ޗައިނާގެ "ބެލްޓް އެންޑް ރޯޑް އިނިޝިއޭޓިވް" (ބީއާރުއައި) ގެ ދަށުން ހުޅަނގު ބާލްކަންސްގެ ގައުމުތައް ކަމަށްވާ ސާބިއާ، މޮންޓެނީގްރޯ، ބޮސްނިއާ އަދި އުތުރު މެސެޑޯނިއާގައި ހިންގާ އިންފްރާސްޓްރަކްޗަރ މަޝްރޫޢުތަކުގެ ސަބަބުން، އެ ސަރަހައްދުގެ ގައުމުތަކަށާއި ޔޫރަޕިއަން ޔޫނިއަން (އީޔޫ) އަށް އިގްތިސާދީ އަދި އިސްތިރާޖީ ބޮޑެތި ނުރައްކާތަކެއް ކުރިމަތިވަމުންދާ ކަމަށް "ދަ ޑިޕްލޮމެޓް" ގައި ޝާއިއުކޮށްފައިވާ ރިޕޯޓެއްގައި ބުނެފިއެވެ.
އެ ރިޕޯޓްގައި ފާހަގަކޮށްފައިވާ ގޮތުގައި، ޗައިނާގެ ބޭންކުތަކުން ދޫކުރާ ބޮޑެތި ލޯނުތަކުގެ ސަބަބުން ވެސްޓަރން ބާލްކަންސްގެ ގައުމުތަކުގެ ދަރަނި ވަނީ އިންތިހާއަށް އިތުރުވެ، ދަރަނި މަޖުބޫރީގެ ތެރެއަށް އެ ގައުމުތައް ދަނީ ވެއްޓެމުންނެވެ. މީގެ އެންމެ ބޮޑު އެއް މިސާލަކީ، މޮންޓެނީގްރޯއިން ހައިވޭއެއް ހެދުމަށް ޗައިނާއިން ނެގި ލޯނު ދެއްކުމުގައި ދަތިތަކާ ކުރިމަތިލާންޖެހި، މާލީ ބޮޑު ނުތަނަވަސްކަމެއްގެ ތެރެއަށް ވެއްޓިގެން ދިއުމެވެ.
އޭގެ އިތުރުން، ޗައިނާގެ ކުންފުނިތަކުން ހިންގާ މަޝްރޫއުތަކުގައި ދެފުށް ފެންނަ ބީލަމުގެ އުސޫލުތަކަށް އަމަލުނުކުރުމާއި، ތިމާވެށީގެ މިންގަނޑުތަކަށް ހުރުމަތްތެރިކޮށް ނުހިތުމުގެ މައްސަލަ ވަނީ ބޮޑުވެފައެވެ. ވެސްޓަރން ބާލްކަންސްގެ ގައުމުތަކަކީ އީޔޫގައި ބައިވެރިވުމަށް މަސައްކަތްކުރާ ގައުމުތަކަށް ވީނަމަވެސް، ޗައިނާގެ މިފަދަ މަޝްރޫއުތަކުގެ ސަބަބުން އީޔޫގެ ގަވާއިދުތަކާއި މިންގަނޑުތަކާ އެ ގައުމުތައް ދުރުހެލިވަމުންދާ ކަމަށް ފާހަގަކުރެވެއެވެ.
އިގްތިސާދީ އިންވެސްޓްމަންޓްތަކުގެ ނިވާފަތްގަނޑުގައި ޗައިނާއިން ދަނީ އެ ސަރަހައްދުގެ ސިޔާސީ މަސްރަހަށް ބާރު ފޯރުވަމުންނެވެ. ވަކިން ޚާއްސަކޮށް ސާބިއާ ފަދަ ގައުމުތަކާއެކު އޮންނަ ގާތް ގުޅުމުގެ ބޭނުންހިފައި، ޔޫރަޕްގެ އެކުވެރިކަމާއި ސެކިއުރިޓީއަށް ޗައިނާއިން ބުރޫއަރުވާ ކަމުގެ ކަންބޮޑުވުން އީޔޫއިން ދަނީ ފާޅުކުރަމުންނެވެ.
މި ނުފޫޒު ކޮންޓްރޯލްކުރުމުގެ ގޮތުން އީޔޫއިން ވަނީ "އީޔޫ އިކޮނޮމިކް އެންޑް އިންވެސްޓްމަންޓް ޕްލޭން" ގެ ދަށުން ބާލްކަންސް ސަރަހައްދަށް މާލީ އެހީތެރިކަން އިތުރުކުރަން ފަށާފައެވެ. ނަމަވެސް، ޗައިނާގެ ލޯނުތައް ފަސޭހައިން އަދި އަވަހަށް ލިބެން ހުރުމުގެ ސަބަބުން، އެ ސަރަހައްދުގެ ސަރުކާރުތަކުން އަދިވެސް ޗައިނާގެ މަޝްރޫއުތަކަށް އިސްކަންދޭ ކަމަށް އެ ރިޕޯޓްގައި ބުނެފައިވެއެވެ.
