ޕާކިސްތާނުގެ ދަށުގައިވާ ކަޝްމީރު ގައި ޖަމްމޫ އަދި ކަޝްމީރު ޖޮއިންޓް އަވާމީ އެކްޝަން ކޮމިޓީ (ޖޭއޭއޭސީ) އިން އިސްނަގައިގެން ހިންގާ މުޒާހަރާތަކުގެ ސަބަބުން އެ ސަރަހައްދުގެ އާންމު ދިރިއުޅުން ހުއްޓުމަކަށް އައިސްފައިވެއެވެ. މާރުކޭޓްތައް ބަންދުވެ، ދަތުރުފަތުރު ހުއްޓި، އިންޓަނެޓް ޚިދުމަތްތައް މެދުކަނޑާލާފައިވާއިރު، މުޒާހަރާތަކުގައި 9 މީހަކު މަރުވެ، އެތައް ބަޔަކަށް އަނިޔާވެފައިވެއެވެ.
މުޒާހަރާކުރާ ފަރާތްތަކުން ދަނީ ކަރަންޓު އަގު ބޮޑުވުމާއި، ކާބޯތަކެތީގެ އަގު މައްޗަށް ދިއުމާއި، ވަކި ބަޔަކަށް ލިބިދޭ އިމްތިޔާޒުތަކާ ދެކޮޅަށް އަޑުއުފުލަމުންނެވެ. އެފަރާތުން ހުށަހަޅާ ކަޝްމީރުގެ 38 ނުކުތާގެ ޗާޓަރ އޮފް ޑިމާންޑްސް އަކީ މިހާރު ރައްޔިތުންގެ އަބުރާއި ކަރާމާތާއި، ރައްޔިތުން ތަމްސީލު ކުރުމާއި ޖަވާބުދާރީވުން ހޯދުމަށް ގޮވާލުމުގެ ނިޝާނަކަށް ވެފައިވެއެވެ.
ކުރީގެ ބޮޑުވަޒީރު ރާޖާ ފާރޫޤް ހައިދަރު ޚާން ވަނީ މުޒާހަރާތަކުގައި އިންޑިއާގެ ބައިވެރިވުމެއް އޮތްކަމަށް ދައްކުވައިދޭ "ސައިފަރ ޑޮކިއުމަންޓެއް" ހުށަހެޅާފައެވެ. ނަމަވެސް، ކަޝްމީރުގެ ގިނަ ލީޑަރުން މިއީ މުޒާހަރާތަކުގެ ޞައްޙަކަން ގެއްލުވާލުމަށް ކުރާ މަސައްކަތެއްކަމަށް ބުނެފައިވެއެވެ.
މި ހަލަބޮލިކަމަކީ ޕާކިސްތާނުން ކަޝްމީރާ މެދު ގެންގުޅޭ ވިސްނުމަށް ބޮޑު ގޮންޖެހުމެކެވެ. ޕާކިސްތާނުން މުޅި ދުނިޔޭގައި ކަޝްމީރު މީހުންގެ ޙައްޤުތަކަށް ވަކާލާތުކުރާއިރު، ކޝްްމީރުގައި މިހާރު ހިނގަމުންދާ ކަންކަމާމެދު އަމަލުކުރާ ގޮތުން އެ ޤައުމުގެ އިތުބާރަށް އުނިކަން އަންނަމުންދާކަމަށް ތަޙްލީލުކުރާ ފަރާތްތަކުން ވިދާޅުވެއެވެ.
