްގެ ގޮތުގައި ސިފަކުރަމުންދާއިރު، އިންޑިއާ އަދި އިސްރާއީލުގެ ނެރެޓިވްތަކުން މި ހާދިސާ ސިޔާސީގޮތުން ބޭނުންކުރަމުންދާ ކަމަށް މުޙައްލިލުން ބުނެއެވެ.
ނަމަވެސް، ކޮކްޕިޓް ތެރޭގައި ދެ ޕައިލެޓުންގެ މެދުގައި ހިންގީ ޒާތީ މައްސަލައެއް ކަމެއް، ނުވަތަ ސިޔާސީ/ޓެރަރިޒަމްގެ އަމަލެއް ކަމެއް އަދިވެސް މިވަނީ ސާފުނުވެއެވެ. ސައޫދީ އިދާރާތަކުން ހިންގާ ތަހުގީގުގެ ފުރިހަމަ ނަތީޖާ އަންނަންދެން، މި ހާދިސާގެ އަސްލު މަގުސަދާ މެދު ތަފާތު ސުވާލުތައް އުފައްދަމުން ދާނެއެވެ.
