ރައްޔިތުންގެ މަޖިލީހުގެ ހިތަދޫ އުތުރު ދާއިރާގެ ޕީއެންސީ މެމްބަރު މުހައްމަދު ސިނާނުގެ މައްޗަށް ސާބިތުވެފައިވާ ދަރަންޏެއް ހުކުމާ އެއްގޮތަށް ދައްކަމުން ނުދާތީ، އޭނާގެ ރައްޔިތުންގެ މަޖިލީހުގެ ގޮނޑި ގެއްލިފައިވާ ކަމަށް ސުޕްރީމް ކޯޓުން މިއަދު ހުކުމް ކޮށްފިއެވެ. މިއީ 20 ވަނަ ރައްޔިތުންގެ މަޖިލީހުގެ މެމްބަރެއްގެ ގޮނޑި ގެއްލުނު ފުރަތަމަ ފަހަރެވެ.
މި މައްސަލައަކީ ސިނާނާއި އިތުރު ދެ މީހަކު ބައިވެރިވެގެން މޯލްޑިވްސް އިސްލާމިކް ބޭންކް (އެމްއައިބީ) އިން ނެގި ލޯނަކަށް 3.8 މިލިއަން ރުފިޔާ ދައްކަން މިދިޔަ އަހަރުގެ އޮކްޓޫބަރު މަހު ސ. ހިތަދޫ މެޖިސްޓްރޭޓް ކޯޓުން ކުރި ހުކުމާ އެއްގޮތަށް ފައިސާ ދައްކަމުން ނުދާ ކަމަށް ބުނެ ޣާލިބް ސަލީމް ކިޔާ މީހަކު ހުށަހެޅި މައްސަލައެކެވެ. ހިތަދޫ ކޯޓުން ކުރިން ހުކުމް ކޮށްފައިވަނީ ނުދެއްކި ހުރި ލޯނު ފައިސާއާއި ޖޫރިމަނާ ހަ މަސް ދުވަހުގެ ތެރޭގައި ދައްކާ ހަލާސްކުރުމަށެވެ.
ސުޕްރީމް ކޯޓުގައި މި މައްސަލަ ބެއްލެވި ފަނޑިޔާރުންގެ ބެންޗުގެ ރިޔާސަތު ބެލެހެއްޓެވީ ފަނޑިޔާރު އައިޝާ ޝުޖޫން މުހައްމަދެވެ. ބެންޗުގައި ދެން ތިއްބެވީ ފަނޑިޔާރު ޑރ. މުހައްމަދު އިބްރާހިމާއި، ފަނޑިޔާރު އަލީ ރަޝީދު ހުސައިނާއި، ފަނޑިޔާރު ހުސައިން ޝަހީދު އަދި ފަނޑިޔާރު މުހައްމަދު ސަލީމެވެ.
މި މައްސަލައިގެ ހުކުމް އިއްވަވަމުން ފަނޑިޔާރު ޝުޖޫންގެ ރައުޔުގައި ފާހަގަކުރެއްވީ، ހިތަދޫ ކޯޓުގެ ހުކުމަކީ ބާތިލް ހުކުމެއް ކަމަށް ކަނޑައަޅަން ސިނާންގެ ފަރާތުން ހުށަހަޅާފައި ނުވާތީ، އެއީ ޣައިރު ހާޒިރުގައި ކުރި ހުކުމެއް ކަމަށް ބުނެ ދައްކާ ވާހަކަ ބަލައިނުގަނެވޭނެ ކަމަށެވެ. އަދި ސިނާނުގެ މައްޗަށް ދަރަންޏެއް ސާބިތުވެފައިވާކަން އެނގެން އޮތްއިރު، ހުކުމާ އެއްގޮތަށް ގަވައިދުން ފައިސާ ދައްކާފައިވާ ކަމަށް ގަބޫލުނުކުރެވޭ ކަމަށްވެސް ރައުޔުގައިވެއެވެ.
"ސިނާނުގެ މައްޗަށް ދަރަންޏެއް ސާބިތުވެފައިވާކަން އެނގެން އޮތްއިރު، ހުކުމާ އެއްގޮތަށް ގަވައިދުން ފައިސާ ދައްކާފައިވާ ކަމަށް ގަބޫލެއް ނުކުރެވޭ،" ފަނޑިޔާރު ޝުޖޫންގެ ރައުޔުގައި ފާހަގަކުރައްވާފައިވެއެވެ. ބެންޗުގެ ހުރިހާ ފަނޑިޔާރުންގެ އިއްތިފާގުން ކުރި މި ހުކުމާއެކު، ސިނާންގެ މެމްބަރުކަމުގެ ޝަރުތު އުނިވެ، އޭނާގެ ގޮނޑި ވަނީ ހުސްވެފައެވެ.
މި މައްސަލާގައި ސިނާނާއެކު ދެން ދައުވާ ލިބުނު އަހުމަދު ވަހީދާއި މުހައްމަދު ސަލީމްގެ މައްޗަށްވެސް އެމްއައިބީއަށް ފައިސާ ދެއްކުމަށް ހިތަދޫ ކޯޓުން ވަނީ ކުރިން ހުކުމްކޮށްފައެވެ. ސުޕްރީމް ކޯޓުގެ މި ނިންމުމާއެކު ހިތަދޫ އުތުރު ދާއިރާގެ ގޮނޑި މިހާރު ވަނީ ހުސްވެފައެވެ.
