ނިއުޔޯކުގައި މީގެ ކުރިން ކުޅިވަރާއި ފިލްމީ ދާއިރާގެ ތެރެއިން މުސްލިމް ފިލްމު ފެސްޓިވަލެއް ބޭއްވިފައެއް ނުވެއެވެ. ނަމަވެސް މިހާރު މިއޮތީ އެކަން ބަދަލުވެފައެވެ. އޮކްޓޯބަރު 11 ވަނަ ދުވަހު މެންހެޓަންގެ އެސްވީއޭ ތިއޭޓަރުގައި "ނިއުޔޯކް މުސްލިމް ފިލްމު ފެސްޓިވަލް" އިފްތިތާޙުކުރުމަށް ވަނީ ހަމަޖެހިފައެވެ. މި ފެސްޓިވަލުގެ މަޤްޞަދަކީ ފުރުޞަތު މަދު، ނަމަވެސް އުފެއްދުންތެރި މުސްލިމް ފަންނާނުންގެ އަޑާއި ތަފާތު އީޖާދީ ޚިޔާލުތަކަށް ސަމާލުކަމެއް ހޯދައިދިނުމެވެ.
"މި ފެސްޓިވަލުގެ އަޞްލު ގުޅިފައިވަނީ އުފާވެރިކަމާ,"މި ފެސްޓިވަލް ގެނަސްދޭ އެކަކު ކަމަށްވާ ނަވާލް މުބީން ބުނެފައިވެއެވެ. މުބީންއަކީ ނިއުޔޯކަށް ނިސްބަތްވާ ޑައިރެކްޓަރ އަދި ޕްރޮޑިއުސަރެކެވެ. އޭނާ މިހާރު މަސައްކަތް ކުރަމުންދަނީ "ލޮސްޓް އިން ސްޕޭސް" ނަމަކަށްކިޔާ ޕްރޮޑަކްޝަން ކުންފުނީގެ އެސޯސިއޭޓް ޕްރޮޑިއުސަރެއްގެ ގޮތުގައެވެ.
"އަޅުގަނޑުމެންގެ އެންމެ ބޮޑު މަޤްޞަދަކީ ވާހަކަތަކުގެ ޒަރީޢާއިން އުފާވެރިކަމާއި، ވާހަކައްދެއްކުމާއި، އަދި އެކުވެރިކަން އާލާކުރުން. މުސްލިމުންނަކީ ތަފާތު ސަޤާފަތްތަކާއި، އަމިއްލަ ވަންތަކަމާއި، އެކި ތަޖުރިބާތަކުން ފުރިގެންވާ ދުނިޔޭގެ ބޮޑު އާއިލާއެއް. މުސްލިމުންގެ ވަކި އެކަކު ކިޔައިނުދޭ ވާހަކައެއް ނޯންނާނެ. ކޮންމެ މުސްލިމެއްގެ ވާހަކައަކީވެސް އިއްވަންޖެހޭ އަދި އަގުހުރި ވާހަކައެއް. އަދި ކޮންމެ ޚިޔާލަކުން އަޅުގަނޑުމެންގެ ސަޤާފީ މުއްސަނދިކަން އިތުރުކޮށްދޭ," މުބީން އިތުރަށް ބުންޏެވެ.
މި ފެސްޓިވަލް މުބީންއާއެކު ކޯ-ފައުންޑް ކުރަނީ ޖުސެއްޕޭ ދެ މަތޭއިސް އެވެ. އޭނާއަކީވެސް ނިއުޔޯކުގެ ފިލްމު އުފެއްދުންތެރިއެކެވެ. އަދި "ލޮސްޓް އިން ސްޕޭސް" ގެ މީޑިއާ މެނޭޖަރު އަދި ލީޑް އެސިސްޓަންޓް އެޑިޓަރެވެ.
