ޚާއްޞަ ޓެކްނޮލޮޖީގެ ޢިލްމު ކުރިއަރުވައި ދިރާސާކުރާ ފަރާތްތައް ބާރުވެރިކުރުމުގެ މަޤުޞަދުގައި ފަސްވަނަ ނެނޯޓެކްނޮލޮޖީ ސަމަރ ސްކޫލް ޖުލައި 23 ވަނަ ދުވަހު ތެހެރާންގައި ފަށައިފިއެވެ. މި ޕްރޮގްރާމް ދެ މަސް ދުވަހަށް ކުރިއަށްދާނެއެވެ.
މި ޙަރަކާތުގެ މަޤުޞަދުތަކުގެ ތެރޭގައި ޒަމާނީ ތަޢުލީމީ އުޞޫލުތައް ފުޅާކުރުމާއި، ޓެކްނޮލޮޖީތައް ކުރިއެރުވުމާއި، ޚާއްޞަ ޤާބިލުކަން ހުރި މުވައްޒަފުން ތަމްރީނުކުރުމާއި، އަދި ޔުނިވަސިޓީތަކާއި، ސިނާޢަތްތަކާއި، ޓެކްނޮލޮޖީ މަރުކަޒުތަކުގެ މެދުގައި ފައިދާހުރި ގުޅުންތައް ޤާއިމުކުރުން ހިމެނެއެވެ.
ތަޢުލީމީ ޕްރޮގްރާމާއި ކަރިކިއުލަމް
މި ސަމަރ ސްކޫލުގައި ޚާއްޞަ 40 ވުރެ ގިނަ ތަމްރީނު ޕްރޮގްރާމާއި، 10 ސައިންޓިފިކް ވެބިނަރ ހިމެނެއެވެ.
މި ތަމްރީނުތައް ކުރިއަށް ގެންގޮސްދެނީ ޔުނިވަސިޓީތަކުގެ މަޝްހޫރު ޕްރޮފެސަރުންނާއި، ފެކަލްޓީ މެންބަރުން އަދި ނެނޯޓެކްނޮލޮޖީގެ މާހިރުންނެވެ.
ކަރިކިއުލަމްގައި ނެނޯޓެކްނޮލޮޖީގެ ޒަމާނީ މުހިންމު މައުޟޫޢުތައް ހިމެނޭއިރު، އެންމެ ފަހުގެ ސައިންޓިފިކް އަދި ޓެކްނޮލޮޖީގެ ކުރިއެރުންތަކާއި، އީޖާދުތަކާއި، ވިޔަފާރީގެ ފުރުޞަތުތަކާ ބެހޭގޮތުން ބައިވެރިންނަށް އުނގެނުމުގެ ފުރުޞަތު ލިބިގެންދެއެވެ.
ބައިނަލްއަޤްވާމީ ބައިވެރިވުމާއި އިޤްތިޞާދީ ކުރިއެރުން
ފާއިތުވި ހަތަރު އަހަރުގެ ތެރޭގައި، މި ސަމަރ ސްކޫލަށް އީރާނުގެ ދަރިވަރުންނާއި ބޭރު ޤައުމުތަކުގެ ދަރިވަރުންގެ ފަރާތުން ބޮޑު ތަރުހީބެއް ލިބިފައިވެއެވެ. މިހާތަނަށް 4،000 އަށްވުރެ ގިނަ ދަރިވަރުންނާއި، ބައިނަލްއަޤްވާމީ 50 އަށްވުރެ ގިނަ ދަރިވަރުން ވަނީ މި ސްކޫލުގެ ތަފާތު ތަޢުލީމީ ޕްރޮގްރާމްތަކުގެ ފައިދާ ހޯދާފައެވެ.
އަދި ޤައުމުގެ ނެނޯޓެކްނޮލޮޖީ ދާއިރާގައި 430 އަށްވުރެ ގިނަ ކުންފުނި ހަރަކާތެރިވަމުންދާއިރު، ނެނޯ ޓެކްނޮލޮޖީގެ ސެޓްފިކެޓް ލިބިފައިވާ 1،960 އަށްވުރެ ގިނަ އުފެއްދުންތައް ވަނީ ބާޒާރަށް ނެރެފައެވެ.
އީރާންގެ އެތެރޭގެ ޤާބިލުކަމަށް ބަރޯސާވެގެން އީރާނުގައި ކުރިއަށްދާ މި މަސައްކަތަކީ ހަމައެކަނި ސައިންޓިފިކް ލަނޑުދަނޑިއަކަށްވުރެ ބޮޑަށް، ސިނާޢީ އަދި އިޤްތިޞާދީ ބޮޑު ކުރިއެރުމެކެވެ. މިގޮތުން މި އުފެއްދުންތަކުގެ ޖުމްލަ ވިއްކުން 970 ޓްރިލިއަން ރިޔާލަށް (554 މިލިއަން ޑޮލަރު) އަރައެވެ.
