އިންޑިއާގެ މެގަލާޔާގައި ހުންނަ އަމްރޯއީ މިލިޓަރީ ސްޓޭޝަނުގައި އިންޑިއާ ސިފައިން އިސްނަގައިގެން ކުރިއަށްގެންދާ މަލްޓިނޭޝަނަލް އަސްކަރީ ތަމްރީނު، "އެކްސަސައިޒް ޕްރަގަތީ 2026″ ގައި މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް) އިން ބައިވެރިވެއްޖެއެވެ. މި މަހުގެ 20 ވަނަ ދުވަހު ފެށި ދެ ހަފުތާގެ މުއްދަތަށް ކުރިއަށްދާ މި ތަމްރީނުތަކުގައި ރާއްޖޭގެ 30 ސިފައިންނާއި ދެ އޮފިސަރުން ބައިވެރިވެއެވެ.
"ޕާޓްނަޝިޕް އޮފް ރީޖަނަލް އާމީސް ފޯ ގްރޯތު އެންޑް ޓްރާންސްފޯމޭޝަން އިން ދަ އިންޑިއަން އޯޝަން ރީޖަން" ގެ ނަމުގައި ކުރިއަށްގެންދާ މި ތަމްރީނުތަކުގައި ރާއްޖެއާއި އިންޑިއާގެ އިތުރުން ބޫޓާން، ކެމްބޯޑިއާ، އިންޑޮނޭޝިއާ، ލާއޯސް، މެލޭޝިއާ، މިޔަންމާ، ނޭޕާލް، ފިލިޕީންސް، ސީޝެލްސް، އަންގޯލާ، ސްރީލަންކާ އަދި ވިއެޓްނާމްގެ އަސްކަރިއްޔާތަކުން ބައިވެރިވެއެވެ.
މި ތަމްރީނުތަކުގައި ބައިވެރިވާ އެމްއެންޑީއެފްގެ ކޮންޓިންޖެންޓުގައި ހިމެނެނީ ސްޕެޝަލް ފޯސަސް، ސްޕެޝަލް އޮޕަރޭޝަންސް ގްރޫޕް، ސްޕެޝަލް ބޯޓް ސޮކޮޑްރަން އަދި މެރިންސް އެވެ. މިއީ ރާއްޖޭގެ ސިފައިންގެ އެންމެ ޚާއްސަ އަދި ގާބިލު ޔުނިޓުތަކެވެ.
އެކްސަސައިޒް ޕްރަގަތީ މައިގަނޑު ގޮތެއްގައި އަމާޒުކޮށްފައިވަނީ ފަރުބަދަމަތީ ސަރަހައްދުތަކާއި ޖަންގަލިތަކުގައި ހިންގާ ޓެރަރިޒަމާ ދެކޮޅު އޮޕަރޭޝަންތަކަށެވެ. މި ޕްރޮގްރާމުގެ ތެރޭގައި ގުޅިގެން ރޭވުންތައް ރޭވުމާއި، ޓެކްޓިކަލް ޑްރިލްތަކާއި، ކޯޑިނޭޓްކޮށްގެން ހިންގާ އޮޕަރޭޝަންތައް ހިމެނެއެވެ. މީގެ އިތުރުން ފަންނީ މައުލޫމާތު ހިއްސާކުރުމާއި ބައިވެރިވާ ގައުމުތަކުގެ ސިފައިންގެ މެދުގައި ގުޅުން ބަދަހިކުރުމަކީވެސް މި ތަމްރީނުގެ މުހިންމު މަގުސަދެކެވެ.
މި ތަމްރީނުތަކުން ދޭހަވަނީ ސަރަހައްދީ ދިފާއީ ނެޓްވޯކްތަކާއެކު އެމްއެންޑީއެފުން ބާއްވާ ގާތް ގުޅުމެވެ. ފަހަކަށް އައިސް ރާއްޖެއިން އަންނަނީ އެކި ގައުމުތަކާއެކު ބާއްވާ ދެފަރާތް ހިމެނޭ އަދި ގިނަ ގައުމުތައް ބައިވެރިވާ އަސްކަރީ ތަމްރީނުތަކުގައި ބައިވެރިވަމުންނެވެ. މި ފަހަރުގެ ތަމްރީނުގައި ސްޕެޝަލް ފޯސަސް އަދި މެރިންސް ބައިވެރިކުރުމުން ދޭހަވަނީ، ރާއްޖެއިން މިފަދަ ތަމްރީނުތަކަށް ފޮނުވަނީ ހަމައެކަނި ރަމްޒީ ހަރަކާތެއްގެ ބަދަލުގައި، ހާއްސަ ތަމްރީނު ލިބިފައިވާ ގާބިލު ޔުނިޓުތައް ކަމެވެ.