އެކި ބާވަތުގެ 12 ކުރު ފިލްމު މި އެއްދުވަހުގެ ފެސްޓިވަލުގައި ދެއްކުމަށް ވަނީ ހަމަޖެހިފައެވެ. މި ފެސްޓިވަލްގައި ދައްކާ ފިލްމުތަކުގެ ތެރޭގައި ޑޮކިއުމެންޓަރީ، ޑްރާމާ، ކޮމެޑީ، އެނިމޭޝަން އަދި އެކްސްޕެރިމެންޓަލް ފިލްމުތައް ހިމެނެއެވެ.
މި ހަރަކާތް ފެށޭނީ ފިލްމު އުފައްދާ ފަރާތްތަކާއި އިންޑަސްޓްރީގެ މެހުމާނުންނަށް ބާއްވާ ރިސެޕްޝަނަކުންނެވެ. އެއަށްފަހު، ކޮންމެ ބްލޮކެއްގައި 6 ފިލްމު ހިމެނޭ ގޮތަށް އެއް ގަޑިއިރުގެ ދެ ބްލޮކްގެ ފިލްމު ދެއްކުން އޮންނާނެއެވެ. އަދި އެންމެ ފަހުބައިގައި އޮންނާނީ އެވޯޑު ދިނުމާއި ޖޫރީގެ ނިންމުން އިއުލާނުކުރުމެވެ.
ވެރައިޓީ މަޖައްލާ އިން ރިޕޯޓުކޮށްފައިވާ ގޮތުގައި މި ފެސްޓިވަލުގައި 6 މެންބަރުންގެ ޖޫރީއެއް އޮންނާނެއެވެ. އޭގެ ތެރޭގައި "ދަ ޑެއިލީ ޝޯ" ގެ ކޮރެސްޕޮންޑެންޓެއްގެ ގޮތުގައި މަޝްހޫރުވި އެމީ އެވޯޑު ކާމިޔާބުކޮށްފައިވާ އާސިފް މަންޑްވީއާއި، ޕާކިސްތާނުން 2025 ވަނަ އަހަރުގެ އޮސްކާ އަށް ހުށަހެޅި "ދަ ގްލާސްވޯކަރ" ގެ ޕްރޮޑިއުސަރު އަބޫބަކުރު ޚާން ހިމެނެއެވެ.
ފިލްމުތަކުގެ ލިސްޓު:
-
ޑޮލަރ17.74 (ޖަސްޓިން މާޝޫފް):މި ޑޮކިއުމެންޓަރީ ބިނާވެފައިވަނީ 1980 ގެ އަހަރުތަކުން ފެށިގެން ޖަލުގައި ހުރި ކުރީގެ ގޭންގު މެންބަރެއްގެ މައްޗަށެވެ. ޖަލުގެ ގޮޅީގައި ހުރެގެން ޣައްޒާގެ ރައްޔިތުންނަށް އޭނާ ކޮށްދިން ކުޑަކުޑަ ހެޔޮކަމެއްގެ ސަބަބުން، ހީވެސްނުކުރާ ފަދަ ބޮޑު ސަމާލުކަމަކާއި އުންމީދުގެ ރާޅެއް ދުނިޔޭގައި އުފެދިގެންދެއެވެ.
-
Baba is Melting (ކަރީމް އެމާރާ):ޤަޠަރާއި އެމެރިކާ ގޅިީގެން އުފައްދާފައިވާ މި ޑްރާމާ/ކޮމެޑީ ފިލްމުގެ މުޅި ވާހަކަ އެކުލެވިގެންވަނީ އެންމެ ފޯން ކޯލެއްގެ މައްޗަށެވެ. ދޯހާގައި ހުކުރު ނަމާދަށް ދިއުމުގެ ކުރިން ކާރުގައި އިނދެ، ފިރިހެން ދަރިއަކު އޭނާގެ ބައްޕައަށް ގުޅައި ސިއްރުން ކޮށްގެން އުޅޭ ދެވަނަ ކައިވެންޏާ ބެހޭގޮތުން ސުވާލުކުރެއެވެ. ސިޓީގެ ހޫނުގަދަ މާހައުލުގައި، ދެމީހުންގެ އިހުސާސްތައް ބޭރުވެ، ފިރިހެންވަންތަކަމާއި އާއިލީ ގުޅުމުގެ ނާޒުކުކަމާ ކުރިމަތިލާންޖެހެއެވެ.
