ޕާކިސްތާނުގެ މަތީ ތައުލީމުގެ ދާއިރާއަށް ކުރިމަތިވެފައިވާ ގޮންޖެހުންތައް ހައްލުކުރުމުގެ ގޮތުން ސަރުކާރުން މަސައްކަތް ކުރަމުންދަނީ ޕަބްލިކް ޔުނިވާސިޓީތައް އަމިއްލައަށް ދެމެހެއްޓެނިވި ކޯޕަރޭޓް އެންޓިޓީތަކަށް ބަދަލުކުރުމަށް “ޓްރާންސްފޯމޭޝަން ޕްލޭނެއް” އެކުލަވާލުމަށް ކަމަށް ރިޕޯޓްތައް ބުނެ އެވެ.
ހުށަހަޅާފައިވާ ޕްލޭންގެ މަގުސަދަކީ ޔުނިވާސިޓީތަކަށް ބޮޑު ބާރާއި މިނިވަންކަން ދީ ވަރުގަދަކަމާއި ވާދަވެރި މާހައުލެއްގައި ކުރިއަރައި ދިއުމުގެ ގާބިލްކަން ދިނުމާއި، ގަވަރނަންސް، ފައިނޭންސް، އަދި މެނޭޖްމަންޓްގެ ކޯޕަރޭޓް މޮޑެލްތައް ތައާރަފްކޮށްގެން މަތީ ތައުލީމުގެ ހާލަތު ޒަމާނީ ކުރުމެވެ.
ޕަބްލިކް ޔުނިވާސިޓީތައް އިސްލާހު ކުރުމުގެ ޚިޔާލަކީ އޭގެ ޒާތުގައި މައްސަލައެއް ނޫނެވެ. ނަމަވެސް، މި މުއައްސަސާތަކުގެ ތެރެއިން ގިނަ މުއައްސަސާތަކަށް މާލީ ދަތިތަކާ ކުރިމަތިލާން ޖެހިފައިވާއިރު، މި ޕްލޭންގައި ބޮޑެތި ބަހުސްތަކެއް އުފެދި ފައި ވެއެވެ. ޚާއްސަކޮށް އިކުއިޓީ، އެކަޑަމިކް ފްރީޑަމް، އަދި ކޮލިޓީ އެޝުއަރެންސްއާ ގުޅޭ ގޮތުން ބޮޑެތި ކަންބޮޑުވުންތަކެއް އުފެދިފައިވެ އެވެ.
އެންމެ މުހިންމު ކަންބޮޑުވުމަކީ އަމިއްލަ ފައިމައްޗަށް ތެދުވެވޭ މޮޑެލްއަކަށް ބަދަލުވުމުން ޓިއުޝަން ފީ ބޮޑުވެގެން ދިއުމެވެ. އާމްދަނީ ދަށް އާއިލާތަކާއި ދަރިވަރުންނަށް މަތީ ތައުލީމު ލިބުން ހަނިވެދިއުމެވެ.
ބަންޑާރަ ޔުނިވާސިޓީތަކަކީ އާދަވެގެން ގިނަ ދަރިވަރުންނަށް ކިޔެވުމަށް އަގުހެޔޮ ގޮތެއް ކަމަށްވެފައިވާއިރު މިހާރު ހުށަހަޅާފައިވާ ބަދަލުތަކުގެ ސަބަބުން ފަގީރު މީހުންނަށް މަތީ ތައުލީމުގެ ދޮރުތައް ބަންދުވެދާނެ ކަމަށް ބެލެވެއެވެ.
އަދި ޔުނިވާސިޓީތަކުން ކްރިޓިކަލް ވިސްނުމާއި ފިކުރީ ގޮތުން ސުއާލުކުރުން ފަދަ އެކަޑަމީގެ މައިގަނޑު އަގުތައް ހިފެހެއްޓުމަށް ވުރެ ފައިދާ އާއި ބާޒާރުގެ އުސޫލުން ލަނޑުދަނޑިތަކަށް ފޯކަސް ކުރެވިދާނެތީ ކޯޕަރޭޓް ގަވަރނަންސް މޮޑެލްއެއް ތައާރަފް ކުރުމުން ތައުލީމީ މިނިވަންކަމަށް ބުރޫ އަރާފާނެ ކަމަށް ވެސް ތަޖުރިބާކާރުން އިންޒާރު ދެ އެވެ.
