ޕާކިސްތާނުގެ ލާހޯރު ސިޓީ އަނެއްކާވެސް ދުނިޔޭގެ އެންމެ ތަޣައްޔަރުވެފައިވާ ސިޓީގެ ގޮތުގައި ދެމިއޮތްކަން ހާމަވެއްޖެއެވެ. ސްވިސް އެއަރ ކޮލިޓީ މޮނިޓަރ އައިކިއުއެއަރ އިން ނެރެފައިވާ ތަފާސްހިސާބުތަކަށް ބަލާއިރު، ލާހޯރު ސަރަޙައްދުގައި ވަނީ ދުން ބޯވެފައެވެ. މިއަދު އަންގާރަ ދުވަހު ހެނދުނު 9:00 ޖެހިއިރު ލާހޯރުގެ އެއަރ ކޮލިޓީ އިންޑެކްސް (އޭކިއުއައި) ވަނީ 329 ގައި ރެކޯޑް ކުރެވިފައެވެ. ފަތިހު އެ މިންވަރު 424 އަށް އަރާފައިވެއެވެ. މީގެ އިތުރުން ޕާކިސްތާނުގެ ކަރާޗީ ވެސް ވަނީ ދުނިޔޭގެ އެންމެ ތަޣައްޔަރުވެފައިވާ ސިޓީތަކުގެ ތެރޭގައި ތިންވަނައިގައި ހިމެނިފައެވެ. ކަރާޗީގެ އޭކިއުއައި ރެކޯޑް ކުރެވިފައިވަނީ 174 ގައެވެ.
ލާހޯރުގެ ވައިގެ ތަޣައްޔަރުވުމުގެ މިންވަރު ޞިއްޙަތަށް އެންމެ ނުރައްކާތެރި ކަމަށް ބެލެވޭ ޕާޓިކިއުލޭޓް މެޓަރ (ޕީއެމް2.5) ގެ މިންވަރު ކަމަށްވާ 287 އަށް އަރާފައިވާ ކަމަށް ޕާކިސްތާނުގެ ނޫސްތަކުން ރިޕޯޓުކޮށްފައިވެއެވެ. އެ ސިޓީގެ ހުރިހާ ސަރަޙައްދެއްގައިވެސް ތަޣައްޔަރުވުމުގެ މިންވަރު އެއްހަމައެއްގައި ނެތް ނަމަވެސް، ބައެއް ސަރަޙައްދުތައް ވަނީ 'ނުރައްކާތެރި' މިންގަނޑު ހުރަސްކޮށްފައެވެ. މިގޮތުން، ސިޓީ ސްކޫލް ހިމެނޭ ޢައްލާމާ އިޤްބާލް ޓައުންގެ އޭކިއުއައި 505 އަށް އަރާފައިވާއިރު، ފައުޖީ ފާޓިލައިޒަރ ޕާކިސްތާން އަދި ދަ ސިޓީ ސްކޫލް ޝަލީމާރު ކެމްޕަސްގެ އޭކިއުއައި ވަނީ 525 އާއި 366 ގައި ރެކޯޑް ކުރެވިފައެވެ. މިއީ އެ ސަރަޙައްދުތަކުގައި ދިރިއުޅޭ އެތައް މިލިއަން ރައްޔިތުންނަށް ނުރައްކާތެރި ވައިގެ ތެރެއަށް ނޭވާލާން ޖެހިފައިވާކަން އަންގައިދޭ މިންވަރެކެވެ.
ދުން ބޯވުމުގެ ސަބަބުން އުފެދިފައިވާ މި ނުރައްކަލުގެ ޙާލަތާ ގުޅިގެން ޕަންޖާބު ޕްރޮވިންސް ވަނީ ހައި އެލާޓަށް ގެނެސްފައެވެ. ޕަންޖާބުގެ ފައިސަލާބާދު އަދި މުލްތާން ސިޓީގެ އޭކިއުއައި ވަނީ މިއަދުގެ އެކި ވަގުތުތަކުގައި 439 އާއި 438 ގައި ރެކޯޑް ކުރެވިފައެވެ. ބާވަލްޕޫރު، ގުޖްރަންވާލާ އަދި ސިޔާލަކޯޓް ފަދަ އެހެނިހެން މުހިންމު ސިޓީތައް ވެސް މި ލިސްޓުގެ އެންމެ ކުރީގައި ހިމެނިފައިވެއެވެ. އަދި މިއިން ޕަންޖާބުގައި އާންމު ޞިއްޙަތުގެ ބޮޑު ކާރިޘާއެއް ކުރިމަތިވެފައިވާކަން ހާމަވެއެވެ. ޞިއްޙީ މާހިރުން ވަނީ މިފަދަ މަތީ މިންވަރުގެ ތަޣައްޔަރުވުމަށް ދިގު މުއްދަތަކަށް ހުށަހެޅުމުގެ ސަބަބުން ހިތުގެ ބަލިތަކާއި، ފުއްޕާމޭގެ ކެންސަރާއި، ސްޓްރޯކް އަދި ދާއިމީ ކޮށް ނޭވާލާ ނިޒާމުގެ ބަލިތައް ފަދަ ނުރައްކާތެރި ޞިއްޙީ މައްސަލަތައް ކުރިމަތިވުމުގެ އިންޒާރު ދެއްވާފައެވެ.
ކޮންމެ އަހަރަކުވެސް މިހިސާބުގައި ތަކުރާރުވާ މި ކާރިޘާގެ މައިގަނޑު ސަބަބުތަކަކީ ދާއިމީ ކޮށް ފެކްޓްރީތަކުން ދުން އެރުވުމާއި، އުޅަނދުފަހަރުގެ ދުމާއި، ސިނާއީ ތަޣައްޔަރުވުމާއި އަދި ދަނޑުވެރިކަމުގެ ބޭނުންތަކަށްޓަކައި ދަނޑު ރޯކުރުމެވެ. ދައުލަތުގެ ކަމާބެހޭ ފަރާތްތަކުން ވަނީ، ޚާއްޞަކޮށް ކުޑަކުދިންނާއި، ދޮށީ އުމުރުގެ މީހުންނާއި، ނޭވާލާ ނިޒާމުގެ ބަލިތައް ހުންނަ ފަރާތްތަކުން ބޭރުގައި އުޅުން މަދުކުރުމަށް އިލްތިމާސްކޮށްފައެވެ.