-
Bukra (އެލެކްސް އަލްޖޫނީ):ސޫރިޔާގެ ކުޑަ ރެފިއުޖީ އަންހެން ކުއްޖަކަށް ނަސީބު ނަންބަރު ގުޅައިގެން ފުޓުބޯޅައެއް ލިބެއެވެ. އޭނާގެ އެންމެ ގާތް ރަޙުމަތްތެރިޔާ އޭނާ ދޫކޮށް ފުރައިގެން ދިއުމުގެ ކުރިން، ދެމީހުން އެކުގައި އެންމެ ފަހު މެޗު ކުޅުމަށްޓަކައި އެ ބޯޅަ ބަލައި އަވަހަށް ދާންޖެހެއެވެ.
-
Ghusl (ޒައިދު އަޙްމަދު ޙަސަން):މި ފިލްމުގައި ފެންނަނީ މަރުވަމުންދާ ބައްޕައަކު، އޭނާގެ ފިރިހެން ދަރިއަކަށް އިސްލާމީ ގޮތުން ކަށުކަމާކެމީގެ ކަންކަން ކުރާނެ ގޮތް ދަސްކުރުމަށް އެދުމުން، އެ ދެމީހުންގެ އެންމެ ފަހު ވަގުތުތަކާ ދަރިފުޅު ކުރިމަތިލާ ތަނެވެ.
-
Haram Salami (ނެގީން ޖޭސްމިން ސިކަންދަރީ އަދި އައިދާ ރޯޝަންތަލަބް):މި ކޮމެޑީ ފިލްމުގައި އަފްޣާނިސްތާނުގެ ތިން ޖީލެއްގެ އަންހެނުންގެ މެދުގައި އުފެދިފައިވާ މައްސަލަތައް އަލުން ތިލަވެއެވެ. އެއީ ކޮންމެ އަންހެނަކުވެސް އަމިއްލަ އެދުންތަކާއި، ސަޤާފީ އާދަކާދަތަކާ މެދު އަޅާކަނޑައި ވިސްނަމުންދާއިރުއެވެ.
-
Henna (ބަސްމާ ޚަލީފާ):އިނގިރޭސިވިލާތުގެ މި އެކްސްޕެރިމެންޓަލް ފިލްމުގައި ދައްކުވައިދެނީ ހީނާފަތް ގަހުގެ ދައުރާއި، އަންހެނެއްގެ ޖީލުތަކުގެ އާދަކާދަތަކާއި، ހަނދާންތަކުގެ ދަތުރެވެ. މިއީ ކައްކައިގެން ހަދާ ހީނާގެ ސަޤާފަތް އަމިއްލަ ޚިޔާލުތަކާ ގުޅުވާލަދޭ ފިލްމެކެވެ.
-
Malika (މަރާމް ޠައިބާ):ސަޢޫދީގެ މި ފެންޓަސީ ފިލްމު ބިނާވެފައިވަނީ މާމައަކާއި އެނާގެ މާމަދަރިފުޅުގެ ގުޅުމުގެ މައްޗަށެވެ. މުޖުތަމަޢުން އަންހެން ކުދިން ކިޔަމަންތެރިވާން އެދޭ ދުނިޔެއެއްގައި، "ނުކިޔަމަންތެރި/މިނިވަން" ކުއްޖަކަށްވުމުގެ މާނައަކީ ކޮބައިކަން ކުޑަކުއްޖެއްގެ ތަޞައްވުރުގެ ތެރެއިން ޖާދޫވީ ގޮތަކަށް ގެނެސްދެއެވެ.
