މިއީ އެމެރިކާއަށް 250 އަހަރު ފުރުމުގެ މުނާސަބާއާ ދިމާކޮށް ތައްޔާރުކޮށްފައިވާ 18 ސިލްސިލާ އެވެ. މި ސިލްސިލާގައި އެމެރިކާގެ ސިޔާސަތާއި ކަން ކުރާ ގޮތަށް ބަލާފައި ވާނެއެވެ.
އެމެރިކާގައި އިސްލާމޯފޯބިއާ ނުވަތަ އިސްލާމްދީނާ މެދު ނަފްރަތު އުފެއްދުމަކީ ހަމައެކަނި މުޖުތަމައުގެ ތެރޭގައި އޮތް ތަފާތުކުރުމެއް ނޫނެވެ. މިއީ ސިޔާސީ ހަތިޔާރެއްގެ ގޮތުގައި ނިޒާމީ ގޮތުން ބޭނުންކުރަމުން އަންނަ ކަމެކެވެ. އެތައް އަހަރެއް ވަންދެން އެމެރިކާގެ ލީޑަރުން ވަނީ މުސްލިމުންގެ ކިބައިގައި ނުރައްކާތެރި، ޝައްކު އުފެދޭ ނުވަތަ ބޭރުގެ ބައެއްގެ ސިފަތައް ހުރި ކަމަށް ދައްކައި، ހަނގުރާމަތަކާއި، ފާރަލުމާއި، އަދި ގާނޫނީ ހާއްސަ ފިޔަވަޅުތައް އަޅަން ބިރުވެރިކަން ބޭނުންކޮށްފައެވެ.
މިކަން 9/11 އަށް ފަހު އިތުރަށް ވަރުގަދަވި ނަމަވެސް، މީގެ އަސްލުތައް ފިނި ހަނގުރާމައިގެ ދުވަސްވަރުގެ އެލަޔަންސްތަކާއި، ތެލުގެ ސިޔާސަތުތަކާއި، އަދި މެދުއިރުމަތީގެ ރައްޔިތުންނާ މެދު ނަސްލީ ގޮތުން ދެކޭ ގޮތްތަކާ ގުޅިފައިވެއެވެ.
9/11 އަށް ފަހު އިސްލާމޯފޯބިއާ ވަނީ ބަހުރުވައަކުން ސިޔާސަތަކަށް ބަދަލުވެފައެވެ.
"ޕެޓްރިއޮޓް އެކްޓް"ގެ ދަށުން ސަރުކާރުގެ ފާރަލުމުގެ ބާރުތައް ފުޅާކޮށް، މިސްކިތްތަކާއި، މުސްލިމު ޗެރިޓީ ޖަމާއަތްތަކާއި، މުސްލިމު ދަރިވަރުންގެ ގްރޫޕްތަކާއި، އަދި މުސްލިމު ކޮމިއުނިޓީ ޖަމިއްޔާތައް އެއްވެސް ކުށެއްގެ ހެއްކަކާ ނުލައި މޮނިޓާ ކުރުމުގެ ފުރުސަތު ލިބުނެވެ. ނިއު ޔޯކް، ނިއު ޖާޒީ، އަދި ކެލިފޯނިއާގެ މުޅި އަވަށެއްގައި ސިއްރު ފުލުހުން ހަރަކާތްތެރިވިއެވެ. ނިއު ޔޯކް ފުލުހުންގެ "ޑެމޮގްރަފިކްސް ޔުނިޓް" އިން މުސްލިމުންގެ މުޖުތަމައުތައް މެޕްކުރީ، އެއީ ބޭރުގެ ހަނގުރާމަވެރި ނެޓްވޯކްތަކެއް ކަމަށް ބަލައިގެންނެވެ. އެމީހުން ނަމާދުކުރާ ތަނާއި ގޮތާއި، ވިޔަފާރިކުރާ ތަނާއި، އަދި ކިޔަވާ ތަންތަނަށް ފާރަލަމުން ދިޔައެވެ. މި ޕްރޮގްރާމުން ޓެރަރިޒަމާ ގުޅުންހުރި އެއްވެސް މައްސަލައެއް ނުފެނުނެވެ. ނަމަވެސް، މުސްލިމުންނަކީ ހާއްސަ ފާރަލުމެއް ބޭނުންވާ ބައެއް ކަމަށް ދެއްކުމުގެ ސިޔާސީ މަގްސަދު ހާސިލުކުރަން އެކަން އަހަރުތަކެއް ވަންދެން ކުރިއަށް ގެންދިޔައެވެ.
