ކުޑަ ކުދިންނާ ބެހޭ އދގެ އިދާރާ ޔުނިސެފްއިން ނެރެފައިވާ އައު ރިޕޯޓެއްގައިވާ ގޮތުން، ޕާކިސްތާންގައި ކުޑަކުދިންނަށް އަމާޒުކޮށްގެން އިންޓަނެޓް މެދުވެރިކޮށް ހިންގާ ޖަރީމާތަކާއި ގަނާ ކުރުން ވަނީ މީގެ ކުރިން ނުދެކޭހާ މިންވަރަކަށް މައްޗަށް ގޮސްފައެވެ. "ޑިސްރުޕްޓް ހާމް ޕާކިސްތާނު" ގެ ނަމުގައި އެކުލަވައިލާފައިވާ މި ރިޕޯޓުގައި ފާހަގަކޮށްފައިވާ ގޮތުގައި، ޑިޖިޓަލް ޓެކްނޮލޮޖީގެ ކުރިއެރުމާއެކު ކުޑަކުދިން އޮންލައިން މާހައުލުގައި ހޭދަކުރާ ވަގުތު އިތުރުވެފައިވާއިރު، އެ ކުދިންނަށް އަމާޒުކޮށްގެން ހިންގާ މައުލާުމާތުގެ ރަސްމަގުގެ ގަނާ ކުރުމާއި ބްލެކްމެއިލް ކުރުމުގެ އިތުރުން ޖިންސީ ގޮތުން ނަހަމަގޮތުގައި ބޭނުންކުރުމުގެ މައްސަލަތައް ވަނީ ނުރައްކާތެރި މިންވަރަކަށް އިތުރުވެފައެވެ. މިފަދަ ނުރައްކާތަކުގެ ސަބަބުން ކުދިންގެ ނަފުސާނީ ދުޅަހެޔޮކަމަށާއި އިޖުތިމާޢީ ދިރިއުޅުމަށް ފޫނުބެއްދޭވަރުގެ ގެއްލުންތަކެއް ލިބެމުންދާކަމަށް ކަމާބެހޭ މާހިރުންނާ ހަވާލާދީ އިންޒާރު ދީފައި ވެއެވެ.
މި ރިޕޯޓުގައި އިތުރަށް ބަޔާން ކޮށްފައިވާ ގޮތުގައި، އިންޓަނެޓްގެ ޒަރީއާއިން ކުޑަކުދިންގެ ޒާތީ މައުލޫމާތު ވަގަށް ނަގައި، އެ ކުދިން ބިރުދެއްކުމުގެ ޢަމަލުތައް ހިންގާ ފަރާތްތަކުގެ ނެޓްވޯކްތައް ވަނީ ފުޅާވެފައެވެ. ޚާއްޞަކޮށް، ޒުވާން އުމުރުފުރައިގެ ކުދިންނަށް އަމާޒުކޮށްގެން މުނިފޫހިފިވުމުގެ އެކި ވަސީލަތްތަކާއި މީސް މީޑިއާ ޕްލެޓްފޯމްތައް މެދުވެރިކޮށް ކުރާ ނޭދެވޭ އަސަރުތައް ހުއްޓުވުމަށް ޤާނޫނީ ނިޒާމުތައް މިހާރަށް ވުރެން ބޮޑަށް ހަރުދަނާ ކުރުމަށް ގޮވާލާފައި ވެއެވެ.
ޕާކިސްތާނުގެ ގިނަ އާއިލާތަކަކަށް އިންޓަނެޓް ރައްކާތެރިކަމާ ގުޅޭގޮތުން ހޭލުންތެރިކަން ކުޑަ ކަމަށްވެސް ފާހަގަ ކޮށްފައި ވެއެވެ. އަދި އެކަމުގެ ސަބަބުން، ކުދިންނަށް ލިބޭ އަނިޔާތައް އާއިލާތަކަށް ނުވަތަ ފުލުހުންނަށް ރިޕޯޓުކުރާ މިންވަރު މަދުވުމަކީ ި ބާވަތުގެ މައްސަލަތައް އިތުރަށް ގޯސްވެގެންދާ ސަބަބެއް ކަމަށް ރިޕޯޓުގައި ފާހަގަކޮށްފައިވެއެވެ. މީގެ ސަބަބުން ކުށްވެރިންނަށް ޖިނާއީ ޒިންމާއިން ރެކިގަތުމުގެ ފުރުޞަތު ބޮޑުވެގެންދެއެވެ.
މި މައްސަލައަށް ދާއިމީ ހައްލެއް ހޯދުމަށްޓަކައި، ސަރުކާރުގެ މުއައްސަސާތަކާއި، ޓެކްނޮލޮޖީ ކުންފުނިތަކުގެ އިތުރުން މަދަނީ ޖަމުޢިއްޔާތައް ގުޅިގެން ހަރުދަނާ ފިޔަވަޅުތަކެއް އަޅަންޖެހޭ ކަމަށް ޔުނިސެފުން ގޮވާލާފައިވެއެވެ.
ޚާއްޞަކޮށް ޑިޖިޓަލް ދާއިރާގެ ތަޢުލީމުގެ ތެރެއިން ކުދިންނަށް އޮންލައިން ރައްކާތެރިކަމުގެ މައުލޫމާތު ފޯރުކޮށްދިނުމާއި، ސައިބަރ ކުށްތައް ހުއްޓުވުމަށް ފުލުހުންގެ ޤާބިލުކަން އިތުރު ކުރުމަށް ވެސް ގޮވާލާފައި ވެއެވެ.
މުސްތުޤުބަލުގައި ކުޑަކުދިންނަށް ރައްކާތެރި ޑިޖިޓަލް މާހައުލެއް ޤާއިމުކޮށްދިނުމަށްޓަކައި ޤާނޫނީ އޮނިގަނޑުތައް އިތުރަށް ހަރުކަށިކޮށް، ތަންފީޒުކުރުން އަވަސްކުރުމަށް މި ރިޕޯޓުން ބާރުއަޅާފައިވެއެވެ.