-
My Friend in the Jingle Truck (ސީމާ ނަސީމް):ކެނެޑާ-ޕާކިސްތާނު ގުޅިގެން އުފައްދާފައިވާ މި އެނިމޭޝަންގައި ކަރާޗީގެ ކުޑަ އަންހެން ކުއްޖަކު ކުލަގަދަކޮށް ޒީނަތްތެރިކޮށްފައިވާ "ޖިންގަލް ޓްރަކް" އަކަށް އަރައެވެ. އެތަނުން ޖާދޫވީ ދޫންޏެއް އޭނާ ކުލަގަދަ ދުނިޔެއަކަށް ގެންދެއެވެ. ސްޓޮޕް-މޯޝަން އަދި 2ޑީ އެނިމޭޝަން މެދުވެރިކޮށް ޕާކިސްތާނުގެ ސަޤާފަތް ދައްކުވައިދޭއިރު، މައިގަނޑު ކެރެކްޓަރަށް ރަޙުމަތްތެރިކަމާއި ކަންކަން ދޫކޮށްލަން ދަސްވެއެވެ.
-
Sabr O Shukr (ބިލާލް ޝަމްސް ޚާން):މި ފިލްމުގައި 10 އަހަރުގެ އަކްރަމް ބައިސިކަލެއް ހޯދުމަށް ކުރާ އުންމީދަކީ ކެތްތެރިކަމާއި ޝުކުރުވެރިވުމާ މެދު އޭނާއަށް ލިބޭ ފުރަތަމަ ފިލާވަޅެވެ.
-
The Boy with the Dinosaur Head (އިމްރާން ޖޭ ޚާން):އޭނާއަކީ ޑައިނޯސޯއެއް ކަމަށް ޤަބޫލުކޮށްގެން އުޅޭ މައްސަލަތަކެއް ހުރި ފިރިހެން ކުއްޖަކާއި، އޭނާ ހަޤީޤީ ދުނިޔެއަށް ގެންނަން މަސައްކަތްކުރާ ޓީޗަރެއްގެ މެދުގައި ހިނގާ ކަންތައްތަކެކެވެ.
-
Unqualified (އިލްހާން ޢަބްދުالله އަދި ޝެރީ ރަޝީދާން):ކެނެޑާގެ މި ކޮމެޑީ ފިލްމުގައި ފެންނަނީ އޮފީހުގައި މަސައްކަތްކުރާ އެކަނިވެރި މުސްލިމް އަންހެން މުވައްޒަފެވެ. އޭނާގެ ލަންޗުރޫމަކީ ޖިންނި އުޅޭ ތަނެކެވެ.
-
Ya Hanouni (ލީނާ ތަދޫންތު އަދި ސޯފިއާން ޝުއައިބު):ފްރާންސްގެ މި ޑްރާމާގައި ދެމަފިރިއަކު އެމީހުންގެ ދަރި މަންމަ ނުވަތަ ބައްޕަ ކިޔާނީ ކާކަށްތޯ ބެލުމަށް ވާދަކުރެއެވެ. ނަމަވެސް އެމީހުންގެ ދިރިއުޅުން ބަދަލުކޮށްލާ ފަދަ ހާދިސާއަކުން މި ސަމާސާ ނިމުމަކަށް އާދެއެވެ.
މީގެ ކުރިން މުސްލިމް ފިލްމު ފެސްޓިވަލެއް ބޭއްވިފައިނުވާ ރަށަކަށް މިއީ ވަރަށް މުހިންމު ފެށުމެކެވެ.
"އަޅުގަނޑުމެން ބޭނުންވަނީ މުސްލިމުންގެ ދިރިއުޅުމުގެ މުއްސަނދިކަން ދައްކުވައިދޭ، ލޯތްބާއި، މަޖާކަމާއި، ސާބިތުކަމާއި، އޯގާތެރިކަން އަދި އިޖުތިމާޢީ ގުޅުންތައް ދައްކުވައިދޭ ފުރިހަމަ ވާހަކަތައް ކުރިއަރުވަން," މުބީން ބުންޏެވެ. "އުފާވެރި މާހައުލެއްގެ ތެރެއިން، ފިލްމު އުފައްދާ ފަރާތްތަކަށާއި ބަލާ ފަރާތްތަކަށްވެސް އެމީހުންގެ އަޑު އިވޭކަމުގެ އިހުސާސް ކުރެވި، ގުޅުން ބަދަހިވެ، އުންމީދުތަކެއް ލިބިގެންދާނެ ކަމަށް އުންމީދު ކުރަން," އޭނާ އިތުރަށް ބުންޏެވެ.
