އާސަންދައިގެ ދަށުން ދޫކުރާ 250 ބޭހެއްގެ އަގު އަންނަ މަހުން ފެށިގެން ކޮންޓްރޯލް ވާނެ ކަމަށް އެންސްޕާ އިން ބުނެފިއެވެ. މިފިޔަވަޅާއެކު އާސަންދަ ސްކީމުގެ ދަށުން ބޭހަށް ކުރާ ޚަރަދުން އަހަރަކު 220 މިލިއަން ރުފިޔާ ސަލާމަތް ކުރެވޭނެ ކަމަށް އެންސްޕާއިން ބުނެއެވެ.
ބޮޑު އަގުގައި ވިއްކަމުން އައި އާންމުކޮށް ބޭނުންކުރާ ބޭސްތަކުގެ އަގު ކޮންޓްރޯލު ކުރުމަށް ނިންމާފައި ވަނީ އެކި ފިޔަވަހިތަކަކަށް ބަހާލައިގެންނެވެ.
ފުރަތަމަ ބުރުގައި އަގުތައް މުރާޖައާ ކޮށްފައި ވަނީ 87 ބޭހެއްގެ އެވެ. އެ ބޭސްތަކުގެ އަގަށް އަންނަ ނޮވެމްބަރު 1 އިން ފެށިގެން ބަދަލު ގެނެވޭނެއެވެ. އަދި ދެވަނަ ބުރުގައި 126 ބޭހެއްގެ އަގަށް ނޮވެމްބަރު 24 އިން ފެށިގެން ބަދަލު ގެނެވޭނެއެވެ.
އެންސްޕާއިން ގެންނަ ބަދަލުތައް ވެބްސައިޓްގައި ހިމަނައި އާންމު މަޢުލޫމާތު ދިނުމަށް ހަމަޖެހިފައި ވެއެވެ.
ބޭހުގެ އަގު ކޮންޓްރޯލު ކުރުމަކީ ރައީސްގެ ވަޢުދުފުޅެކެވެ. ރާއްޖޭގައި އާދަޔާ ޚިލާފު ބޮޑު ފައިދާއެއްގައި ބޭސް ވިއްކުމުގެ މައްސަލަ ހައްލުކުރުމަށް ގާނޫނުގައި ކަނޑައަޅާފައިވާ ކަންކަން ތަންފީޒު ކުރުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ގޮވާލެއްވީ ސެޕްޓެމްބަރު މަހުގެ ތެރޭގައެވެ. ރައީސް ވަނީ އަގުތައް ކޮންޓްރޯލުކޮށް، ބޭހުގެ އަގު ކޮންޓްރޯލް ކުރުމަށް އަޅަންޖެހޭ ފިޔަވަޅުތައް އެޅުމަށް ކަމާބެހޭ އިދާރާތަކަށް އަންގަވާފައެވެ.
ރައީސް ފާހަގަ ކުރެއްވިގޮތުގައި، ރާއްޖޭގެ ބާޒާރުގައި ބޭސް ވިއްކަނީ، 200 ޕަސެންޓާއި 2،000 ޕަސެންޓާ ދެމެދުގެ ފައިދާއެއް ލައިފައެވެ. އެހެންވެ، ރާއްޖެއިން ބޭހަށް ކުރާ ހޭދަ އެހެން ޤައުމުތަކާ އަޅާބަލާއިރު 70 ޕަސެންޓަށް އިތުރު ކަމަށް ދައްކައެވެ.
މި އަގު ކޮންޓްރޯލު ކުރުމަކުން އާންމުންނަށް ލިބެންވާ ބޭހަށް އެއްވެސް ހުރަހެއް ކުރިމައްޗެއް ނުވާނެއެވެ. އަދި އަގު ކޮންޓްރޯލު ކުރާ ބޭސްތައް އެސްޓީއޯ ފާމަސީތަކުން ލިބެން ހުންނާނެއެވެ. އަދި އާސަންދަ ލިބޭ ގޮތަށް ރަޖިސްޓްރީ ކޮށްފައިވާ ބޭސް ފިހާރަތަކުންވެސް މި ބޭސް އިތުރު އަގެއް ނެގުމަކާ ނުލައި ލިބޭނެއެވެ.
ކޮންޓްރޯލުކޮށްފައިވާ އަގާ ޚިލާފަށް ބޭސްވިއްކާނަމަ “ޝިކާވަތި” ޗެޓްލައިން 7951400 އަށް ރިޕޯޓު ކުރުމަށާއި ބޭސްގަތުމަށްފަހު ރަސީދު ހޯދުމަށް އިލްތިމާސްކޮށްފައި ވެއެވެ.
