ޖަރުމަނުވިލާތުގެ ކޮލޯން ސިޓީގެ ރެސްޓޯރެންޓެއްގެ ބޭރުގައި ހުރި އަންހެން ކުއްޖަކަށް، މާވެލްގެ މަޝްހޫރު ސުޕަރހީރޯ "އަޔަން މޭން" ގެ ސިފައަށް ފަރުމާކޮށްފައިވާ ރިމޯޓުން ކޮންޓްރޯލްކުރާ އިންސާނުންނާ ވައްތަރު ރޮބޮޓަކުން ޖިންސީ ގޯނާކުރި މައްސަލައެއް ފެންމަތިވެ، ފުލުހުން އެ ރޮބޮޓު ހައްޔަރުކޮށް ފިއެވެ.
ކޮލޯން ސިޓީގެ ފުލުހުން ނެރުނު ބަޔާނެއްގައިވާ ގޮތުން، އާދީއްތަ ދުވަހުގެ ވަގުތެއްގައި ހިނގި މި ހާދިސާގައި، އެ ރޮބޮޓު ވަނީ އުމުރުން 16 އަހަރުގެ އަންހެން ކުއްޖާގެ މޭމަތީގައި އަތްލައި، ޖިންސީ ގޯނާގެ އަމަލުތަކެއް ހިންގާފައެވެ. މި ހާދިސާ ހިނގާދިޔަ ވަގުތު އެ ސަރަހައްދުގައި ތިބި މީހުންނަށާއި މީސް މީޑިއާގެ ޒަރީއާއިން ބައެއް ފަރާތްތަކަށް މި މަންޒަރު ވަނީ ލައިވްސްޓްރީމްކޮށް ފެނިފައެވެ. ސޯޝަލް މީޑިއާގައި ދައުރުވަމުންދާ ވީޑިއޯ ފުޓޭޖްތަކުން ފެންނަ ގޮތުގައި، ރިމޯޓުން ހިންގާ އެ ރޮބޮޓު ވަނީ އެ ކުއްޖާގެ ހަށިގަނޑުގައި ނަހަމަ ގޮތަކަށް އަތްލައި، ޖިންސީ ގޯނާގެ ހަރަކާތްތަކެއް ކޮށްފައެވެ.
ޒަމާނީ ޓެކްނޮލޮޖީގެ ވަސީލަތްތައް ބޭނުންކޮށްގެން އުފައްދާފައިވާ މިފަދަ އާލާތްތައް މުޖުތަމައުގެ ތެރެއަށް ނުކުންނަ އިރު، އާންމުންގެ ރައްކާތެރިކަން ކަށަވަރުކުރުމާ މެދު މިހާރު ވަނީ ބޮޑެތި ސުވާލުތަކެއް އުފެދިފައެވެ. ޔޫރަޕްގެ ޤައުމުތަކުގައި އާޓިފިޝަލް އިންޓެލިޖެންސާއި ރޮބޮޓިކްސްގެ ނިޒާމުތައް ފުޅާވަމުންދާ ދަނޑިވަޅެއްގައި، މިފަދަ ޖަރީމާއެއް ހިންގުމަކީ ކަންބޮޑުވުން ލިބުނު ކަމެކެވެ.
ފުލުހުން ހާމަކުރިގޮތުގައި، މި މައްސަލަ ސީރިއަސް މައްސަލައެއްގެ ގޮތުގައި ބަލަމުންދާއިރު، އެ ރޮބޮޓު އުފެއްދި ފަރާތްތަކާއި، އެ ވަގުތު އެއަށް ކޮންޓްރޯލް ދީފައިވާ ފަރާތްތައް ހޯދުމުގެ މަސައްކަތް މިހާރު އަންނަނީ ކުރަމުންނެވެ. އަދި މިފަދަ ނުރައްކާތެރި އަމަލުތައް ތަކުރާރުވިޔަ ނުދިނުމަށްޓަކައި ޤާނޫނީ ފިޔަވަޅުތައް ހަރުކަށިކުރާނެ ކަމަށް ކަމާބެހޭ އިދާރާތަކުން ބުނެފައިވެއެވެ.
