ރޭވުން އޮތީ އިންތިހާއަށް ވަރަށް ސާދާކޮށެވެ. އުމުރުން 40 އަހަރުގެ ދިވެހި ފިރިހެން މީހާ މާލެއިން ފްލައިޓަށް އަރަނީ 602 ގްރާމްގެ މެތަމްފެޓަމިން (އައިސް) އޭނާގެ ޖަނގިޔަލުގެ ތެރޭގައި ފޮރުވައިގެންނެވެ. އޭނާގެ އަމާޒަކީ ދެކުނު އޭޝިއާގެ އެންމެ ބިޒީ އެއް އެއާޕޯޓު ކަމަށްވާ ކޮޅުނބުގެ ބަންޑާރަނައިކަ އިންޓަނޭޝަނަލް އެއާޕޯޓަށް ފައިބައި، އެއާޕޯޓުގެ ސެކިއުރިޓީ ފަހަނައަޅައި ފޭދިގެން ގޮސް، ކޮޅުނބުގެ ހޮޓަލެއްގައި އިންތިޒާރު ކުރަމުންދާ ދިވެހި އެޖެންޓަކާ މަސްތުވާތަކެތި ހަވާލުކުރާށެވެ.
ނަމަވެސް، ކަންތައްތައް ދިޔައީ ރޭވި ގޮތަކަށެއް ނޫނެވެ.
ސްރީލަންކާގެ ޕޮލިސް ނާކޮޓިކްސް ބިއުރޯއަށް ދިވެހި މީހާ ޖަނގިޔާ ލުމުގެ މާކުރިންވެސް މި ރޭވުމުގެ މައުލޫމާތު ލިބުނެވެ. 22 ޖުލައި ދުވަހު އޭނާގެ ފްލައިޓް ޖެއްސި އިރު، ޕީއެންބީގެ އޮފިސަރުން ތިބީ އޭނާގެ ދަބަސް ނަގަން ޖެހޭ ލަގެޖު ބެލްޓު ކައިރީގައި ފާރައަށެވެ.
ލަގެޖު ބެލްޓު ކައިރިން އޭނާ ހައްޔަރުކުރި އެވެ. އޭނާގެ ޖަނގިޔަލުގެ ތެރޭގައި ޓޭޕް އަޅައި އޮޅާފައިވާ އައިސްގެ ދެ ޕެކެޓް އޮފިސަރުންނަށް ފެނުނެވެ. މިއީ ސެކިއުރިޓީއަށް ހިލކަމެއް ނުވެ ދެވޭނެ ކަމަށް އޭނާ ހީކުރި ގޮތެވެ. ނަމަވެސް، އެއީ މަސްތުވާތަކެތި ހޯދާ ފުލުހުންގެ ލޮލަށް އެންމެ ފަސޭހައިން ފެންނާނެ ގޮތެވެ.
އޭނާ ފުލުހުން ގާތު އެއްބަސްވި ގޮތުގައި، އޭނާ މިގެނައި ތަކެއްޗަކީ ލަންކާގައި ހަރަކާތްތެރިވާ މަސްތުވާތަކެތީގެ ބޮޑު ޑިސްޓްރިބިއުޓަރަކަށް ދޭން ގެނައި ތަކެއްޗެވެ. މިއީ މި ނެޓްވޯކްގެ ނިމުމެވެ.
އެރޭ ހަމަ އެވަގުތު ފުލުހުން ކޮޅުނބުގެ ހޮޓަލަކަށް ގޮސް، އުމުރުން 28 އަހަރުގެ ދިވެހި ޒުވާނަކު ހައްޔަރުކުރި އެވެ. އޭނާ އަތުން ފެނުނީ 10 ގްރާމްގެ އައިސް އެވެ.
މި ދެ މީހުން ހޯމަ ދުވަހު ނެގޮމްބޯ މެޖިސްޓްރޭޓް ކޯޓަށް ހާޒިރުކުރުމުން 14 ދުވަހަށް ބަންދުކުރަން އަމުރުކުރި އެވެ.
ލަންކާ ފުލުހުން ބުނާ ގޮތުގައި މިއީ މުޅި ލަންކާގައި ފެތުރިފައިވާ މަސްތުވާތަކެތީގެ ވިޔަފާރި ހިންގާ ބޮޑު ނެޓްވޯކެއްގެ ބައެކެވެ. ފެނުނު ތަކެތީގެ އަގު 10 މިލިއަން ލަންކާ ރުޕީސްއަށް އަރަ އެވެ.
ދިވެހިރާއްޖޭގައި މަސްތުވާތަކެތީގެ މައްސަލައަކީ ވަރަށް ބޮޑު އަދި ސާބިތުވެފައިވާ ހަގީގަތެކެވެ. ހެރޮއިންގެ ބަދަލުގައި "އައިސް" އަކީ މިހާރު ރާއްޖޭގެ މަގުތަކުގައި އެންމެ ގިނަ އަދަދަކަށް ދައުރުވާ އެއްޗެކެވެ.
މި ވިޔަފާރި ރާއްޖޭގެ ރަށްތަކުގައި ހަލުވިކަމާއެކު ހިނގަނީ ގާނޫނު ތަންފީޒުކުރާ ފަރާތްތަކަށް ހުއްޓުވަން ދަތިވާ މިންވަރަށެވެ. އަދި މި މައްސަލަ ރާއްޖޭގެ ބޯޑަރުތައް ހުރަސްކޮށް ބައިނަލްއަގުވާމީ ފެންވަރަށް މި ވަނީ ފުޅާވެފަ އެވެ.
މި މައްސަލައިގެ ތަހުގީގު އަދިވެސް ދަނީ ކުރިއަށެވެ. މާލެއާއި ކޮޅުނބާ ދެމެދު އެމީހުން ހީކުރި ގޮތަށް ކަންތައްތައް ނުދިޔައީ ކީއްވެކަން މިހާރު އެމީހުންނަށް ވިސްނޭނެ އެވެ.
ހައްޔަރުކުރި ދެ މީހުންނަކީ:
-
މުހައްމަދު ޝާފީ ބިން އަހުމަދު، 28 (މާލެ، ހ. ޕަލްމެއިރާ)
-
ހަސަން އަބްދުﷲ، 40 (ނ. ލަންދޫ، ނިރު)
