އެފްރިކާ ބައްރުގެ ގައުމުތަކުގައި ސަގާފީ، ތައުލީމީ އަދި ޓެކްނޮލޮޖީގެ ދާއިރާއިން ޗައިނާގެ ނުފޫޒު ވަރުގަދަކުރުމަށްޓަކައި "2026 ޗައިނާ-އެފްރިކާ އިންސާނީ ގުޅުންތަކުގެ އަހަރު" ގެ ނަމުގައި ބޮޑު ކެމްޕޭނެއް ފަށައިފިއެވެ. މިއީ މިހާތަނަށް ބެއިޖިންގްއިން ކުރިއަށްގެންދާ އެންމެ އުންމީދީ ސޮފްޓް-ޕަވަރ މަޝްރޫއު ކަމަށް ދިރާސާކުރާ ފަރާތްތަކުން ސިފަކުރެއެވެ.
ޗައިނާގެ ފޮރިން މިނިސްޓަރު ވަންގް ޔީ އެފްރިކާއަށް ކުރެއްވި ދަތުރުފުޅުގައި އިއުލާންކުރެއްވި މި މަޝްރޫއަކީ، މީގެ ކުރިން ޗައިނާއިން އެފްރިކާގައި އިސްކަންދެމުން އައި އިންފްރާސްޓްރަކްޗަރާއި މާލީ އެހީތެރިކަމުގެ ބަދަލުގައި، ސީދާ ރައްޔިތުންނާ ގުޅުންހުރި ދާއިރާތަކުން ގުޅުން ބަދަހިކުރުމަށް ފެށި މަސައްކަތެކެވެ. މި މަޝްރޫއުގެ ދަށުން ފަސް ދާއިރާއަކުން 600 އަށްވުރެ ގިނަ ހަރަކާތް ހިންގުމަށް ވަނީ ރޭވިފައެވެ.
މި ކެމްޕޭން ބިނާވެފައިވަނީ ޒުވާނުންގެ އީޖާދީ މަސައްކަތްތަކާއި، ސަގާފީ ފެސްޓިވަލްތަކާއި، އާންމު ދިރިއުޅުމާއި ސިއްހީ މަޝްރޫއުތަކުގެ އިތުރުން، އިލްމީ ބަދަލުތަކާއި ހުނަރުވެރިން ބިނާކުރުމުގެ މައްޗަށެވެ. ވަންގް ޔީ ވިދާޅުވި ގޮތުގައި، މީގެ ބޭނުމަކީ ޗައިނާއާއި އެފްރިކާގެ 2.8 ބިލިއަން ރައްޔިތުންގެ މެދުގައި ސީދާ ގުޅުމެއް ގާއިމުކޮށް، ކުރިއަށް އޮތް ޖީލުތަކަށް މި އެކުވެރިކަން ދެމެހެއްޓުމެވެ.
މި މަޝްރޫއުގެ ދަށުން އެފްރިކާގެ ޒުވާން ލީޑަރުންނަށް ޗައިނާގައި ތައުލީމީ ދަތުރުތައް ހަމަޖެއްސުމާއި، އާޓިފިޝަލް އިންޓެލިޖެންސް މުބާރާތްތައް ބޭއްވުމާއި، ޗައިނާގެ ފިލްމު ފެސްޓިވަލްތައް ކުރިއަށް ގެންދިއުން ހިމެނެއެވެ. މީގެ އިތުރުން، އެފްރިކާގެ ކޮމެޑީން ޗައިނާގައި ހުނަރު ދެއްކުމުގެ ފުރުސަތުވެސް ވަނީ ހުޅުވާލެވިފައެވެ.
ސަގާފީ ގުޅުންތަކުގެ އިތުރުން، އަމަލީ ގޮތުން ރައްޔިތުންނަށް ފައިދާކުރާނެ މަސައްކަތްތަކެއް ވެސް ޗައިނާއިން ވަނީ ފަށާފައެވެ. އެގޮތުން "1،000 އަވަށަށް 100 މެޑިކަލް ޓީމު" ފޮނުވައިގެން ހިލޭ ސިއްހީ ހިދުމަތް ދިނުމާއި، އެފްރިކާގެ 10،000 އަވަށަކަށް ސެޓެލައިޓް ޓީވީގެ ހިދުމަތް ފޯރުކޮށްދިނުމުގެ މަޝްރޫއު ހިމެނެއެވެ. މިއީ އެފްރިކާގެ މައުލޫމާތު ފެތުރޭ ނިޒާމުގެ ތެރެއަށް ޗައިނާގެ ނުފޫޒު ފޯރުވުމަށް ކުރެވޭ މަސައްކަތެއް ކަމަށް މަސްރަހު ދިރާސާކުރާ ފަރާތްތަކުން ބުނެއެވެ.
ސެންޓަރ ފޯރ ސްޓްރެޓީޖިކް އެންޑް އިންޓަރނޭޝަނަލް ސްޓަޑީޒްގެ ކެމަރަން ހަޑްސަން ފާހަގަކުރެއްވި ގޮތުގައި، ޗައިނާއިން މިހާރު އިންވެސްޓް ކުރަމުންދަނީ "ސޮފްޓް އިންފްރާސްޓްރަކްޗަރ" އަށެވެ. މީގެ ތެރޭގައި ކޮންގޯގައި ގާއިމުކޮށްފައިވާ ސެންޓްރަލް އެފްރިކަން ކަލްޗަރަލް އެންޑް އާޓްސް ސެންޓަރާއި، ޓެންޒޭނިއާގެ ޖިއޮލޮޖިކަލް މިއުޒިއަމް ފަދަ ތަންތަން ހިމެނެއެވެ. މި ބިނާތަކަކީ ޗައިނާއާއި އެފްރިކާގެ ގުޅުން ދާއިމީކޮށް ހަނދާންކޮށްދޭނެ ރަމްޒީ ތަންތަނަށް ވެގެންދާނެއެވެ.