މަރުަކޒީ ސަރުކާރު ފެންވަރުގައި، "ނޯ ފްލައި ލިސްޓް" އަދި "ޓެރަރު ވޮޗްލިސްޓް"ގައި މުސްލިމުންގެ ނަންތައް އިންތިހާއަށް ގިނައެވެ. ގިނަ ފަހަރަށް އެއްވެސް ހައްގެއް ނުލިބި އެމީހުންނަށް ދަތުރުކުރުން މަނާކުރެއެވެ. ވައިގެ ބަނދަރުތަކުން ދަތުރުކުރުން މަނާކޮށްފައިވާކަން އެނގެނީ އެއާޕޯޓަށް ދިއުމުންނެވެ. މުސްލިމު ކުޑަކުދިން ވެސް ވޮޗްލިސްޓްތަކުގައި ހިމެނުނެވެ. މިކަމާ ދެކޮޅަށް ހުށަހަޅާ ޝަކުވާތައް ބަލައިގަތުން އޮންނަނީ ވަރަށް ސިއްރު އަދި ލަސްކޮށެވެ. މި ނިޒާމުގެ ތެރެއިން މުސްލިމަކަށް ވުން އެއީ ޝައްކު އުފެދޭ ކަމަކަށް ބަދަލުވިއެވެ.
ޚާރިޖީ ސިޔާސަތުން މިކަންކަން އިތުރަށް ފުޅާކުރިއެވެ. އަފްޣާނިސްތާން، އިރާގު، ޕާކިސްތާން، ޔަމަން، ސޯމާލިއާ، އަދި ލީބިޔާގައި ކުރި ހަނގުރާމަތައް ސިފަކުރީ "އިސްލާމީ ހައްދުފަހަނަޅައިދިއުމާ" ދެކޮޅަށް ކުރާ ހަނގުރާމައިގެ ގޮތުގައެވެ. މިއީ ހަނގުރާމަވެރިންނާއި، އާންމުންނާއި، އަދި މުޅި މުޖުތަމައުގެ ދެމެދުގައި އޮތް ފަރަގު ފޮހެލެވޭ ފަދަ ފުޅާ މާނައެކެވެ. ޑްރޯން ހަމަލާތަކުގައި އެތައް ހާސް އާންމުން މަރުވި ނަމަވެސް، ރަސްމީ ބަހުރުވައިން އެމީހުން ސިފަކުރީ "ޓެރަރިސްޓުން / ހަނގުރާމަވެރިން"ގެ ގޮތުގައެވެ. މިކަމުން ސާބިތުކޮށްދިނީ މުސްލިމް ފިރިހެނުންނަކީ ޠަބީއީ ގޮތުން ނުރައްކާތެރި ބައެއް ކަމެވެ. އަނިޔާކުރުމުގެ ޕްރޮގްރާމްތަކުގައި ވެސް މުސްލިމް ގައިދީންނަށް އަމާޒުކޮށް، އިންސާނުން ކަމަށް ނުބަލައި، ނަފްރަތުގެ ވާހަކަތައް ބޭނުންކޮށްގެން އަނިޔާކުރިއެވެ.
މި ނިޒާމީ ބިރުވެރިކަމުގެ އެންމެ ފަހުގެ ނަތީޖާއަކީ 2017 ވަނަ އަހަރު ތައާރަފުކުރި "މުސްލިމް ބޭން" (މުސްލިމުންނަށް އެމެރިކާއަށް އެތެރެވުން މަނާކުރި ގާނޫނު) އެވެ. މިއީ ސަލާމަތީ ކަމަކަށް ވުރެ ބޮޑަށް، މުސްލިމުންނަކީ ބީރައްޓެހިން ކަމަށް ދައްކަން އުފެއްދި ސިޔާސީ ކަމެކެވެ. މިއީ އެތައް އަހަރެއްގެ ޝައްކުތަކަށް ގާނޫނީ ހައިސިއްޔަތު ދީ، އެމެރިކާގެ އިމިގްރޭޝަންގެ ގާނޫނީ އޮނިގަނޑުގެ ތެރެއަށް އިސްލާމޯފޯބިއާ ވައްދައިދިން ކަމެކެވެ.
ސިޔާސަތެއްގެ ގޮތުގައި އިސްލާމޯފޯބިއާ އޮތުމުން، ދުނިޔެއާ އެމެރިކާ މުއާމަލާތްކުރާ ގޮތް ވަނީ ބަދަލުވެފައެވެ. މިއީ ހަނގުރާމަތަކާއި، ފާރަލުމާއި، އަދި ގާނޫނީ ހާއްސަ ފިޔަވަޅުތަކަށް ލިބުނު ބަހަނާއެކެވެ. އެމެރިކާގެ ސަލާމަތަށްޓަކައި މުސްލިމުންގެ ފުރާނައަކީ މުހިންމު އެއްޗެއް ނޫން ކަމަށް ބަލައިގަތުމަކީ އާދައިގެ ކަމަކަށް ވެއްޖެއެވެ. އަދި މިއީ ބިރުވެރިކަމަކީ ހަމައެކަނި އެކްސިޑެންޓެއް ނޫން، އަދި ހަނގުރާމަވެރިކަން ދަމަހައްޓައި، ބާރުވެރިކަން އިތުރުކޮށް، އަދި އެހެން މީހުން ބާކީކޮށްގެން އަމިއްލަ ވަތަނީ ވަންތަކަން ކަނޑައެޅުމަށް ބޭނުންކުރާ ހަތިޔާރަކަށް ވެއްޖެއެވެ.
