ސްރީލަންކާގެ ރިއާސީ އިންތިޚާބު ކާމިޔާބު ކުރައްވާފައި ވަނީ ނޭޝަނަލް ޕީޕަލްސް ޕަވަރ (އެންޕީޕީ)ގެ ލީޑަރު އަނޫރާ ކުމާރަ ޑިސާނާޔަކަ އެވެ. އޭނާއަކީ ވާތުފިޔައިގެ މާކްސިސްޓް ސިޔާސީ ފިކުރުގެ ބޭފުޅެކެވެ. ސްރީލަންކާގެ ރިއާސީ އިންތިޚާބު ކާމިޔާބު ކުރައްވާނެ ފަރާތަކާ މެދު ދެކުނު އޭޝިއާގެ ޤައުމުތަކުން ދިޔައީ ބަލަމުންނެވެ.
ޑިސަނާޔަކަގެ މެނިފެސްޓޯގައި ބާރުއަޅުއްވާފައިވާ މުހިންމު ދާއިރާއަކީ ބަންކަރިންގެ ދާއިރާއެވެ. އޭނާގެ މެނިފެސްޓޯގައި އެކަމަށް ޚާއްޞަ ބާބެއް ހިމަނުއްވާފައި ވެއެވެ. އަދި އެދާއިރާއިން މީހުން ބިނާކުރުމާއި ވަށާ ޖެހޭފަދަ ޚިދުމަތްތަކެއް ދިނުމާއެކު އެއިން ސްރީލަންކާގެ އާމްދަނީ އިތުރުކުރުމަށް މަސައްކަތް ކުރެއްވުމަކީ، އޭނާގެ ސިޔާސަތެކެވެ.
މިސަރަހައްދުގެ ކަނޑުމަތީގައި ދިމާވާ ޙާދިސާތަކުގައި އެހީދޭ އެންމެ އިސް އަދި އެންމެ ފުރަތަމަ ޤައުމަކީ ސްރީލަންކާ ކަމުގައި ހެދުމަކީވެސް އޭނާގެ ސިޔާސަތެކެވެ.
އަވަށްޓެރިންނާ މެދު ޑިސަނާޔަކަ ގެންގުޅުއްވާނެ ސިޔާސަތާ މެދު ބަލާލާއިރު، ޑިސަނާޔަކަ ވަނީ ސަރަހައްދީ ބޮޑު ބާރު އިންޑިއާއާ މެދު ގާތް ގޮތެއް ގެންގުޅުއްވާނެ ކަމުގެ އިޝާރާތެއް ދެއްވާފައެވެ. އޭނާ ބާރުއަޅުއްވާފައި ވަނީ ވަކި ފަރާތަކަށް ނުޖެހޭ މިނިވަން ޚާރިޖީ ސިޔާސަތެއް ގެންގުޅުއްވާށެވެ. އޭނާގެ ސަރުކާރުގެ ޚާރިޖީ ސިޔާސަތަކީ، ވަކި ފަރާތަކަށް ނުޖެހޭ އަދި ޤައުމުތަކުގެ މެދުގައި ސުލްޙަ ޤާއިމް ކުރުމަށް ބާރުއަޅާ ސިޔާސަތެއް ކަމަށް އޭނާގެ މެނިފެސްޓޯގައި ބަޔާން ކުރައްވާފައި ވެއެވެ. އެގޮތުން، އިންޑިއާ އާއި ޗައިނާއާ ދެމެދު ޒަމާނުއްސުރެން ސްރީލަންކާއިން ބާއްވާ ގުޅުން ހަމަހަމަކަމާއެކު ދަމަހައްޓެވުމުގެ އިތުރުން ސްރީލަންކާގެ އިޤްތިޞާދީ ގޮންޖެހުންތަކަށް ޙައްލެއް ހޯއްދެވުމަށް ސަމާލުކަން ދެއްވާނެ ކަމުގައި އޭނާ ވަނީ ކެމްޕޭން ޖަލްސާތަކުގައި ވިދާޅުވެފައެވެ.
ޑިސަނާޔަކަގެ އެންޕީޕީއަކީ ޝްރީލަންކާގެ ސިޔާސީ މަސްރަޙުގައި ބާރުގަދަ ނުފޫޒެއްކަމުގައި އިންޑިއާއިން ވަނީ ބަލައިގެންފައެވެ. މިއަހަރުގެ ފެބްރުއަރީ މަހު، ޑިސަނާޔަކަ ވަނީ ނިއުދިއްލީއަށް ދަތުރުފުޅެއް ކުރައްވާފައެވެ. މިއީ އޭނާ ރަސްމީ ސިފައެއްގައި އިންޑިއާއަށް ކުރެއްވި ފުރަތަމަ ދަތުރުފުޅެވެ. އަދި އެއީ ޑިޕްލޮމެޓިކް ގުޅުން ބަދަހި ކުރެއްވުމަށް ކުރެއްވި ދަތުރެއް ކަމުގައި ބެލެވެއެވެ.
