ޗައިނާގެ އަގުހެޔޮ މުދާ އިންޑޮނޭޝިއާގެ ބާޒާރުގައި އިންތިހާއަށް ގިނަވުމުގެ ސަބަބުން އެ ގައުމުގެ ކުދި އަދި މެދު ފަންތީގެ ވިޔަފާރިތަކަށް ބޮޑެތި ގޮންޖެހުންތަކަކާ ކުރިމަތިވެ، ގައުމުގެ އުފެއްދުންތެރިކަމުގެ ނިޒާމަށް ނުރައްކާވެފައިވާ ކަމަށް އެންމެ ފަހުގެ ތަފާސްހިސާބުތަކުން ދައްކައިފިއެވެ. ވިޔަފާރީގެ ތަފާސްހިސާބުތަކަށް ބަލާއިރު، އިންޑޮނޭޝިއާއަށް އެތެރެކުރާ މުދަލުގެ ތިންބައިކުޅަ އެއްބަޔަށްވުރެ ގިނައީ ޗައިނާގެ އުފެއްދުންތަކެވެ.
އިންޑޮނޭޝިއާގެ މަސައްކަތްތެރިންގެ 90 އިންސައްތައާއި 95 އިންސައްތައާ ދެމެދުގެ އަދަދެއް ހިއްސާކުރާ ކުދި ވިޔަފާރިތަކުން މިހާރު ވަނީ އަމިއްލައަށް ތަކެތި އުފެއްދުން ހުއްޓާލައި، ޗައިނާއިން އެތެރެކުރާ އަގުހެޔޮ މުދާ އަލުން ވިއްކާ ބަޔަކަށް ބަދަލުވާން ފަށާފައެވެ. މިއީ ޗައިނާގެ ސިނާއީ ބާރުގަދަކަމުގެ ސަބަބުން އިންޑޮނޭޝިއާގެ އަމިއްލަ އުފެއްދުންތެރިކަން ފަހަތަށް ޖެހެމުންދާ ކަމުގެ ހެއްކެކެވެ.
އިންޑޮނޭޝިއާގެ މިނިސްޓަރ ފޯ އެމް.އެސް.އެމް.އީ މަމަން އަބްދުއްރަހްމާން އިންޒާރު ދެއްވާފައިވާ ގޮތުގައި، ގައުމުގެ ވިޔަފާރިވެރިން އުފެއްދުންތެރިކަން ދޫކޮށް ޗައިނާގެ މުދަލަށް ބަރޯސާވުމަކީ ގައުމުގެ ސިނާއީ މުސްތަގުބަލަށް އޮތް ބޮޑު ނުރައްކަލެކެވެ.
- 2025 ވަނަ އަހަރުގެ ޖެނުއަރީ މަހު އެކަނިވެސް ޗައިނާއިން 6.37 ބިލިއަން ޑޮލަރުގެ މުދާ އެތެރެކޮށްފައިވާއިރު، މިއީ އެ ގައުމަށް އެތެރެކުރި ޖުމްލަ މުދަލުގެ 35.5 އިންސައްތައެވެ.
މި މައްސަލަ އިތުރަށް ގޯސްވަނީ ގަވާއިދާ ހިލާފަށް އެތެރެކުރާ މުދަލުގެ ސަބަބުންނެވެ. ޗައިނާގެ ގިނަ އުފެއްދުންތަކެއް އެކަށީގެންވާ ލޭބަލް ނުވަތަ ހަލާލް ސެޓްފިކެޓް ނެތި އެތެރެކުރާއިރު، އިންޑޮނޭޝިއާގެ އަމިއްލަ އުފެއްދުންތެރިންނަށް ވަނީ ހަރުކަށި ގަވާއިދުތަކަކަށް އަމަލުކުރަން މަޖުބޫރުވެފައެވެ. މިކަމުގެ ސަބަބުން އަމިއްލަ އުފެއްދުންތަކުގެ އަގު ބޮޑުވެ، ބޭރުގެ މުދަލާ ވާދަނުކުރެވޭ ހާލަތަށް ވަނީ ގޮސްފައެވެ.
ބައިނަލްއަގުވާމީ ވިޔަފާރީގެ އުސޫލުތަކާ ޗައިނާއިން ޚިލާފުވަމުންދާ ކަމަށްވެސް ރިޕޯޓުތައް ބުނެއެވެ. އިންޑޮނޭޝިއާއިން ޗައިނާގެ މުދަލާ ދެކޮޅަށް ފިޔަވަޅު އެޅުމަށް މަސައްކަތް ކުރި ނަމަވެސް، ޗައިނާއިން ވަނީ އިންޑޮނޭޝިއާގެ ދަގަނޑުގެ ބާވަތްތަކުން ބޮޑު ޓެކްސްއެއް ނަގަން ފަށާފައެވެ. މިއީ ޗައިނާއިން އަމިއްލަ ސިނާއަތްތައް ހިމާޔަތްކޮށް، އެހެން ގައުމުތަކުގެ ވިޔަފާރިތައް ބަލިކަށިކުރުމަށް ގެންގުޅޭ އުކުޅެއްގެ ގޮތުގައި ފާހަގަކުރެވެއެވެ.
މިކަމުގެ ނަތީޖާއެއްގެ ގޮތުން އިންޑޮނޭޝިއާގެ ފޭރާން އުފައްދާ ސިނާއަތް ފަދަ މުހިންމު ދާއިރާތައް މިހާރު ވަނީ ހުއްޓުމަކަށް އަންނަން ފަށާފައެވެ. މިއީ ގައުމުގެ އިގްތިސާދީ ކުރިމަގަށް އޮތް ބޮޑު ގޮންޖެހުމެއްގެ ގޮތުގައި މާހިރުން ސިފަކުރެއެވެ.
