ޕާކިސްތާނުގެ ބޮޑުވަޒީރު ޝެހެބާޒް ޝަރީފާއި އެ ގައުމުގެ ސިފައިންގެ ވެރިޔާ ފީލްޑް މާޝަލް އާސިމް މުނީރު، އީރާނުގެ ކުރީގެ ސުޕްރީމް ލީޑަރު އާޔަތުﷲ ޢަލީ ޚާމަނާއީ އަވަހާރަވުމާ ގުޅިގެން ތެހެރާނުގައި ބޭއްވި ތަޢުޒިޔާގެ ބައްދަލުވުމުގައި ބައިވެރިވެވަޑައިގެންފިއެވެ.
ތެހެރާނަށް ވަޑައިގެންނެވި ޕާކިސްތާނުގެ މަތީ ފެންވަރުގެ ވަފުދުން ވަނީ އާޔަތުﷲ ޢަލީ ޚާމަނާއީގެ ހަނދާނަށް އިހުތިރާމް އަދާކުރައްވައި، އެ މަނިކުފާނުގެ ފުރާނަފުޅަށްޓަކައި ފާތިހާ ކިޔަވާ ވިދާޅުވެފައެވެ. އަދި ބޮޑުވަޒީރު ޝެހެބާޒް ޝަރީފާއި ފީލްޑް މާޝަލް އާސިމް މުނީރު ވަނީ އީރާނުގެ ރައީސާއި އެ ގައުމުގެ އިސް އޮފިޝަލުންނާ ބައްދަލުކުރައްވައި، މި ހިތާމަވެރި ދަނޑިވަޅުގައި ޕާކިސްތާނުގެ ފަރާތުން ތަޢުޒިޔާ ފޮނުއްވާފައެވެ.
މި ދަތުރުފުޅުގައި ބޮޑުވަޒީރާއި ސިފައިންގެ ވެރިޔާގެ އިތުރުން ޕާކިސްތާނުގެ ސަރުކާރުގެ އިސް ބޭފުޅުން ހިމެނިވަޑައިގަންނަވައެވެ:
- އިސްހާގު ދާރު: ނައިބު ބޮޑުވަޒީރު އަދި ޚާރިޖީ ވަޒީރު
- މުޙްސިން ނަގްވީ: ހޯމް މިނިސްޓަރު
- ޢަޠާއުﷲ ތާރަރު: މައުލޫމާތާ ބެހޭ ވަޒީރު
- ބިލާވަލް ބުއްޓޫ ޒަރުދާރީ: ޕާކިސްތާން ޕީޕަލްސް ޕާޓީގެ ޗެއާމަން
- ސަރުދާރު އިޔާޒް ސާދިގު: ގައުމީ މަޖިލީހުގެ ރައީސް
- ސައްޔިދު މުރާދު އަލީ ޝާހު: ސިންދު ޕްރޮވިންސްގެ ޗީފް މިނިސްޓަރު
******************
އަފްޣާނިސްތާނުގެ ނައިބު ބޮޑުވަޒީރާއި ޚާރިޖީ ވަޒީރު، އީރާނުގެ ކުރީގެ ސުޕްރީމް ލީޑަރުގެ ތަޢުޒިޔާގެ ބައްދަލުވުމުގައި
އަފްޣާނިސްތާނުގެ ތާލިބާން ސަރުކާރުގެ ނައިބު ބޮޑުވަޒީރު މުއްލާ އަބްދުލްޣަނީ ބިރާދަރު އާއި ޚާރިޖީ ވަޒީރު މައުލަވީ އަމީރު ޚާން މުއްތަގީ، އީރާނުގެ ކުރީގެ ސުޕްރީމް ލީޑަރު އާޔަތުﷲ ޢަލީ ޚާމަނާއީގެ ތަޢުޒިޔާގެ ބައްދަލުވުމުގައި ބައިވެރިވެވަޑައިގެންފިއެވެ. އީރާނުގެ ދައުލަތުގެ ޓީވީން ދެއްކި މަންޒަރުތަކުން ފެންނަ ގޮތުގައި، ޚާރިޖީ ވަޒީރު އަމީރު ޚާން މުއްތަގީ ވަނީ ހުކުރު ދުވަހު އާޔަތުﷲ ޚާމަނާއީގެ ޖަނާޒާގެ ކަންކަމުގައި ބައިވެރިވެވަޑައިގެން އެ މަނިކުފާނަށް ފަހުގެ އިހުތިރާމް އަދާކުރައްވާފައެވެ.
މިއީ އަފްޣާނިސްތާނުގެ ތާލިބާން ސަރުކާރާއި އީރާނާ ދެމެދު އޮތް ޑިޕްލޮމެޓިކް ގުޅުންތައް ދައްކުވައިދޭ މުހިންމު ފިޔަވަޅެކެވެ.
******************
ތާލިބާނުންގެ އިދިކޮޅު ލީޑަރު އަޙްމަދު މަސްޢޫދު، ވެސް ތަޢުޒިޔާގެ ބައްދަލުވުމުގައި
ތާލިބާނުންނާ ދެކޮޅަށް ހަރަކާތްތެރިވާ އިދިކޮޅު ލީޑަރު އަޙްމަދު މަސްޢޫދު، އީރާނުގެ ކުރީގެ ސުޕްރީމް ލީޑަރު އާޔަތުﷲ ސައްޔިދު އަލީ ޚާމަނާއީގެ ތަޢުޒިޔާގެ ބައްދަލުވުމުގައި ބައިވެރިވެވަޑައިގެންފިއެވެ. ބޭރުގެ ނޫސް އެޖެންސީތަކުން ރިޕޯޓުކޮށްފައިވާ ގޮތުގައި، އަޙްމަދު މަސްޢޫދަކީ ގައުމުން ބޭރުގައި ހުންނަވައިގެން ތާލިބާނުންނާ ދެކޮޅު އިދިކޮޅު ޖަމާއަތްތަކުގެ އިސް ލީޑަރުގެ ގޮތުގައި މަސައްކަތްކުރައްވާ ބޭފުޅެކެވެ.
***************
ހަމާސްގެ އިސްވެރިންގެ ވަފުދަކުން އަލީ ޚާމަނާއިގެ ޖަނާޒާގައި ބައިވެރިވެވަޑައިގެންފި
ފަލަސްތީނުގެ މިނިވަންކަމަށް މަސައްކަތްކުރާ ހަމާސް ޖަމާއަތުގެ އިސްވެރިންގެ ވަފުދަކުން، އީރާނުގެ ކުރީގެ ސުޕްރީމް ލީޑަރު އާޔަތުﷲ ސައްޔިދު އަލީ ޚާމަނާއީގެ ތަޢުޒިޔާގެ ބައްދަލުވުމުގައި ބައިވެރިވެވަޑައިގެންފިއެވެ.
މި ވަފުދުގައި ހިމެނިވަޑައިގެންނެވި އިސް ބޭފުޅުންގެ ތެރޭގައި އިސްމާޢީލް ދަރްވީޝް، މޫސާ މުޙައްމަދު އަބޫ މަރުޒޫގް، ޒާހިރު ޖައްބާރީން، ބާސިމް ނަޢީމް، އަދި ޑރ. ޚާލިދު ގައްދޫމީ ހިމެނިވަޑައިގަންނަވައެވެ. މި ބައްދަލުވުމަކީ ފަލަސްތީނުގެ މައްސަލައަށް ތާއީދުކުރާ ފަރާތްތަކާއި އީރާނާ ދެމެދު އޮތް ގުޅުން ދައްކުވައިދޭ މުހިންމު ފިޔަވަޅެކެވެ.