މީގެ އިތުރުން މާލީ ދެމެހެއްޓެނިވި ގޮތެއްގައި ކަންކަން ކުރިއަށް ގެންދިއުމުގައި ޔުނިވާސިޓީތަކުން ވާދަވެރި ވާން މަސައްކަތް ކުރާތީ، ކޮލިޓީގެ މިންގަނޑުތަކަށް ކޮމްޕްރޮމައިޒް ވެދާނެ ކަމުގެ ކަންބޮޑުވުންތައް ވެސް އެބަހުއްޓެވެ. މާލީ ލަނޑުދަނޑިތައް ހާސިލް ކުރަމުންދާއިރު ޔުނިވާސިޓީތަކުން ހަރުކަށި ތައުލީމީ މިންގަނޑުތައް ދަމަހައްޓާނެތޯ ބެލުމަކީ ކޮލިޓީ އެޝުއަރެންސް މެކޭނިޒަމްތަކެއް ހަރުދަނާ ކުރަން ޖެހޭނެ ކަމެކެވެ.
ޓްރާންސްފޯމޭޝަން ޕްލޭންގެ މައިގަނޑު ވިސްނުމަކީ ޕާކިސްތާނުގެ ސަރުކާރު ޔުނިވާސިޓީތަކަށް ގިނަ ދުވަސްތަކެއް ވަންދެން ކުރިމަތިވެފައިވާ މާލީ އަދި ހިންގުމުގެ ގޮންޖެހުންތަކަށް ހައްލެއް ހޯދުމެވެ. މި މުއައްސަސާތަކުގެ ތެރެއިން ގިނަ މުއައްސަސާތަކަކީ ސަރުކާރުގެ ފައިސާއަށް ބަރޯސާވެފައިވާ މުއައްސަސާތަކެވެ. އެއީ، ގިނަ ފަހަރަށް އެކަށީގެންވާ ވަރަށް ފައިސާ ނުލިބި ހުރުމުން ބަޖެޓް ޑެފިސިޓްވެ ވަސީލަތްތަކުގެ ދަތިކަން ކުރިމަތިވެފައިވާ ތަންތަނެވެ.
އަމިއްލައަށް ދެމެހެއްޓެނިވި ކޯޕަރޭޓް މޮޑެލްއެއް ތައާރަފްކުރުމުގެ މި ޕްލޭންގެ މަގުސަދަކީ ޔުނިވާސިޓީތަކަށް މާލީ އަދި އިދާރީ ނިންމުންތައް ނިންމުމާއި އަމިއްލަ ސިނާއަތްތަކާ ޕާޓްނަޝިޕް ހަދައި، ރިސާޗާއި ޑިވެލޮޕްމަންޓަށް އިންވެސްޓްމަންޓްތައް ޝައުގުވެރިކޮށް، ސަރުކާރުގެ ފައިސާއަށް ބަރޯސާވުން ކުޑަކުރުމެވެ.
ހުށަހަޅާފައިވާ ބަދަލުތަކުން ބޮޑު މިނިވަންކަމަކާއި މާލީ ދެމެހެއްޓެނިވި ގޮތެއްގައި ކަންކަން ކުރުމުގެ ފުރުސަތު ލިބޭ ނަމަވެސް، މަތީ ތައުލީމު ހޯދުމުގެ ނުތަނަވަސްކަން އިތުރު ނުވާނެ ގޮތަށް ނުވަތަ ޕަބްލިކް ޔުނިވާސިޓީތަކުން ދަމަހައްޓާނެ ކަމަށް ބެލެވޭ މައިގަނޑު ތައުލީމީ އަގުތަކަށް ބުރޫނާރާނެ ގޮތަށް ޕްލޭން ފަރުވާތެރިކަމާއެކު ބެލެންސް ކުރަން ގޮވާލަމުން ދެއެވެ.
