އިންޑިއާގެ ޑޮމެސްޓިކް އެއަރ ޕެސެންޖަރުންގެ އަދަދު މިއަހަރުގެ ޖެނުއަރީ މަހު 15.03 މިލިއަނަށް އަރައިފިކަމަށް ކްރެޑިޓް ރޭޓިންގ އެޖެންސީ އައިސީއާރުއޭގެ އާ ރިޕޯޓެއްގައި ހާމަކޮށްފިއެވެ.
މި އަދަދަކީ 2023 ވަނަ އަހަރުގެ ޑިސެމްބަރު މަހާ އަޅާބަލާއިރު 0.7 އިންސައްތައިގެ އިތުރުވުމެކެވެ. އަދި 2023 ވަނަ އަހަރުގެ ޖެނުއަރީ މަހާ އަޅާބަލާއިރު 14.5 އިންސައްތައިގެ ކުރިއެރުމެކެވެ. އެންމެ ފާހަގަކޮށްލެވޭ ކަމަކީ 2020 ވަނަ އަހަރުގެ ޖެނުއަރީ މަހާ އަޅާބަލާއިރު، ކޯވިޑްގެ ކުރިން އޮތް މިންވަރަށްވުރެ 17.9 އިންސައްތައިގެ ބޮޑު ކުރިއެރުމެއް ލިބިފައިވުމެވެ.
އިންޑިއާގެ މާލީ އަހަރުގެ ފުރަތަމަ 10 މަސްދުވަސް ކަމަށްވާ އޭޕްރީލް 2024 އިން ޖެނުއަރީ 2025 އަށް، ޑޮމެސްޓިކް އެއަރ ޓްރެފިކް 137.21 މިލިއަނަށް އަރާފައިވެއެވެ. މިއީ މިދިޔަ އަހަރުގެ މި މުއްދަތާ އަޅާބަލާއިރު 7.5 އިންސައްތައިގެ އިތުރުވުމެކެވެ.
އިންޑިއާގެ އެއަރލައިންތަކުގެ ބައިނަލްއަޤްވާމީ ދަތުރުތަކުގެ ފަސިންޖަރުންގެ އަދަދުވެސް ވަނީ އިތުރުވެފައެވެ. 2024 ވަނަ އަހަރުގެ މާލީ އަހަރުގެ ފުރަތަމަ 9 މަސްދުވަހުގެ ތެރޭގައި އިންޑިއާގެ އެއާލައިންތަކުގެ ބައިނަލްއަޤްވާމީ ޓްރެފިކް 24.89 މިލިއަން ފަސިންޖަރުންނަށް އަރާފައިވެއެވެ. މިއީ އޭގެ ކުރީ އަހަރާ އަޅާބަލާއިރު 14.5 އިންސައްތައިގެ އިތުރުވުމެކެވެ.
ކޯވިޑް-19 ގެ ބަލިމަޑުކަމުގެ ތެރޭގައި ދުނިޔޭގެ އެންމެ ހަރުކަށި ބައެއް ފިޔަވަޅުތަކާ ކުރިމަތިލާން ޖެހުނު އިންޑިއާގައި، މިހާރު ވައިގެ ދަތުރުފަތުރުގެ ދާއިރާއިން ފެންނަމުންދާ މި ކުރިއެރުމަކީ، އެ ޤައުމުގެ 1.4 ބިލިއަން އާބާދީގެ ތެރޭގައި ވައިގެ ދަތުރުފަތުރަށް ހުރި ޝައުޤުވެރިކަން އިތުރުވަމުންދާކަމުގެ ހެއްކެކެވެ.
ދިއްލީ، މުމްބާއީ، އަދި ބެންގަލޫރު ފަދަ ސިޓީތައް ވަނީ އިންޑިއާ ދުނިޔެއާ ގުޅުވައިދީ، ދުނިޔޭގެ ބާރަކަށް ވަމުން އަންނަ ބާރުގަދަ ގޭޓްވޭތަކަކަށް ވެފައެވެ.
