ރާއްޖޭގެ ތަޢުލީމީ ޙަޔާތުގެ ނާރެސް، މަޖީދިއްޔާ ސްކޫލަށް 100 އަހަރު ފުރުމުގެ ތާރީޚީ މުނާސަބަތާ ދިމާކޮށް، އެ ސްކޫލުގެ މާޟީއާއި މުސްތަޤުބަލު ގުޅުވައިދިނުމުގެ މަޤުޞަދުގައި "މަޖީދިއްޔާ ޓޯކްސް" ގެ ނަމުގައި ޚާއްޞަ ސިލްސިލާ ޕްރޮގްރާމެއް އިފްތިތާޙުކޮށްފިއެވެ.
މި ސިލްސިލާގެ ފުރަތަމަ ބައްދަލުވުމުގައި މެހުމާނެއްގެ ގޮތުން ބައިވެރިވެވަޑައިގެންނެވީ، އެ ސްކޫލުގެ އިސް ދަރިވަރެއްގެ އިތުރުން ކުރީގެ ތަޢުލީމީ ވަޒީރު، އަދި މިހާރު ދިވެހިރާއްޖޭގެ ޤައުމީ ޔުނިވަރސިޓީގެ ޗާންސެލަރ ޑރ. މަޙުމޫދު ޝައުޤީއެވެ. 1983 ވަނަ އަހަރު މަޖީދިއްޔާއިން ގްރެޖުއޭޓްވެވަޑައިގެންނެވި ޑރ. ޝައުޤީ ވަނީ، އޭރުގެ ތަޢުލީމީ މާޙައުލުގައި ދިމާވި ގޮންޖެހުންތަކާއި، ކާމިޔާބީއާ ހަމައަށް ތަނަވަސްވި މަގުތަކުގެ ހަނދާންތައް މިހާރުގެ ދަރިވަރުންނާ ޙިއްޞާކުރައްވާފައެވެ.
"މަޖީދިއްޔާ ސްކޫލަކީ ދަންމަރެއް. މުޅި ރާއްޖޭގައި މިއަދު ފެތުރިފައިމިވާ ސަރުކާރުގެ ތަޢުލީމީ ނިޒާމު ފެށިގެން އައީ މަޖީދިއްޔާ ސްކޫލުން،" ޤައުމީ ތަޢުލީމުގެ ބިންގަލަށް އަލިއަޅުވާލައްވަމުން ޑރ. ޝައުޤީ ވިދާޅުވިއެވެ. "މަޖީދިއްޔާގެ ކަރިކިއުލަމްއާއި އިތުރު ހަރަކާތްތައް ނަމޫނާއަކަށް ބަލައިގެން މުޅި ރާއްޖެއަށް ތަޢުލީމު ފަތުރަމުން ދިޔައީ." ޑރ ޝައުގީ ވިދާޅުވި އެވެ
ސްކޫލުގެ ޕްރިންސިޕަލް އަޙުމަދު މުޖާހިދު ފާހަގަކުރެއްވި ގޮތުގައި، ކޮންމެ މަހަކު ކުރިއަށްގެންދަން ނިންމާފައިވާ މި ޕްރޮގްރާމްގެ މައިގަނޑު ބޭނުމަކީ ސްކޫލުގެ ފަޚުރުވެރި ލެގަސީ އާ ދަރިފަސްކޮޅަށް ފޯރުކޮށްދިނުމެވެ. އިހުގެ ދަރިވަރުންގެ ކާމިޔާބީގެ ވާހަކަތަކުން މިހާރުގެ ދަރިވަރުންނަށް ހިތްވަރާއި އިރުޝާދު ލިބިގެންދާނެކަމަށް އޭނާ ވިދާޅުވިއެވެ.
"ކުރީގެ ދަރިވަރުންނާއި މިހާރުގެ ދަރިވަރުން ގުޅުވައިދިނުން މި ޕްރޮގްރާމްގެ މަޤުޞަދަކީ. އަދި އެ ދަރިވަރުން އިންސްޕަޔަރކޮށް މޯޓިވޭޓްކުރުވުން،" މުޖާހިދު ވިދާޅުވިއެވެ.
ތަފާތު ދާއިރާތަކުން ޤައުމީ ފެންވަރުގައި ފާހަގަކޮށްލެވޭ އިސް ދަރިވަރުންނާއި ގިނަ އަދަދެއްގެ އާންމު ދަރިވަރުން ބައިވެރިވި މި ޙަރަކާތަކީ، ޤައުމީ ތަރައްޤީގައި މަޖީދިއްޔާއިން އަދާކުރި މުހިންމު ދައުރު އާލާކޮށް، ކުރިއަށް އޮތް ޖީލުތަކަށް އެ ރޫޙު منتقلކުރުމަށް ފެށުނު އާ ޞަފުޙާއެކެވެ.