އޭނާގެ ދަތުރުފުޅުގައި އިންޑިއާގެ މަސްއޫލުވެރިންނާއެކު މަތީ ފެންވަރުގެ ބައްދަލުވުންތައް ބައްވަވާފައި ވެއެވެ. އަދި އެބައްދަލުވުންތަކުގެ ރޫހަކީ ދެޤައުމުގެ ގުޅުން ބަދަހިކުރުމުގެ މުހިންމުކަން ދެފަރާތުން އިޙުސާސް ކުރުން ކަމުގައި މުޙައްލިލުން ދެކެއެވެ.
ޑިސަނާޔަކަގެ ޚާރިޖީ ސިޔާސަތުގެ މައިގަނޑު އުޞޫލަކީ ވަހި ފަރާތަކަށް ނުޖެހުން ކަމަށާއި، މި ސިޔާސަތުގެ މަޤްޞަދަކީ އިންޑިއާ އާއި ޗައިނާއާ އެކުވެސް ހަމަހަމަ ގުޅުމެއް ދެމެހެއްޓުމެވެ. އޭނާގެ ސަރުކާރުގެ މި ސްޓްރެޓެޖީއަކީ ދެ ސަރަހައްދީ ބާރުގެ ނުފޫޒު ބޮޑުވަމުންދާ ދަނޑިވަޅެއްގައި ސްރީލަންކާގެ މަސްލަޙަތު ހިމާޔަތްކޮށް ރައްކާތެރިކުރުމަށް އެކުލަވާލާފައިވާ ސްޓްރެޓެޖީއެކެވެ. އަދި އެސްޓްރެޓެޖީ ބިނާވެގެން ވަނީ އަސްކަރީ ކޯޅުމަކަށް މަގުފަހި ކުރުމުން ޝްރީލަންކާ އެކަހެރިވެ އޮތުމުގެ މައްޗަށެވެ. ޑިސަނާޔަކަގެ މެނިފެސްޓޯގައި ކަނޑައެޅިގެން ބަޔާން ކުރައްވާފައި ވަނީ އެސްވެސް އަސްކަރީ ބާރަކަށް ސްރީލަންކާގެ ބަދަރެއް އަސްކަރީ ބޭނުމަކަށް ނުދޭށެވެ. އެހެންވެ، ޑިސަނާޔަކަ ބެލެވެނީ، ބައިނަލްއަޤްވާމީ ގުޅުމުގައި ޕްރެގްމެޓިކް، ލީޑަރޝިޕެއް ދައްކަވާނެ ބޭފުޅެއްގެ ގޮތުގައެވެ.
ޑިސަނާޔަކަގެ ޕާޓީއަކީ ވާތުފިޔައިގެ ޕާޓިއެއްކަމުގައިވިއަސް، އޭނާ ވަނީ ސްރީލަންކާގެ އިޤްތިޞާދީ ޙާލަތާ ހެދި ވިޔަފާރިއަށް ފުރުޞަތު ދެއްވާނެ ކަމުގެ ޔަޤީންކަން ދެއްވާފައެވެ. އެހެންވެ، އޭނާގެ ޕާޓީން ތަކުރާރުކޮށް ބުނެފައި ވަނީ އެޕާޓީގެ ސިޔާސަތަކީ ވިޔަފާރިތައް ތިޔާގިކޮށްދީ ފަހިވުމަށް ތާއީދުކުރުން ކަމަށެވެ.
ޑިސަނާޔަކަ ބާރުއަޅުއްވަނީ، ޓެކްސްނެގުމުގެ ނިޒާމު ފަސޭހަކޮށް، ވިޔަފާރީގެ މާހައުލު ރަނގަޅު ކުރުމަށް އަމާޒުކޮށްގެން އިޞްލާޙީ ފިޔަވަޅުތަކެއް ތަޢާރަފް ކުރައްވާށެވެ. އަދި އައިއެމްއެފްއިން ހުށަހަޅާފައިވާ ހުށަހެޅުންތަކަށް ބަދަލުގެނަސް ރައްޔިތުންނަށް ލުއިވާ ގޮތަކަށް އިޤްތިސާދީ އިޞްލާޙީ ފިޔަވަޅުތައް ތަޢާރަފް ކުރާށެވެ. އޭގެ އިތުރުން ޝްރީލަންކާއަށް ލޯނު ދީފައިވާ އެހެން ފަރާތްތަކާ ވާހަކަ ދައްކައިގެން ލޯނުތަކަށް ލުޔެއް ހޯއްދެވުމަކީވެސް އޭނާގެ ސިޔާސަތެކެވެ. އަދި ސްރީލަންކާގެ ސަރުކާރުތަކުން މާޒީގައި ނަގާފައިވާ ލޯނުތަކުގެ އަދަދުތައް ހޯދައި އެލޯނުތަކުން ކޮށްފައިވާ ކަންކަން ބަލައި، ލޯނުތަކުގެ ނާޖާއިޒް ފައިދާ ހޯދައި ކޮރަޕްޝަންގެ ޢަމަލު ހިންގާފައިވާ ފަރާތްތަކުގެ އަތުން އެފައިސާ ހޯދުމަކީވެސް އޭނާ ހުށަހަޅުއްވާ ކަމެކެވެ.
