އަންނަ ހަފުތާގައި ފެށޭ 2026 ވަނަ އަހަރުގެ ފީފާ ވޯލްޑް ކަޕްގެ ފޯރިގަދަ މަންޒަރުތައް ދުނިޔޭގެ އެތައް ބިލިއަން ބެލުންތެރިންނަށް ގެނެސްދިނުމަށްޓަކައި، ކުޅިވަރުގެ މައިދާނުގެ ފަރުދާގެ ފަހަތުގައި އެތައް ހާސް އިންޖިނިއަރުންނެއް ދަނީ ރެއާ ދުވާލު މަސައްކަތް ކުރަމުންނެވެ. މި ޓެކްނޮލޮޖީގެ ބޮޑު ނެޓްވޯކްގެ އެންމެ މަތީ ފަންތީގައި، މުހިއްމު ޒިންމާތަކެއް އުފުއްލަވަނީ އެމެރިކާގައި ދިރިއުޅުއްވާ ދިވެހި އައިޓީ ތަޖުރިބާކާރު މުހައްމަދު ޝާހީންއެވެ.
ނިއުޔޯކުގައި "ވިޓް ސޮލިއުޝަންސް" ގެ ނަމުގައި އައިޓީ ކުންފުންޏެއް ހިންގަވަމުން ގެންދަވާ ޝާހީން، މި މުބާރާތުގައި އަދާކުރައްވަނީ "ލީޑް ވެނިއު ޓެކްނޮލޮޖީ މެނޭޖަރ" ގެ މަގާމެވެ. އޭނާގެ ޒިންމާތަކުގެ ތެރޭގައި ފައިނަލް މެޗު ކުޅޭ ދަނޑު ހިމެނޭހެން، މުބާރާތުގެ މައިގަނޑު ދަނޑުތަކުގެ އައިޓީ އިންފްރާސްޓްރަކްޗަރ ފަރުމާކުރުމާއި، އެ ނިޒާމުތައް އެއްކޮށް ގުޅުވާލުން ހިމެނެއެވެ.
އޮން ލައިން ފިޔެސް އިން ޝާހީންއާ ހަވާލާދީ ފާހަގަކުރި ގޮތުގައި، މި މަސައްކަތް އޭނާއަށް ލިބުނީ ވަރަށް ޚާއްސަ ގޮތަކަށެވެ. ފީފާގެ ފަރާތުން އޭނާގެ ކުންފުންޏަށް ފޮނުވި އީމެއިލް، ފުރަތަމަ ފެނުމުން އެއީ ސްޕޭމް މެއިލެއް ކަމަށް އޭނާއަށް ހީކުރެވުނެވެ. ނަމަވެސް، ފަހުން އެއީ ސައްހަ ހުށަހެޅުމެއްކަން އެނގުމުން، އެއީ އޭނާގެ ކެރިއަރުގައި ލިބުނު އެންމެ ބޮޑު ފަޚުރު ކަމުގައި ޝާހީން ވިދާޅުވިއެވެ.
"އަހަރެމެން ފަދަ ޓެކްނޮލޮޖީ މެނޭޖަރުންގެ ކާމިޔާބީއަކީ، މެޗުތައް ކުރިއަށްދާއިރު އެއްވެސް މައްސަލައެއް ނުޖެހި، ހުރިހާ ނިޒާމެއްވެސް އޮޓޯއިން ހިނގަމުން ދިއުން،" ޝާހީން ވިދާޅުވިއެވެ.
ދުނިޔޭގެ އެންމެ ބޮޑު އިގުތިސާދީ މަރުކަޒު ކަމަށްވާ ނިއުޔޯކުގައި އަމިއްލަ މަސައްކަތުން ކާމިޔާބީ ހޯއްދެވި ޝާހީންގެ މި ދަތުރަކީ، ދިވެހި ޒުވާނުންނަށް ލިބޭ ވަރަށް ބޮޑު އިލްހާމެކެވެ. މިއީ ހަމައެކަނި ޝާހީންގެ ކާމިޔާބީއެއް ނޫނެވެ؛ މިއީ ބައިނަލްއަގްވާމީ ފެންވަރުގެ އެންމެ މަތީ ހަރުފަތްތަކުގައި ދިވެހިންނަށް ވާދަކުރެވޭނެކަމުގެ ސާފު ހެއްކެކެވެ.
