ހުޅަނގު އައްސޭރީގައި ޣައިރުޤާނޫނީ ގޮތުގައި ޤާއިމުކޮށްފައިވާ އިސްރާއީލުގެ ޓެރަރިސްޓް ވަޒަންވެރިންގެ އުފެއްދުންތަކާ ދެކޮޅަށް ޔޫރަޕްގެ ޤައުމުތަކުން އަޅަމުންދާ ފިޔަވަޅުތައް އިތުރަށް ފުޅާ ކުރަން ފަށައިފިއެވެ. އިސްރާއީލުގެ މަސްއޫލުވެރިން ވަނީ މިއީ އެޤައުމާ ދެކޮޅަށް ފެށޭ ބޮޑު އިޤްތިޞާދީ އަދި ސިޔާސީ ފިޔަވަޅުތަކެއްގެ ފެށުން ކަމަށް ބުނެ ކަންބޮޑުވުން ފާޅުކޮށްފައެވެ.
އިސްރާއީލް މީޑިއާއިން ރިޕޯޓްކޮށްފައިވާ ގޮތުގައި، ސްޕޭން، އަޔަރލޭންޑް އަދި ނެދަރލޭންޑްސްއިން މިހާރުވެސް ވަނީ ޓެރަރިސްޓް ވަޒަންވެރިންގެ އުފެއްދުންތައް އެތެރެކުރުން މަނާކޮށްފައެވެ. އޭގެ އިތުރުން އިނގިރޭސިވިލާތާއި، ފްރާންސް އަދި ކެނެޑާއިން އެފަދަ ފިޔަވަޅުތަކެއް އެޅުމަށް ތައްޔާރުވަމުންދާއިރު، ބެލްޖިއަމް އާއި ނޯވޭއިން ދަނީ މިކަމާ ގުޅޭ ޤާނޫނުތައް ހެދުމުގެ މަސައްކަތް ވެސް ކުރަމުންނެވެ.
މި ފިޔަވަޅުތަކުގެ ތެރެއިން ނެދަރލޭންޑްސްގެ ފިޔަވަޅުތައް ވަކިން ޚާއްޞަކޮށް ހަރުކަށިއެވެ. ވޭތުވެދިޔަ ހަފުތާގައި އަމަލުކުރަން ފެށި އުޞޫލުގެ ދަށުން، ޓެރަރިސްޓް ވަޒަންވެރިންގެ އުފެއްދުންތައް އެތެރެކުރުމާއި ވިއްކުން މަނާކުރުމުގެ އިތުރުން، ޔަހޫދީ ދަތުރުވެރިންގެ އަމިއްލަ ފޮށިތަކުގައި ހުންނަ އެފަދަ ތަކެތިވެސް އެތެރެކުރުން މަނާ ވާނެއެވެ. މީގެ ސަބަބުން އިސްރާއީލުގެ ޚާރިޖިއްޔާއިން ވަނީ ނެދަރލޭންޑްސްއަށް ދަތުރުކުރާ އިސްރާއީލު ރައްޔިތުން ފާސްކޮށް، ފުރިހަމަ ތަޙުޤީޤުތަކެއް ހިންގަފާނެ ކަމުގެ އިންޒާރު ދީފައެވެ.
އިސްރާއީލުގެ ކަންބޮޑުވުމަކީ ހަމައެކަނި ވަޒަންވެރިންގެ އުފެއްދުންތަކުން ލިބޭ މާލީ ގެއްލުމެއް ނޫނެވެ. ނަމަވެސް، މި "ހިމޭން ބޮއިކޮޓް" ގެ ސަބަބުން ޔޫރަޕްގެ ކުންފުނިތަކާއި، ބޭންކުތައް އަދި އިންޝުއަރެންސް ކުންފުނިތަކުން، ޤާނޫނީ މައްސަލަތަކުން ސަލާމަތް ވުމުގެ ގޮތުން މުޅި އިސްރާއީލުގެ މުދަލާއި ކުންފުނިތަކާއެކު މުޢާމަލާތްކުރުން ހުއްޓާލަފާނެތީ ބިރުގަނެއެވެ.
މުޅި ޔޫރަޕްގެ ފެންވަރުގައި އިތުރު ފިޔަވަޅުތައް އެޅުމާމެދު ބަހުސްކުރެވެމުންދާއިރު، ބައެއް ޤައުމުތަކުން ދަނީ އިސްރާއީލުގެ އިންތިޚާބުގެ ނަތީޖާއަށް އިންތިޒާރުކުރަމުންނެވެ.
މީގެ އިތުރުން، އިސްރާއީލާއި އޫރޫޕިއަން ޔޫނިއަންއާ ދެމެދުވެވިފައިވާ ޕާޓްނަޝިޕް އެއްބަސްވުން ސަސްޕެންޑްކުރުމުގެ ވާހަކަތައް ދެކެވުނު ނަމަވެސް، އަދި އެއީ އަމަލީ ގޮތުން ނިންމާފައިވާ ނިންމުމެއް ނޫނެވެ.
ޔަހޫދީ މިތާވީމް އިންސްޓިޓިއުޓްގެ ދިރާސާތަކުން ދައްކާ ގޮތުގައި، ޓެރަރިސްޓް ވަޒަންވެރިންގެ އުފެއްދުންތަކަށް ސީދާކޮށް ކުރާ އަސަރު ކުޑަވި ނަމަވެސް، މުދާ އުފެއްދި ތަން ކަށަވަރުކުރަން އުނދަގޫވުމުގެ ސަބަބުން ޔޫރަޕްގެ ކުންފުނިތަކުން އިސްރާއީލުގެ މުދާ ގެނައުން ލަސްކުރުން ނުވަތަ ހުއްޓާލުމަކީ އިސްރާއީލުގެ އިޤްތިޞާދަށް އޮތް އެންމެ ބޮޑު ނުރައްކަލެވެ.
