ތޫފާނުލް އަޤްޞާގެ އެއް އަހަރު ކުރިން ސިންވާރު ލިޔުއްވި ސިއްރު ލިޔުމެއް ހާމަވެއްޖެ

ޙަމާސް ޖަމާޢަތުގެ ސިޔާސީ ގޮފީގެ ކުރީގެ ވެރިޔާ ކޮމާންޑަރު  ޔަޙްޔާ ސިންވާރު، 7 އޮކްޓޯބަރު 2023 ގައި ދިން "ތޫފާނުލް އަޤްޞާ" ހަމަލާގެ މާ ކުރިން، އަމިއްލަ އަތްޕުޅުން ލިޔުއްވާފައިވާ މުހިންމު ސިއްރު ލިޔުމެއްގެ ތަފްޞީލުތައް މީޑިއާއަށް ހާމަވެއްޖެއެވެ.

މި ލިޔުމަކީ ހަމަލާގެ ގާތްގަނޑަކަށް އެއް އަހަރު ކުރިން ސިންވާރު ތައްޔާރުކުރެއްވި، އިސްރާއީލާ ދެކޮޅަށް ކުރަންވީ ކަންކަމުގެ އަސްކަރީ އަދި ސިޔާސީ މަގުޗާޓެކެވެ.

ލިޔުމުން ހާމަވި މުހިންމު ތަފްޞީލުތައް

މި ސިއްރު ލިޔުމުގައި ސިންވާރު ވަނީ "ތޫފާނުލް އަޤްޞާ" އޮޕަރޭޝަނަށް މަގުފަހިކުރުމުގެ ގޮތުންނާއި، އިސްރާއީލު ސިއްސުވާލުމަށްޓަކައި ރޭއްވެވި ބައެއް މުހިންމު ނުކުތާތައް ފާހަގަކުރައްވާފައެވެ:

• ހަމަލާގެ ތައްޔާރީތައް ކުރިއަށްދާއިރު، އިސްރާއީލުގެ އިންޓެލިޖެންސަށް އެއްވެސް ޝައްކެއް ނުވާނެ ފަދަ ގޮތަކަށް ޙަމާސްގެ ހަރަކާތްތައް ބެހެއްޓުމަށް އިރުޝާދު ދެއްވާފައިވެއެވެ.

• ޙަމާސް އިން ބޭނުންވަނީ ހަނގުރާމައެއް ނޫން ކަމަށާއި، ބޭނުންވަނީ ހަމައެކަނި ޣައްޒާގެ އިޤްތިޞާދީ ޙާލަތު ރަނގަޅުކުރަން ކަމަށް ދެއްކުމުގެ ސިޔާސަތެއް ގެންގުޅުމަށް ލިޔުއްވާފައިވެއެވެ. މިއީ އިސްރާއީލުން ސަމާލުކަން ދޫކޮށްލި މައިގަނޑު ސަބަބެވެ.

• އިސްރާއީލުގެ ޖަލުތަކުގައި ތިބި ފަލަސްޠީނުގެ އަސީރުން މިނިވަންކުރުމަކީ މި އޮޕަރޭޝަނުގެ އެންމެ މުހިންމު އެއް އަމާޒުކަން ސިންވާރުގެ އަތުން ލިޔުއްވި ނޯޓުތަކުގައި ކަނޑައަޅުއްވާފައިވެއެވެ.

މި ލިޔުންތަކަކީ ޣައްޒާގެ އެތެރޭގައި އިސްރާއީލު ސިފައިން ހިންގި އަސްކަރީ އޮޕަރޭޝަންތަކެއްގެ ތެރޭގައި، ކަނޑައެޅިގެން ސިންވާރު ބޭނުންކުރެއްވި ބަންކަރެއްގެ ނުވަތަ ހަނގުރާމައިގެ އަސީރުން ބޭތިއްބި ތަނެއްގެ ތެރެއިން ހޯދައިގަތް ލިޔުންތަކެކެވެ. ލިޔުމުގައިވާ އަތު ލިޔުމަކީ ސިންވާރުގެ އަމިއްލަ އަތްޕުޅުގެ ލިޔުންކަން ތަޖުރިބާކާރުން ވަނީ ކަށަވަރުކޮށްދީފައެވެ.

މި ހާމަވުމާއެކު، އިސްރާއީލުގެ ސަލާމަތީ ބާރުތަކާއި އިންޓެލިޖެންސް މޮސާޑް އަދި ޝާބާކްއަށް ކުރިމަތިވެފައިވާ ފާޑުކިޔުންތައް ވަނީ އިތުރަށް ބޮޑުވެފައެވެ. ސަބަބަކީ ޙަމާސްއިން މުޅި ހަމަލާ ރާވައި، އޭގެ މަގުޗާޓު ހަދައިގެން އަހަރެއްވަންދެން ތައްޔާރުވިއިރުވެސް އިސްރާއީލަށް އެކަން ދެނެގަނެވިފައި ނުވާތީއެވެ.