ޗައިނާއިން ސަބްސިޑީ ދީގެން އުފައްދާ މުދާ، އެގައުމުން ބޭރުގެ ބާޒާރުތަކަށް އަގުހެޔޮކޮށް ވިއްކުމުގެ ސިޔާސަތުގެ ސަބަބުން، ދުނިޔޭގެ އެކި ގައުމުތަކުން އެކަމާ ގުޅޭ ގޮތުން އުފެދިފައިވާ ކަންބޮޑުވުންތަކުން އިތުރު މައުލޫމާތު ހޯދުމަށް މަސައްކަތް ފަށއިފިއެވެ. ކޮންމެ ގައުމަކުންވެސް ބޭނުން ވަނީ އެމީހުންގެ ސިނާއަތްތައް ހިމާޔަތް ކުރުމަށް ފިޔަވަޅުއަޅާށެވެ.
ޗައިނާއަށް ތުހުމަތު ކުރެވެނީ ޗައިނާއިން މުދާ އުފެއްދުމަށް ހިނގާ ހޭދައަށް ވުރެން ކުޑަ އަގެއްގައި މުދާ ގައުމުތަކަށް އެކްސްޕޯޓު ކުރާ ކަމަށެވެ. މިއަށް ކިޔަނީ ޑަމްޕިންގ އެވެ.
'މިކަމުގެ ސަބަބުން އެ ގައުމުތަކުގެ އެތެރޭގެ ސިނާއަތްތަކަށް ވަރަށް ބޮޑަށް އަސަރުކޮށް، ބާޒާރުގެ ހަމަޖެހުން ގެއްލި ދާކަމަށް ތުހުމަތު ކުރެއެވެ.
ދުނިޔޭގެ ފެންވަރުގައި މިކަމުން އަސަރު ކުރުމުން ތަފާތު ފިޔަވަޅުތައް އަޅައެވެ.
ބްރެޒިލް: ޗައިނާއިން އެކްސްޕޯޓުކުރާ ދަގަނޑުގެ ބާވަތްތަކާއި މެދު ކުރެވުނު ތަހުގީގުތައް ވަނީ އިތުރަށް ފުޅާކޮށްފައެވެ.
ދެކުނު އެފްރިކާ: ޓަޔަރާއި ސިމެންތި އިމްޕޯޓްކުރުމުގެ މައްސަލަތަކުގައި އިތުރު ތަހުގީގުތަކެއް ވަނީ ފަށާފައެވެ.
މެކްސިކޯ: ފޮއްޗާއި އެލުމިނިއަމް ފޮއިލްއާ ދެކޮޅަށް ފިޔަވަޅުތަކެއް ވަނީ އަޅާފައެވެ.
ޔޫރަޕިއަން ޔޫނިއަން: އެޕޮކްސީ ރެޒިންސްއާއި އެމްޑީއައި ފަދަ ޗައިނާގެ ކެމިކަލްތަކަށް ޑިއުޓީ ވަނީ އިތުރު ކޮށްފައެވެ.
ޗައިނާގެ ޑަމްޕިންގެ ސިޔާސަތުގެ ސަބަބުން އޭޝިއާ، ޔޫރަޕް އަދި އެމެރިކާގައި ހުންނަ ފާމަސޫޓިކަލްސް، ކެމިކަލްސް، ދަގަނޑު އަދި ސޯލާ ޕެނަލް އުފައްދާ ކާރުހާނާތަކަށް މި ސިޔާސަތުގެ ސަބަބުން ބޮޑެތި ގެއްލުންތަކެއް ލިބެމުންދާ ކަމަށް ބުނެއެވެ. އަދި މިކަމުގެ ސަބަބުން ބައެއް ކާރުޚާނާތައް ވަނީ ބަންދުކުރަން ޖެހި، އަނެއް ބައި ކާރުހާނާތަކަށް ވަނީ ވާދަ ނުކުރެވޭ ގޮތް ވެފައެވެ.
ވިއެޓްނާމް، މެލޭޝިއާ، އަދި އިންޑިއާ ފަދަ ތަރައްގީވަމުން އަންނަ ގައުމުތަކުން ބުނާ ގޮތުގައި، ޗައިނާއިން އަގުހެޔޮކޮށް އިމްޕޯޓުކުރާ މުދަލުގެ ސަބަބުން އެގައުމުތަކުގެ ސިނާއީ ތަރައްގީއަށް ހުރަސްއެޅެއެވެ.
ޗައިނާއިން ސަބްސިޑީތަކާއި ވިޔަފާރީގެ މި ސިޔާސަތުތައް ބޭނުންކުރަނީ ދުނިޔޭގެ ސަޕްލައި ޗެއިންގައި އެގައުމުގެ ބާރުގަދަ ކުރުމަށް ކަމަށް ތަޖުރިބާކާރުން ބުނެއެވެ. އަދި އެހެން ގައުމުތަކުން ޗައިނާގެ އެކްސްޕޯޓްތަކަށް ބަރޯސާ ކުރުމަށް މަސައްކަތް ކުރާ ކަމަށްވެސް ބުނެއެވެ.
ދުނިޔޭގެ ފެންވަރުގައި އެންޓި ޑަމްޕިންއާ ދެކޮޅަށް އަޅާ ފިޔަވަޅުތައް ފުޅާވަމުންދާއިރު، މީގެ ސަބަބުން ވިޔަފާރީގެ ހަނގުރާމަތަކެއް ފެށި، ދުނިޔޭގެ ސަޕްލައި ޗެއިންތައް ބައިބައިވެގެން ދިއުމުގެ ނުރައްކަލާ ކުރިމަތިލާން ޖެހިދާނެ ކަމަށްވެސް އިންޒާރު ދީފައި ވެއެވެ.
