އިންޑިއާގެ އާންމު ފައިސާގެ މުއާމަލާތްތަކަށް ބޮޑު އިންގިލާބެއް ގެނުވި ޔުނިފައިޑް ޕޭމަންޓްސް އިންޓަފޭސް (ޔޫޕީއައި) އުފެދުނުތާ 10 އަހަރު ފުރުނުއިރު، އެ ނިޒާމު މެދުވެރިކޮށް ދުވާލެއްގެ މައްޗަށް 660 މިލިއަނަށްވުރެ ގިނަ މުއާމަލާތް ހިންގާ ބިޔަ މާލީ ވިއުގައަކަށް އެ ނިޒާމު ބަދަލުވެއްޖެއެވެ. 2016 ވަނަ އަހަރުގެ އޯގަސްޓް 25 ގައި ތައާރަފުކުރި މި ނިޒާމަކީ މިއަދު އިންޑިއާގެ އިޤްތިޞާދުގެ މައިބަދައަށް ވަނީ ވެފައެވެ.
އިންޑިއާގެ ފިނޭންސް މިނިސްޓްރީން އާންމުކުރި ތަފާސްހިސާބުތަކަށް ބަލާއިރު، ޔޫޕީއައި ތައާރަފުކުރި ފުރަތަމަ މާލީ އަހަރު (2016-17) ގައި ހިންގާފައިވަނީ އެކުޖުމްލަ 17.8 މިލިއަން (1.78 ކުރޯޑު) މުއާމަލާތެވެ. ނަމަވެސް، ނިމުނު 2025-26 މާލީ އަހަރު ނިމުނުއިރު، މި އަދަދު ވަނީ 241.62 ބިލިއަން (24,162 ކުރޯޑު) މުއާމަލާތަށް އުފުލިފައެވެ. މިއީ 10 އަހަރުގެ ތެރޭގައި 13,000 ގުނައިގެ ބޮޑު ކުރިއެރުމެކެވެ. މުއާމަލާތްތަކުގެ އަދަދުގެ އިތުރުން ފައިސާގެ މިންވަރަށް ބަލާއިރު، ފުރަތަމަ އަހަރު ބަދަލުކުރެވުނު 840 މިލިއަން އެމެރިކާ ޑޮލަރު (70 ބިލިއަން ރުޕީސް)، 2025-26 ވަނަ އަހަރު ވަނީ 3.7 ޓްރިލިއަން އެމެރިކާ ޑޮލަރު (314 ޓްރިލިއަން ރުޕީސް) އަށް ވުރެ އިތުރުވެފައެވެ.
ރިޒާވް ބޭންކް އޮފް އިންޑިއާ (އާރްބީއައި) ގެ ބެލުމުގެ ދަށުން ނެޝަނަލް ޕޭމަންޓްސް ކޯޕަރޭޝަން އޮފް އިންޑިއާ (އެންޕީސީއައި) އިން އުފެއްދި މި ނިޒާމުގައި ފުރަތަމަ ބައިވެރިވީ އެންމެ 44 ބޭންކެވެ. ނަމަވެސް 2026 ވަނަ އަހަރާ ހަމައަށް އައިއިރު، ޔޫޕީއައި ވިއުގައާ ގުޅިފައިވާ ބޭންކުތަކުގެ އަދަދު ވަނީ 703 އަށް އަރާފައެވެ.
މި ހިނގާ 2026 ވަނަ އަހަރަކީ ޔޫޕީއައިގެ ތާރީޚުގައި އެންމެ ގިނަ މުއާމަލާތްތައް ހިންގި އަހަރެވެ. އެގޮތުން، މި އަހަރުގެ މެއި މަހު 23.2 ބިލިއަން މުއާމަލާތް ހިންގާފައިވާއިރު، ޖުލައި މަހު އެ އަދަދު ވަނީ 23.66 ބިލިއަނަށް އުފުލި، އެއް މަސްދުވަހުގެ ތެރޭގައި އެންމެ ގިނަ މުއާމަލާތް ހިންގުމުގެ އާ ރެކޯޑެއް ގާއިމުކޮށްފައެވެ.
| މާލީ އަހަރު | އަހަރީ މުއާމަލާތުގެ އަދަދު | މުއާމަލާތުގެ ޖުމްލަ އަމާޒު (ރުޕީސްއިން) | ބައިވެރިވި ބޭންކުތައް |
| 2016–17 | 17.8 މިލިއަން | 70 ބިލިއަން | 44 |
| 2025–26 | 241.62 ބިލިއަން | 314 ޓްރިލިއަން | 703 |
ޔޫޕީއައިގެ ސަބަބުން އިންޑިއާގެ ކުދި އަދި ބޮޑެތި ވިޔަފާރިތަކުގެ އިތުރުން އާންމު ފަރުދުންގެ މެދުގައި ފައިސާގެ މުއާމަލާތްތައް ކުރުން ވަނީ އިންތިހާއަށް ފަސޭހަވެފައެވެ. އިންޓަނޭޝަނަލް މަނިޓަރީ ފަންޑް (އައިއެމްއެފް) އިން ވަނީ ޔޫޕީއައިއަކީ ދުނިޔޭގައި އޮތް އެންމެ ބޮޑު "ރިއަލް-ޓައިމް" ޕޭމަންޓް ސިސްޓަމްގެ ގޮތުގައި ކަނޑައަޅާފައެވެ. އައިއެމްއެފްގެ ތަފާސްހިސާބުތައް ދައްކާ ގޮތުގައި، 2025 ވަނަ އަހަރު މުޅި ދުނިޔޭގައި ހިންގުނު ވަގުތުން ފައިސާ ދެއްކުމުގެ މުއާމަލާތްތަކުގެ 49 އިންސައްތަ ހިއްސާކުރަނީ އިންޑިއާގެ ޔޫޕީއައި ނިޒާމެވެ.
އިންޑިއާގެ މި އިންގިލާބީ ބަދަލު މިހާރު ވަނީ ގައުމުގެ އިމުން ބޭރަށްވެސް ފުޅާވެފައެވެ. އެގޮތުން، ދިވެހިރާއްޖެ، ޔޫއޭއީ، ފްރާންސް، ބޫޓާން، ސްރީލަންކާ، ނޭޕާލް، ސިންގަޕޫރު، މޮރިޝަސް، ގަތަރު، ކެމްބޯޑިއާ އަދި ގްރީސް ހިމެނޭހެން ދުނިޔޭގެ 11 ގައުމެއްގައި މިހާރު ޔޫޕީއައިގެ ޚިދުމަތް ބޭނުންކުރެވެއެވެ.
އިންޑިއާ ސަރުކާރުން ބުނެފައިވަނީ ކުރިއަށް އޮތް އަހަރަކީ ޔޫޕީއައިގެ ޚިދުމަތް އިތުރަށް ފުޅާކޮށް، އާ ޓެކްނޮލޮޖީތަކާއެކު މާލީ ދާއިރާއަށް އިތުރު ލުއިފަސޭހަތަކެއް ގެނެސްދޭނެ ދަހަރެއް ކަމަށެވެ. ޚިދުމަތް ބޭނުންކުރާ އާންމުންނަށް ޔޫޕީއައި ހިލޭ ފޯރުކޮށްދިން ނަމަވެސް، ކުރިއަށް އޮތް ތަނުގައި ބައެއް ވިޔަފާރިވެރިންގެ އަތުން ކުޑަ ފީއެއް ނެގުމާ މެދު ވިސްނަމުންދާ ކަމަށް ސަރުކާރުން ވަނީ އިޝާރާތްކޮށްފައެވެ.
