ޗައިނާއިން ކްރިޓިކަލް މިނަރަލްސް އަދި ނާދިރު މައުދަން އެކްސްޕޯޓްކުރުން ކޮންޓްރޯލްކުރުމަށް އަޅަމުންދާ ފިޔަވަޅުތަކާއެކު ދުނިޔޭގެ އިގްތިސާދަށް ބޮޑެތި މައްސަލަތަކެއް ކުރިމަތިވެފައިވަނިކޮށް، އެމެރިކާގެ ރައީސް ޑޮނަލްޑް ޓްރަމްޕް އާއި ޗައިނާގެ ރައީސް ޝީ ޖިންޕިންއާ ދެމެދު ބޭއްވެވި މަޝްވަރާތަކުގައި މި މައްސަލަ އޮތީ ބޮޑު ބަހުސަކަށް ވެފައެވެ.
ދުނިޔޭގެ އެކި ކަންކޮޅުތަކުގައި އުފައްދާ އިލެކްޓްރޯނިކްސް ސާމާނާއި، ޒަމާނީ އަސްކަރީ ހަތިޔާރުތައް އުފެއްދުމަށް ކޮންމެހެން ބޭނުންވާ ރެއާ އާރްތު ސަޕްލައި ޗޭންގެ ބޮޑު ބައެއް ކޮންޓްރޯލްކުރަމުންދަނީ ޗައިނާއިންނެވެ. އެގޮތުން ދުނިޔޭގެ ބާޒާރަށް ނެރޭ ނާދިރު މައުދަނުގެ ގާތްގަނޑަކަށް 60 އިންސައްތަ މާއްދާ ނަގަނީ ޗައިނާގެ ބިމުންނެވެ. އަދި ޗައިނާއިން ނަގާ ރޯ މެޓީރިއަލްސް، ބޭނުންކުރެވޭ ފަދަ މައުދަނަށް ބަދަލުކުރުމުގެ ނުވަތަ ސާފުކޮށް ރިފައިންކުރުމުގެ ގާބިލުކަމުގެ 90 އިންސައްތަ ހިއްސާކުރަނީވެސް އެ ގައުމުންނެވެ. މީގެ އިތުރުން އިލެކްޓްރޯނިކްސް އާއި ސިފައިން ބޭނުންކުރާ ވަސީލަތްތަކަށް ބޭނުންވާ އެޑްވާންސްޑް މެގްނެޓްސްގެ 94 އިންސައްތަ އުފައްދަނީވެސް ޗައިނާއިންނެވެ.
ޗައިނާގެ މި ނުފޫޒުގެ ސަބަބުން ދުނިޔޭގެ އިގްތިސާދީ އަދި ސަލާމަތީ މަސްރަހަށް ބޮޑެތި އަސަރުތަކެއް ކުރަމުންދާއިރު، ބައިނަލްއަގުވާމީ މައިދާން ގައި މިކަމާ މެދު ކަންބޮޑުވުން ވަނީ އިތުރުވެފައެވެ.
ޔޫރަޕިއަން ޔޫނިއަން (އީޔޫ) އިންސްޓިޓިއުޓް ފޯ ސެކިއުރިޓީ ސްޓަޑީޒްގެ ޓެކްނޮލޮޖީ އެންޑް އިކޮނޮމިކް ސެކިއުރިޓީ ޕޮލިސީ އެނަލިސްޓް ޔޯރިސް ޓީރް، ކައުންސިލް އޮން ފޮރިން ރިލޭޝަންސްއަށް ލިޔުއްވި "ޑިސްމެންޓްލިންގް ޗައިނާސް ސަޕްލައި-ޗޭން ވެޕަން: އަ ޓްރާންސްއެޓްލާންޓިކް ސްޓްރެޓެޖީ ފޯ ކްރިޓިކަލް މިނަރަލްސް" މި ދިރާސާގައި ފާހަގަކުރައްވާފައިވާ ގޮތުގައި، ޗައިނާގެ މި ހިސާރުކުރުން ނައްތާލުމަށްޓަކައި އެޓްލާންޓިކްގެ ދެފަރާތުގެ ގައުމުތަކުން ޔޫރަޕާއި އެމެރިކާއިން ގުޅިގެން ޚާއްސަ ސްޓްރެޓެޖީ އެއް އެކުލަވާލަންޖެހެއެވެ.
ޑޮއިޗެ ވެލެ މީޑިއާއަށް ދެއްވި އިންޓަވިއުއެއްގައި ޔޯރިސް ޓީރް ވިދާޅުވީ، ޗައިނާއިން މި މާއްދާތައް އެކްސްޕޯޓްކުރުން ކޮންޓްރޯލްކުރުމަކީ ދުނިޔޭގެ ސަޕްލައި ޗޭން ހަތިޔާރަކަށް ހެދުން ފަދަ ކަމެއް ކަމަށެވެ. އަދި ދުނިޔޭގެ ބާޒާރުގައި ޗައިނާއަށް އޮތް މާކެޓް ގެ ނުފޫޒު ކުޑަކުރުމަށްޓަކައި އެމެރިކާއާއި ޔޫރަޕުގެ ގައުމުތަކުން ގުޅިގެން މަސައްކަތްކުރުމަކީ ކޮންމެހެން ބޭނުންތެރި ކަމެއް ކަމަށް އޭނާ ފާހަގަކުރެއްވިއެވެ.
އެމެރިކާގެ ރައީސް ޓްރަމްޕް އާއި ޗައިނާގެ ރައީސް ޝީގެ ދެމެދުގައި ކުރިއަށްދިޔަ މަޝްވަރާތަކުގައި، ޗައިނާއިން އަޅަމުންދާ އެކްސްޕޯޓް ކޮންޓްރޯލްތަކުގެ ސަބަބުން އެމެރިކާގެ ޓެކްނޮލޮޖީ ކުންފުނިތަކަށާއި ސިފައިން ގެ ސައިނިކް ވަސީލަތްތައް އުފެއްދުމަށް ކުރާ އަސަރުތަކާ މެދު ފުޅާދާއިރާއެއްގައި ވާހަކަދެކެވުނެވެ. މި ބައްދަލުވުމަކީ ދެ ގައުމުގެ ދެމެދުގައި އޮތް ވިޔަފާރީގެ ނުތަނަވަސް ކަމާއި އިގްތިސާދީ ޚިލާފް ތަކަށް ހައްލެއް ހޯދުމަށް ކުރެވުނު މުހިންމު މަސައްކަތެކެވެ.
ދުނިޔޭގެ ގައުމުތަކުން މިހާރު ދަނީ ޗައިނާއަށް ބަރޯސާވާ މިންވަރު ކުޑަކުރުމަށްޓަކައި އެހެން ގައުމުތަކުން މިފަދަ މައުދަންތައް ހޯދުމަށާއި، ރިސައިކަލްކުރުމުގެ ނިޒާމުތައް ހަރުދަނާކުރުމަށް ސްޓްރެޓެޖީ ތައް އެކުލަވަޅަމުންނެވެ. ނަމަވެސް، ޗައިނާގެ ރިފައިނިންގް ކެޕޭސިޓީއާއި އެޑްވާންސްޑް މެގްނެޓްސް އުފެއްދުމުގެ ގާބިލުކަން ހުރި މިންވަރަށް ބަލާއިރު، ކުރު މުއްދަތެއްގެ ތެރޭގައި މި ނުފޫޒުން ޗައިނާގެ ފާޑު ކިޔުންތެރިން މިންޖުވުމަކީ ދަތިކަމެއް ކަމަށް ބެލެވެއެވެ.
