އެމެރިކާގެ ޖޯޖިއާ ސްޓޭޓުގެ ގަވަރނަރު ކަމުގެ އިންތިޚާބު ޑިމޮކްރެޓިކް ޕާޓީގެ ކެންޑިޑޭޓް ކީޝާ ލާންސް ބޮޓަމްސް ކާމިޔާބުކުރައްވައި، އެމެރިކާގެ ތާރީޚުގައި ސްޓޭޓެއްގެ ގަވަރނަރު ކަމަށް އިންތިޚާބުވި ފުރަތަމަ ކަޅުނަސްލުގެ އަންހެން ބޭފުޅާގެ ޝަރަފު ހޯއްދަވައިފިއެވެ. މިއީ ފާއިތުވި 25 އަހަރަށްވުރެ ގިނަ ދުވަހުގެ ތެރޭގައި ޖޯޖިއާގެ ގަވަރނަރު ކަމުގެ މަޤާމު ޑިމޮކްރެޓިކް ޕާޓީއަށް ލިބުނު ފުރަތަމަ ފަހަރެވެ.
އުމުރުން 56 އަހަރުގެ އެޓްލާންޓާގެ ކުރީގެ މޭޔަރު ބޮޓަމްސް މި އިންތިޚާބު ކާމިޔާބުކުރެއްވީ ރިޕަބްލިކަން ޕާޓީގެ ވާދަވެރި ކެންޑިޑޭޓް އަދި ބިލިއަނަރު ސާދާގަރު ރިކް ޖެކްސަންއާ ވާދަކުރައްވައި ގެންނެވެ. މީގެ ކުރިން ރިޕަބްލިކަން ޕާޓީގެ ބާރުގަދަ ކޮންޓްރޯލެއް އޮތް ޖޯޖިއާ ސްޓޭޓް، ފާއިތުވި ދިހަވަރަކަށް އަހަރުގެ ތެރޭގައި ދެ ޕާޓީއަށްވެސް ނަތީޖާ އެނބުރިދާނެ ފަދަ "ސްވިންގ ސްޓޭޓް" އަކަށް ބަދަލުވެފައިވާކަން މި އިންތިޚާބީ ނަތީޖާއިން ވަނީ ކަށަވަރުވެފައެވެ.
އިންތިޚާބުގެ ކެމްޕޭން ފެށުނީއްސުރެ ބޮޓަމްސް ވަނީ ރައީސް ޑޮނަލްޑް ޓްރަމްޕްގެ ސަރުކާރުން ގެންގުޅޭ ސިޔާސަތުތަކާ ދެކޮޅަށް ވަކާލާތު ކުރައްވާފައެވެ. ޚާއްސަކޮށް ތަކެތީގެ އަގުއުފުލުމާއި، އިންފްލޭޝަންގެ މައްސަލަތަކާއި، ތެލުގެ އަގު ބޮޑުވުމާއި، ސިއްޙީ ޚިދުމަތްތައް ހޯދުމަށް ހުރި ހުރަސްތަކުގެ އިތުރުން އީރާން ހަނގުރާމައިގެ މައްސަލަތަކާ ގުޅިގެން އާންމު ރައްޔިތުންގެ ތެރޭގައި އުފެދިފައިވާ ނުރުހުން އޭނާގެ ކެމްޕޭނުގައި ވަނީ ބޭނުންކުރައްވާފައެވެ.
މީގެ އިތުރުން، އެމެރިކާގެ ސުޕްރީމް ކޯޓުން ވޯޓުލުމުގެ ޙައްޤުތަކާ ބެހޭ ޤާނޫނަށް ގެނެސްފައިވާ ބަދަލުތަކާއެކު، ކަޅުނަސްލުގެ އާންމުންގެ ވޯޓުލުމުގެ ޙައްޤުތައް ރައްކާތެރިކުރުމަށް އޭނާ ވަކާލާތު ކުރެއްވިއެވެ. ކެމްޕޭންގެ ތެރޭގައި ކުރީގެ އާންމު ޚިޔާލު ހޯދުމުގެ ވޯޓުތަކުން ބައެއް ގޮންޖެހުންތައް ކުރިމަތިވި ނަމަވެސް، ޑިމޮކްރެޓިކް ޕާޓީގެ ޕްރައިމަރީ ކާމިޔާބުކޮށް، ރިޕަބްލިކަން ޕާޓީގެ އެތެރޭގެ ވާދަވެރިކަން ބޮޑުވެފައިވަނިކޮށް އޭނާ ވަނީ ވަކިފަރާތަކަށް ނުޖެހޭ ވޯޓުލާ މީހުންގެ ތާއީދު ހޯއްދަވާފައެވެ.
