އީރާނުގެ ދެކުނުގައި އޮންނަ ޚާރްގް ޖަޒީރާ ހިފުމަށް އެމެރިކާއިން ކުރާ ކޮންމެ އުދުވާނީ މަސައްކަތެއްގެ ނަތީޖާއާ އެގައުމުން ކުރިމަތިލާން ޖެހޭނެ ކަމަށް އީރާނުގެ ފޮރިން މިނިސްޓްރީގެ ތަރުޖަމާނު އިސްމާއީލް ބަގާއީ ވިދާޅުވެއްޖެއެވެ.
އީރާނުން ބުނަނީ އުދުވާނުގައި ކުރިއަށްދާނަމަ އެމެރިކާއަށް ހަދިޔާ ކުރާނީ އެ ގައުމުގެ މަރުވެފައިވާ ސިފައިންގެ ގަބުރު ހިމެނޭ ކަޅު ކުލައިގެ ބޮޑީ ބޭގްތަކެއް ކަމަށެވެ.
ބަގާއީ އިތުރަށް ވިދާޅުވީ، އެމެރިކާގެ ސިފައިން އެއްގަމު މަގުން އަރައިގަންނަ ކޮންމެ ހާލަތެއްގައިވެސް، އެމީހުންނަށް އީރާނުން ނިކަން އޯގާތެރިކަމާއެކު "މަރުހަބާ ކިއުމަށް މިނެޓުތައް ގުނަމުންދާނެ" ބަޔަކު އީރާނުގެ ލީޑަޝިޕްގައި އެބަތިއްބެވި ކަމަށެވެ.
ޚާރްގް ޖަޒީރާއަކީ އީރާނުގެ ތެލުގެ ސިނާއަތުގެ ހިތެވެ. އެ ޖަޒީރާ އޮންނަނީ އީރާނުގެ ބޫޝެހެރް ޕްރޮވިންސްގެ އައްސޭރިފަށުން 55 ކިލޯމީޓަރު (34 މޭލު) ބޭރުގައެވެ. ރައީސް ޓްރަމްޕް ވަނީ މި ހަނގުރާމައިގެ ތެރޭގައި އެ ސަރަހައްދު ހިފާނެ ކަމަށް ތަކުރާރުކޮށް އިންޒާރު ދެއްވާފައެވެ.
އެމެރިކާއިން އީރާނަށް ދެމުންދާ ހަމަލާތަކުގެ ސަބަބުން ހުރްމުޒް ކަނޑުއޮޅި ކޮންޓްރޯލް ކުރުމަށް އީރާނަށް ލިބިފައިވާ ގާބިލުކަން ކުޑަވަމުންދާ ކަމަށާއި، ނަމަވެސް އާގުބޯޓުތަކަށް އީރާނުންދޭ ހަމަލާތައް މުޅިން ހުއްޓުވުމަށް ގިނަ މަސްތަކެއް ނަގައިފާނެ ކަމަށް ދިރާސާކުރާ ފަރާތަކުން ބުނެއެވެ.
"މުސްތަގުބަލެއްގައި ހުރްމުޒް ކަނޑުއޮޅިން ދަތުރުކުރާ ބޯޓުފަހަރަށް ހަމަލާދިނުމުގެ ގާބިލުކަން ލިބިގެންވާ ގިނަ އަދަދެއްގެ މިސައިލާއި، ޚާއްސަކޮށް ޑްރޯން އީރާނުގައި އެބަހުރި،" ދިފާއީ ދިރާސާވެރިއެއް ކަމަށްވާ ވުލްފްގަންގް ޕުސްޓައި އަލްޖަޒީރާއަށް ކިޔައިދިނެވެ.
އޭނާ ވިދާޅުވި ގޮތުގައި، މިދިޔަ މަހު އެމެރިކާއާއެކު ފަހުމުނާމާގައި ސޮއިކުރުމަށްފަހު ތެހެރާނުން ވަނީ އަލުން ތެޔޮ އެކްސްޕޯޓްކުރަން ފަށާފައެވެ. އަދި "މީގެ މާނައަކީ އީރާނުގެ މާލީ ވަސީލަތްތައް ވަނީ މުއްސަދިވެ އިތުރުވެފައި" ކަމަށްވެސް އޭނާ ވިދާޅުވިއެވެ.
