ޖޯޑަންގެ އައްމާންގައި ހުންނަ އެމެރިކާގެ އެމްބަސީން މެދުއިރުމަތީގެ ސެކިއުރިޓީ ހާލަތާ މެދު އިންޒާރުދީ، މަސްރަޙު އިތުރަށް ގޯސްވެދާނެތީ އެ ސަރަހައްދުގައި ތިބި އެމެރިކާ ރައްޔިތުން ވަގުތުން ފޭބުމަށާއި، އަދި މިދުވަސްވަރު މެދުއިރުމައްޗަށް ދަތުރުނުކުރުމަށް އިރުޝާދުދީފިއެވެ.
އެމްބަސީގެ ބަޔާނުގެ މުހިންމު ނުކާތައް:
-
ދަތުރުފަތުރަށް ބުރޫއެރުން: މެދުއިރުމަތީގެ ހާލަތު އޮތީ ވަރަށް ނާޒުކުކޮށް ކަމަށްވާތީ، ވައިގެ ސަރަހައްދުތައް ބަންދުކުރުމާއި، ފްލައިޓްތައް ކެންސަލްވުމުގެ ފުރުސަތު ބޮޑެވެ. ބައެއް އެއާލައިންތަކުން ވަނީ ފްލައިޓްތައް މެދުކަނޑާލާފައެވެ. އެހެންކަމުން މެދުއިރުމަތީގައި ތިބި އެމެރިކާ ރައްޔިތުން ވަގުތުން ފޭބުމަށް ތައްޔާރުވެގެން ތިބުމަށް ވަނީ އަންގާފައެވެ.
-
އީރާނުގެ ނުރައްކާ އަދި ޙަމަލާތައް: އީރާނުން ކުރިން އިންޒާރަކާ ނުލައި، މިހާތަނަށް ހަމަލާނުދޭ ސަރަހައްދުތަކަށް ހަމަލާ ދޭތީ، އީރާނުގެ އަމަލުތައް ހުންނާނެ ގޮތެއް ނޭނގޭ ކަމަށް އެމްބަސީން ބުނެއެވެ.
-
މުޅި ދުނިޔޭގައި ހުރި އެމެރިކާގެ މަސްލަހަތުތަކަށް ނުރައްކާ: އީރާނާއި އެގައުމުގެ އެހީގައި އުޅޭ ހަނގުރާމަވެރި ގްރޫޕްތަކުން މެދުއިރުމަތިން ބޭރުގައިވާ އެމެރިކާގެ ޑިޕްލޮމެޓިކް މިޝަންތަކަށާއި، ވިޔަފާރިތަކަށާއި، އެމެރިކާއާ ގުޅުންހުރި އެހެނިހެން ވަސީލަތްތަކަށް މުޅި ދުނިޔޭގެ ކޮންމެ ތަނެއްގައިވެސް ކޮންމެ އިރެއްގައި ވެސް ހަމަލާދީފާނެ ކަމުގެ އިންޒާރު ދީފައިވެއެވެ.
-
އާންމު ވަސީލަތްތަކަށް ހަމަލާދިނުން: އީރާނުން މިލިޓަރީ ތަންތަނުގެ އިތުރުން ތުހުމަތު ކުރެވޭ ވަސީލަތްތަކަށް ވެސް ހަމަލާދީފައިވާތީ، ޖޯޑަންގައި ހުންނަ މިލިޓަރީ ބޭސްތަކާ ކައިރިއަށް ނުދިއުމަށާއި، ރައްކާތެރިކަމުގެ ފިޔަވަޅުތައް ވަރުގަދަކުރުމަށް އެދިފައިވެއެވެ.
