ސާބިއާގައި ބޭއްވި ގާނޫނުހަދާ މަޖިލީހުގެ އިންތިޚާބުން ވެރިކަން ކުރާ ޕާޓީ ނާކާމިޔާބީވިކަން އެ ގައުމުގެ ރައީސް އަލެކްސަންޑަރު ވުޗިޗް ގަބޫލުކުރައްވައި، އިދިކޮޅު "ސްޓޫޑެންޓް ލިސްޓް" ހަރަކާތުން މަޖިލީހުގެ ފުރިހަމަ އަޣުލަބިއްޔަތު ކަށަވަރުކޮށްފިކަން އިއުލާނުކުރައްވައިފިއެވެ. މިއީ ސާބިއާގެ ސިޔާސީ މައިދާން ގައި ވޭތުވެދިޔަ ދިގު މުއްދަތުގައި ވެރިކަން ކުރެއްވި ވުޗިޗްގެ ބާރުތަކަށް ކުރިމަތިވި ބޮޑު ނާކާމިޔާބީއެކެވެ.
އިންތިޚާބުގެ ވަގުތީ ނަތީޖާތަކަށްފަހު ގައުމާ މުޚާޠަބުކުރައްވައި ވާހަކަފުޅު ދައްކަވަމުން ރައީސް ވުޗިޗް ވިދާޅުވީ، ވޯޓުގެ ތަހުލީލުތަކުން އެނގޭ ގޮތުގައި އިންތިޚާބުން ސަރުކާރު ވަނީ ނާކާމިޔާބުވެފައެވެ. އަދި އިދިކޮޅު ހަރަކާތުން ސާފު ބޮޑު ކާމިޔާބީއެއް ހޯދާފައި ކަމަށް ވެސް އޭނާ އެއްބަސްވެވަޑައިގަތެވެ.
"ލިބިފައިވާ ސާމްޕަލްތަކަށް ބަލާއިރު، އަޅުގަނޑުމެން އިންތިޚާބުން ނާކާމިޔާބުވެއްޖެކަން ވަރަށް ސާފު. ސްޓޫޑެންޓް ލިސްޓުން ވަނީ އިންތިޚާބު ކާމިޔާބުކޮށް، މަޖިލީހުގެ 135 އާއި 140 އާ ދެމެދުގެ ގޮނޑި ހޯދާފައި. އަޅުގަނޑުމެންގެ ޕާޓީއަށް ލިބޭނީ 105 ގޮނޑި،" ވުޗިޗް ވިދާޅުވިއެވެ.
ނަތީޖާތައް ދައްކާ ގޮތުން އިދިކޮޅު ސްޓޫޑެންޓް ލިސްޓުން ވަނީ 2.2 މިލިއަން ވޯޓާއެކު ވޯޓުގެ 52 އިންސައްތަ ހޯދާފައެވެ. އޭގެ ބަދަލުގައި ވުޗިޗްގެ ސާބިއަން ޕްރޮގްރެސިވް ޕާޓީ (އެސްއެންއެސް) އަށް ލިބުނީ 1.72 މިލިއަން ވޯޓާއެކު 32.3 އިންސައްތައެވެ. މަޖިލީހުގެ ބާކީ ގޮނޑިތައް ކަށަވަރުކޮށްފައިވަނީ ކުދި ޕާޓީތަކުންނެވެ. އެގޮތުން އެލަޔަންސް އޮފް ވޮއިވޮޑިނާ ހަންގޭރިއަންސް (އެސްވީއެމް) އިން 3 ގޮނޑި، އަލްބޭނިއަން މައިނޯރިޓީން 1 ގޮނޑި އަދި އެސްޑީއޭ އިން 1 ގޮނޑި ހޯދާފައިވާ ކަމަށް ވުޗިޗް ފާހަގަކުރެއްވިއެވެ.
މި އިންތިޚާބަކީ ރައްޔިތުންގެ ބޮޑު ތަރުހީބެއް ލިބުނު އަދި ސިޔާސީ ނުތަނަވަސްކަން ބޮޑުވި އިންތިޚާބެކެވެ. ދަރިވަރުން އިސްނަގައިގެން އުފެއްދި މި ހަރަކާތަށް އާންމުންގެ ބޮޑު ތާއީދެއް ލިބުނީ، ސަރުކާރުގެ ތެރޭގައި އޮތް ކޮރަޕްޝަނާއި މިނވަން އިދާރާތަކުގެ ބާރު ކުޑަކުރުމަށް ސަރުކާރުން ކުރަމުންދިޔަ ކަންކަމާ ދެކޮޅަށް ވަކާލާތުކުރުމުގެ ސަބަބުންނެވެ.
އިންތިޚާބުގެ ނަތީޖާއާ ގުޅިގެން ޔޫރަޕިއަން ކޮމިޝަނުގެ ރައީސް އުރުސުލާ ފޮން ޑެއާ ލެޔެން ވަނީ އިދިކޮޅު ސްޓޫޑެންޓް ލިސްޓަށް މަރުހަބާ ވިދާޅުވެފައެވެ. މީސް މީޑިއާ އެކްސްގައި އޭނާ ވިދާޅުވީ، ސާބިއާގެ ރައްޔިތުން ނުކުމެ ގައުމުގެ މުސްތަގުބަލު ބިނާކުރުމަށް ނިންމި ނިންމުމަށް މަރުހަބާ ވިދާޅުވާ ކަމަށެވެ. އަދި ގާނޫނީ ސިޔާދަތާއި، މީޑިއާގެ މިނިވަންކަމާއި، ކޮރަޕްޝަނާ ދެކޮޅަށް ކުރާ މަސައްކަތްތަކުގެ އިތުރުން ޑިމޮކްރެޓިކް ނިޒާމު އިތުރަށް ހަރުދަނާކޮށް، ޔޫރަޕިއަން ޔޫނިއަން (އީޔޫ) ގެ ތެރެއަށް ސާބިއާ ގުޅުމަށް ކުރެވޭ މަސައްކަތްތަކުގައި އެހީތެރިވާން އީޔޫ އޮތީ ތައްޔާރަށް ކަމަށް އޭނާ ވިދާޅުވިއެވެ.
