ޕާކިސްތާނުގެ ރޭލްވޭ ނިޒާމަށް ކުރިމަތިވެފައިވާ ސަލާމަތީ ގޮންޖެހުންތައް އިތުރުވަމުންދާކަން މީޑިއާއިން ރިޕޯޓު ކުރެއެވެ. ރޭލު ދަތުރުތައް ދަނީ ގިނަގިނައިން މެދުކެނޑެމުންނެވެ. އަދި އެކްސިޑެންޓްތަކުގެ އަދަދު އިތުރުވަމުން ދެއެވެ. އަދި އަސާސީ ވަސީލަތްތައް ހަލާކުވުމުގެ ސަބަބުން، ރޭލުގެ ޚިދުމަތާ މެދު އާންމުންގެ އިތުބާރު ގެއްލެމުންދާކަމަށް ރިޕޯޓްތައް ބުނެއެވެ.
މިދިޔަ ދިހަ އަހަރުގެ ތެރޭގައި ރޭލު އެކްސިޑެންޓްތަކުގައި 1،000 އަށްވުރެ ގިނަ މީހުން ޕާކިސްތާންގައި މަރުވެފައި ވެއެވެ. އަދި، 2024 ވަނަ އަހަރު އެކަނިވެސް 150 މީހުން ރޭލު އެކްސިޑެންޓްތަކުގައި ނިޔާވެފައިވެއެވެ. މި ހިތާމަވެރި ހާދިސާތަކުގެ މައިގަނޑު ސަބަބުތައް ކަމަށް ބުނަނީ، ވަސީލަތްތައް ބާވެ ހަލާކުވެފައިވުމާއި، އެކަށީގެންވާ މިންވަރަށް ސަލާމަތީ ފިޔަވަޅު އަޅައި ރޭލުތައް ނުބެލެހެއްޓުމާއި އަދި ރައްކާތެރިކަމުގެ އުސޫލުތައް އެކަށީގެންވާ މިންވަރަށް ތަންފީޒު ނުކުރެވުމެވެ.
ޕާކިސްތާން ރޭލްވޭގައި ގިނަ ރޭލުތައް ދުއްވަމުން ދަނީ ޒަމާނާ ނުގުޅޭ ސިގްނަލް ގެ ނިޒާމަށެވެ. އަދި ބައެއް ރޭލުތައް ދުއްވަމުންދަނީ ގަރުނަކަށްވުރެ ގިނަ ދުވަސްވެފައިވާ، ދަގަނޑުތައް މަތީގައެވެ.
މީގެ އިތުރުން، ކޮރަޕްޝަނާއި ދޯހަޅި މެނޭޖްމަންޓުގެ މައްސަލަތަކުގެ ސަބަބުން މި މައްސަލަތައް އިތުރަށް ގޯސްވަމުން ދެއެވެ. އަދި، ގިނަ ފަހަރަށް ރޭލްވޭގެ ބަޖެޓްގެ ފައިސާ ޚަރަދުކުރެވެމުންދަނީ އެންމެ އެކަށީގެންވާ ގޮތުގައި ނޫންކަން ވެސް ފަހަގަ ކޮށް މީޑިއާއިން ރިޕޯޓު ކުރެއެވެ.
ޕާކިސްތާނު ސަރުކާރުން މި މައްސަލަތައް ހައްލު ކުރުމަށް އެދެވޭ ފިޔަވަޅުތައް ނާޅާ ކަމަށްބުނެ އާންމުން ފާޑު ކިޔަމުން ދެއެވެ. އަދި ދުވަހަކަށް ވުރެން ދުވަހެއް، ފަސިންޖަރުންގެ އަދަދު އިތުރުވަމުންދިޔަ ނަމަވެސް، ރޭލްވޭ ނެޓްވޯކް ޒަމާނީކުރުމަށް އެކަށީގެންވާ މިންވަރަށް އިންވެސްޓްކޮށްފައެއް ނުވެއެވެ.
މި ކަންކަމުގެ ސަބަބުން އާންމުންގެ ހިތްހަމަނުޖެހުން އިތުރުވަމުންދާއިރު، އާންމުންނަށް ލިބޭ އެކްސިޑެންޓްގެ ގެއްލުންތަކުގެ ޒިންމާދާރު ފަރާތްތައް ޖަވާބުދާރީކުރުވުމަށާއި އިޞްލާޙީ ފިޔަވަޅުތައް އެޅުމަށް ގޮވާލުންތައް އިތުރު ވަމުންވެސް ދެއެވެ.
ޕާކިސްތާނުގައި ދަތުރުފަތުރުގެ ނިޒާމުގެ މުހިންމު ބައެއްގެ ގޮތުގައި ރޭލްވޭ ހިމެނެއެވެ. ނަމަވެސް އެ މުހިންމުކަމާ އެއް ވަރަކަށް ރޭލްވޭއަށް ސަމާލުކަމެއް ނުދެވެއެވެ.
