އިންޑިއާގެ ބޮޑުވަޒީރު ނަރެންދުރަ މޮދީ އާންމު ޚިދުމަތުގައި 25 އަހަރު ފުރިހަމަކުރެއްވުމާ ގުޅިގެން، އިނގިރޭސިވިލާތުގެ ކުރީގެ ބޮޑުވަޒީރު ރިޝީ ސުނަކް މަރުހަބާ ދަންނަވައިފިއެވެ. އޭނާ ނިއުދިއްލީއަސށް ވަޑައިގަތީ ބްލޫމްބަރގް ނުވަ ވަނަ އެކޮނޮމީ ފޯރަމް 2026 ގެ ޕެނަލް ގައި ބައިވެރިވެ ވަޑައިގަތުމަށެވެ.
މޮދީއާ ބައްދަލުވުމަށްފަހު މީސް މީޑިއާގައި ހިއްސާކުރެއްވި މެސެޖެއްގައި ސުނަކް ވިދާޅުވީ، އޭނާ ބޮޑުވަޒީރުކަމުގެ މަގާމުގައި ހުންނެވި ދުވަސްވަރު މޮދީއާއެކު މަސައްކަތްކުރެއްވުމަކީ ލިބުނު ބޮޑު އުފަލެއް ކަމަށެވެ. އަދި މޮދީގެ މަސައްކަތުގެ އަޚުލާގާއި، ޤައުމީ ޚިދުމަތަށް ދެއްވާ ސަމާލުކަމަކީ އެންމެންނަށްވެސް ނަމޫނާއެއް ކަމަށް އޭނާ ފާހަގަކުރެއްވިއެވެ. އިނގިރޭސިވިލާތާއި އިންޑިއާގެ ގުޅުން އިތުރަށް ބަދަހިވަމުންދާކަން ފާހަގަކުރައްވަމުން، ވިޔަފާރިއާއި ޓެކްނޮލޮޖީ އަދި އާޓިފިޝަލް އިންޓެލިޖެންސް (އޭއައި) ގެ ދާއިރާއިން ދެ ގައުމު ގުޅިގެން މަސައްކަތްކުރުމަކީ މިހާރުގެ ނުތަނަވަސް ޖިއޮޕޮލިޓިކަލް މަސްރަހުގައި ނުހަނު ބޭނުންތެރި ކަމެއް ކަމަށް އޭނާ ވިދާޅުވިއެވެ.
މީގެ އިތުރުން، ނިއުދިއްލީގައި ބޭއްވި ބްލޫމްބަރގް ނުވަ ވަނަ އެކޮނޮމީ ފޯރަމް 2026 ގެ ޕެނަލް ބަހުސެއްގައި ވާހަކދައްކަވަމުން ސުނަކް ވަނީ ދުނިޔޭގެ ސިޔާސީ އަދި އިގުތިސާދީ މަސްރަހަށް އަންމުންދާ ބަދަލުތަކަށް އަލިއަޅުވާލައްވާފެވެ. އޭނާ ވިދާޅުވީ، ކުރިން އޮތް ބައިނަލްއަގުވާމީ ހަމަތަކުގެ މައްޗަށް ބިނާވެފައިވާ ނިޒާމު ބަދަލުވަމުންދާ ކަމަށާއި، މިހާރު އިންޑިއާ ފަދަ ގައުމުތަކަށާއި ގަލްފުގެ ގައުމުތަކަށް އެމެރިކާއާއި ޗައިނާއާ އެއްގޮތަކަށް ވިސްނަން ނުޖެހި، އަމިއްލަ މަސްލަހަތަށްޓަކައި މިނިވަންކަމާއެކު ސިޔާސަތުތައް ކަނޑައެޅުމުގެ ގާބިލުކަން ލިބިފައިވާ ކަމަށެވެ.
ދުނިޔޭގެ ބާރުތަކުގެ މައިދާނުގައި ޗައިނާއަކީ އެމެރިކާއަށް ކުރިމަތިވެފައިވާ ބޮޑު ވާދަވެރިއެއްކަން ފާހަގަކުރައްވަމުން، ކުރީގެ ބޮޑުވަޒީރު ވިދާޅުވީ ކުރިއަށް އޮތް ތަނުގައި ބައިނަލްއަގުވާމީ މުޖުތަމައުގައި އެކި ގައުމުތަކުން އަމަލުކުރާނީ އަމިއްލަ އިގުތިސާދީ އަދި ސިޔާސީ މަސްލަހަތުތަކަށް ބަލައިގެން ކަމަށެވެ.
