އާޖެންޓީނާގެ ޒަޔަނިސްޓް ރައީސް ހާވިއޭ މިލޭ، ބްރެޒިލްގެ އިސްވެރިންނަށް ބްރަޒިލްގައި ހުންނަވައިގެން ބަދުބަސް ރައްދުކުރެއްވުމާ ގުޅިގެން، ބްރެޒިލް އިން އާޖެންޓީނާއަށް ކަނޑައަޅާފައި ހުންނަވާ އެމްބެސެޑަރު އަނބުރާ ގެންގޮސްފިއެވެ.
މި ނިންމުން ނިންމާފައިވަނީ، ހޮނިހިރު ދުވަހު ސައޮ ޕައުލޯގައި ބޭއްވި އިވެންޓެއްގައި މިލޭ ބައިވެރިވެވަޑައިގެން ބްރެޒިލްގެ ރައީސް ލުއިޒް އިނާސިއޯ ލޫލާ ޑި ސިލްވާއަކީ "ވައްކަން ކުރާ މީހެއް" އަދި "ޖަރީމާ ހިންގާ މީހެއް" ކަމަށް ގޮވައި، ބަދުބަސް ރައްދުކުރެއްވިތާ އެއް ދުވަސް ފަހުންނެވެ.
މިލޭ ވަނީ ބްރެޒިލްގެ ސުޕްރީމް ފެޑެރަލް ކޯޓުގެ މިނިސްޓަރު އަލެކްސަންޑްރޭ ޑި މޮރައިސްއަށް ވެސް ހުތުރު ބަސްތަކެއް ގޮވައިފައެވެ. އެއީ ކުރީގެ ރައީސް ޖައިރް ބޮލްސޮނާރޯއާ ބައްދަލުކުރުމުގެ ފުރުސަތު މިލޭއަށް ނުދިނުމުންނެވެ. ބޮލްސޮނާރޯ މިހާރު ހުންނެވީ ގައުމަށް ޣައްދާރުވުމުގެ ކުށުގައި 27 އަހަރުގެ ޖަލު ހުކުމެއް ތަންފީޒު ކުރެއްވުމުގެ ގޮތުން ގޭ ބަންދުގައެވެ.
ބްރެޒިލްގެ ސުޕްރީމް ފެޑެރަލް ކޯޓުގެ ރައީސް، މިނިސްޓަރު އެޑްސަން ފާޗިން ވިދާޅުވީ، މިލޭގެ މިބަސްމަގަކީ "ބްރެޒިލްގެ ފަސްގނޑުގައި ހުރެ، އެ ގައުމުގެ އެންމެ މަތީ ކޯޓުގެ ފަނޑިޔާރަކަށް ދިން އިހުތިރާމު ކުޑަ ބަހެއް" ކަމަށެވެ.
އާޖެންޓީނާގެ އެތެރޭގެ ފާޑުކިޔުންތައް
މިލޭގެ މި އަމަލާ ގުޅިގެން އާޖެންޓީނާގެ ކުރީގެ ރައީސް އަލްބާޓޯ ފެނާންޑޭޒް ވިދާޅުވީ، "އަހަރެމެންގެ އަވަށްޓެރި ގައުމެއްގެ ރައީސަށާއި، އަހަރެމެންގެ އެންމެ ބޮޑު ވިޔަފާރި ބައިވެރިޔާއަށް އިހުތިރާމު ކުޑަކޮށް މުޚާތަބު ކުރުމަކީ މާފުކުރެވޭނެ ކަމެއް ނޫން" ކަމަށެވެ.
ބުއެނޯސް އައިރެސް ޕްރޮވިންސްގެ ގަވަރުނަރު އެކްސެލް ކިސިލޯފް ވިދާޅުވީ، މިލޭގެ މި އަމަލަކީ އާޖެންޓީނާގެ ރައްޔިތުންގެ ސުލޫކު ތަމްސީލުކުރާ ކަމެއް ނޫން ކަމަށެވެ. "މިފަދަ ހަރުކަށި އަމަލުތަކުގެ ސަބަބުން ބްރެޒިލްއާ އެކު އޮތް ވިޔަފާރީގެ ގުޅުމަށާއި، އިންވެސްޓްމަންޓުތަކަށް އަދި ވަޒީފާތަކަށް ނުރައްކާ އެބައޮތް،" ކިސިލޯފް ވިދާޅުވިއެވެ.
ލޫލާގެ ރައްދު
ރައީސް ލޫލާ މިކަމާ ގުޅޭގޮތުން އާންމުކޮށް ވަކި އެއްޗެއް ވިދާޅުވެފައި ނުވި ނަމަވެސް، 'ދަ ވޮޝިންޓަން ޕޯސްޓް' ގައި ލިޔުއްވި ލިޔުމެއްގައި ވަނީ، ބްރެޒިލްގެ ނިންމުންތައް ނިންމާނީ ހަމައެކަނި ބްރެޒިލްގެ ރައްޔިތުން ކަމަށާއި، ބޭރުގެ އެއްވެސް ފަރާތެއްގެ ނުފޫޒެއް ނުވަތަ އަޅުވެތިކަމެއް ބްރެޒިލްއަށް ނުހިނގާނެ ކަމަށް ވިދާޅުވެފައެވެ.
މި ހާދިސާ ހިނގާފައި މިވަނީ ބްރެޒިލްގެ ފޮރިން މިނިސްޓްރީން އެމެރިކާގެ ދެ އޮފިޝަލަކަށް ވިސާ ދިނުމަށް ދެކޮޅު ހެދިތާ އެއް ދުވަސް ފަހުންނެވެ. މިކަމާ ގުޅޭގޮތުން އެ މިނިސްޓްރީން ވަކި ސަބަބެއް ހާމަކޮށްފައެއް ނުވެއެވެ.
