ޕާކިސްތާނުގެ ކޯހިސްތާނު ޑިސްޓްރިކްޓުގައި ޓީޗަރުން ނުލިބިގެން އެ ސަރަހައްދުގެ އަންހެން ކުދިންގެ ސްކޫލްތަކުގެ ގާތްގަނޑަކަށް 60 އިންސައްތަ ވަނީ ބަންދުކޮށްފައެވެ. ސަރަހައްދީ ތަޢުލީމާ ބެހޭ އިދާރާތަކުން ބުނާ ގޮތުގައި މިކަމުގެ ސަބަބުން އެތައް ހާސް ކުދިން އަސާސީ ތަޢުލީމު ގެ ފުރުސަތުން މަހުރޫމް ވެގެން ގޮސްފައިވެއެވެ.
ރަސްމީ ފަރާތްތަކުން ބުނާ ގޮތުގައި، ޕާކިސްތާނުގެ އެންމެ ތަރައްޤީ ނުވާ ސަރަހައްދުތަކުގެ ތެރޭގައި ހިމެނޭ ކޯހިސްތާނު ޑިސްޓްރިކްޓަށް ޤާބިލު އަންހެން ޓީޗަރުން ލިބުމުގެ ދަތިކަން ދާއިމީ މައްސަލައެއްގެ ގޮތުގައި ކުރިމަތިވެފައިވެއެވެ. ވަޒީފާއަށް ޢައްޔަންކުރާ ގިނަ މުވައްޒަފުން މި ދުރު، ފަރުބަދަމަތީ ސަރަހައްދަށް ދިއުމަށް އިންކާރު ކުރެއެވެ. އެ ސަރަހައްދަކީ ނިކަމެތި އިންފްރާސްޓްރަކްޗަރާއި، ސަލާމަތީ ކަންކަމުގެ ކަންބޮޑުވުންތަކާއި، ބޯހިޔާވަހިކަމުގެ ދަތި ބޮޑު ސަރަހައްދެކެވެ.
ސްކޫލްތައް ބަންދުކުރުމުގެ ސަބަބުން ތަޢުލީމުގެ ދާއިރާގައި ޖިންސުގެ ހަމަހަމަކަމުގެ ފަރަގު އިތުރަށް ބޮޑުވަމުންދާ ކަމަށް ޖަމާއަތުގެ ލީޑަރުން ވަނީ އިންޒާރު ދީފައެވެ.
